10
Tikari tavo peang y Daniela i paleung mei y niu nai
1 Pasia empara samrang Kuru my peang nai pa-thom saneng y, Beltesazar amyn nga nai Daniela teng y amteng hai bo. Huni amteng hai naira y abawi nai leu ly teng i py, pany ai nai khri pa-rei rai parai. note 10:1 pany ai nai khri pa-rei rai parai; ti y baly tavai pui harei i satang ne.Daniela ly huni leu i awm nai sai ai, paleung mei hawi niu nai y pany thai nai ne.
2 Naibaly kai, Daniela ly kani apom phai ha ryrei, paleung si vo tangam bo.
3 Kani apom phai ha khei y ryrei ly teicha teinei kahawi, ti y baly mawi cho y, kreip hang nei y, sam py aseu y nai ne.
4 Huni saneng angchei i lo, kani 24 rei kani y, kai ly Tikari tavo pui peang y angdo bo.
5 Naibaly angdeang iy khen nai khala, ateaung kanem amthyp iy, muku khobai akawm nai khumi leaungrei ai kaniu.Ref 10.5-6: Amt 1:13-15, 2.18, 19.12
6 Ni i tlang ly lengseaung vang kateng kamta, angvang teaung na. Ni i meimai ly amlosadi kamta angvang na i, ni i meichi ly mai kamta sangso theu. Ni i kiu kheuchi ly kachi pyn nai kheupaja kamta angvang iy, ni i raawi ly khumi mipuichi i aeu nai katyn hawi atawm.
7 Huni paleung mei hawi niu nai ai ly kai, Daniela leaungrei niu khyh nai ne. Kai hawi vanrei awm nai khumichi ly ati sai py niu u y. Na i py nichi ly jei hyn naimy, angpreng iy aheu u bo.
8 Kaimy leaungrei naini, huni lyh ai hawi parai nai paleung mei y niu hai nai ai khen naimy kaawm jo nai ne. Kai ly atho khei iy ami my py ma y na pa-rei, kai i meimai ly takhra vui bo.
9 Huni khumi i leu raawi thai nai khala, kai ly khaileaung y atlym mawp i, paleung pany y vui nai ne.
10 Naibaly kiu makengrei ly kai ai amkhaw iy pathau i, kai ly kheukhu di nai hawi kiu anip naimy kaawm bo. Kai ly ahyn thlyhthlyh naimy awm jo rai.
11 Kani pri amtaw thau naimy, “Daniela awi, Tameuh ly nang ai tamen. Angthau iy kai i thui nai leu tangai hawihai ba. Mymy ly kai ai nang teng y ang pato bo,” napi. Hini leu thai nai khala y kai ly anghyn thlyhthlyh naimy angdo nai ne.
12 Huni my, “Daniela awi, jei moh. Nang ly cheng naira nga pajau ai nai molam, paleung apanem ai nai paleung adawn manme nai kani dengdairei, Tameuh ly nang i chiu sa nai tangai pi bo. Nang i hnei takeng nai pathang pi ai nai, kai ai ang pato nai ne.
13 Pasia pri ai typ nai kani pri amtaw thau nai ly kai ai kani 21 ryrei ang paka. Naibaly kani pri amtaw thau naichi theung y len keh nai Mikhaela ly Pasia pri y kaimy leaungrei kaawm jo khyh nai deaungkho y, jeu i kai ai sabawm nai ne.Ref 10.13, 21: Amt 12:7
14 Vai, kai kang jeu nai aly ly mo mang i neng y nang i chengchi avum u ai nai leaungsaichi, nang teng y pany hai ai nai molam y ne. Hini paleung mei y niu nai ly mo mang i vui ne,” napi.
15 Ni my hinai kamta thui nai khala y, kai ly leu katheu pajau y naimy khaileaung y meung iy khen ryry bo.
16 Naibaly khumi i mo-cha awm nai kani pri amtaw thau nai ly kiu jaha iy, kai i labeaung y nam baly, kai ly kaimy i mo y angdo nai teng y, “Areng awi, hini paleung mei y niu nai ly kai ai khri pa-rei atho di hai nai deaungkho y, kai ly ahyn thlyhthlyh nai ne.
17 Kai ly yhmkeung i mo y angdo nai miseaung hawi atawm. Ati mana nai y yhmkeung hawi leu arum vam ai mo? Kai ly atho by y, taho kathiu, taho kalau nai py by y leang bo,” napi.
18 Hunai bo y khumi i mo-cha awm naimy ly kai ai amkhaw nai khala y, kai ly atho awm teang bo.
19 Ni my, “Tameuh ly nang ai tamen nai ne. Hunai deaungkho y paleung mawn moh, jei moh,” ang napi.
Hini leu thai nai khala kai ly atho awm teang chum baly ni teng y, “Areng awi, nang i thui ai awm nai ly thui ba. Nang ly kai ai awm hai nem ba,” napi.
20-21 Ni my, “Nang teng y kai kang jeu nai aly, nang pany a? Kai, kang jeu nai aly ly leu meitang cha-iura tajiu nai ai, nang teng y thui pi ai nai ne. Kai ly vai ali teang iy Pasia pri ai kry nai kani pri amtaw thau nai hawi tavai atiu ai. Naibaly krik pri y tym nai kani pri amtaw thau hawi atiu ai. Israela pri ai kry nai kani pri amtaw thau nai Mikhaela ny y baly, kai ai sabawm ai nai keung leaungrei py by y.