4
Alai laawmchi theung i Phailo yhmtheaung
1 Hunai deaungkho y kaichi ly pahen naira nga nai kamta hini krykeung kalop sa ai nai awm nai deaungkho y kaichi ly paha y leang;
2 kaichi ly atiti angji ngailai nai aheu naichi khai su iy, cheng tapawp naira y py tako y, Tameuh i leu y khumi ai tapawp ai nai py teaung y; huna ny y naimy kaichi ly leu meitang pany hai nai, Tameuh i mei ka-niu y khumi leaung leaungrei i hawi nai hawi y nai pany naira teng y kahawi athui nai ne.
3 Na i py kaichi i Satang Kahawi thui nai ly mym vui nai awm lawh baly, tama dudu naichi theung y mym vui nai ne;
4 hunichi i vui ly hini khaileaung pri i tameuh ly ym y naichi i paleung ai paju hai bo; Krista, Tameuh kamta atawm khyp nai, mymy i nang parai nai sai Satang Kahawi kangvang ly nichi ai kangvang ko thai y ai nai paju hai bo.
5 Kaichi ly kaimychi i satang thui nai ny y leang, Krista Isu ly Areng ne, nanai thui nai teu; kaichi py Isu deaungkho y nangchi i miseaung lawn nai py thui pi teang.
6 Isu Krista i meimai y ly Tameuh i nang parai nai sai pany naira kangvang kaichi ai ang pei ai nai, “Kangveng i dengdairei kangvang theu ai,” napi nai keung Tameuh ly kaichi i paleung y kangvang ang ko hai veng bo.
7 Na i py khri pa-rei atiti sa thai naira ly kaimychi teng i ny y naimy, Tameuh teng i ne lawh thai ai nai, kaichi ly hini yhmtheaung katui ly alai laawm y awm nai ne.
8 Kaichi ly makeng makengrei mang y patang nai awm, na i py kaichi ly taho amchei y leang; kaichi ly ati sa ai nai dawn pajau y nai awm, na i py athang pipi by y nai awm y leang;
9 kaichi ly ana naira y awm, na i py ang khai su y leang; kaichi ai pakhau mawp nai awm,
10 na i py ang tamo hai y leang; Isu i heng naira py kaichi i tlang y amteng thai ai nai, kaichi ly mana khala py kaichi i tlang y ly Isu i dei naira apu jojo.
11 Isu i heng naira py achi i dei thai nai tlang y amteng thai ai nai,achi vai heng naichi ly Isu deaungkho y dei ai naira y patiu hai nai awm jojo.
12 Hunaibaly kaichi ai ly dei naira my ang sa hai, na i py nangchi ai ly heng naira my ang sa hai nai ne.
13 Na i py, “Kai ly ym i hunai deaungkho y leu kathui nai ne,” nanai tajiu nai kamta ly, huni ym naira paleung kypkyp apu iy kaichi py ym teang, hunai deaungkho y kaichi ly leu thui;Ref 4.13: Sam 116.10
14 Areng Isu ai pathau nai keung my ly kaichi ai py Isu teng y vanrei pathau teang iy, kaichi ai nangchi hawi vanrei angdo hai ai, nanai kaichi pany.
15 Naibaly pahenra ai ly khumi nawi keh naichi i saho y peung hai nai awm iy, huni my ly Tameuh ai palo ai nai khri pa-rei kawn nai leu ang theu hai thai ai nai, ati cheaungkhang ly nangchi i vui hawi ai naira ne.
Ym nai saho y heng nai
16 Hunai deaungkho y kaichi ly paha y leang; kaichi i angam mang i khumi ly rawp ryh rawp ryh teu i py, kaichi i theung mang i khumi ai ly kani tleirei kangtha sa ryh sa ryh nai ne.
17 Naibaly kaichi i patang nai di parai nai, vai mei amsymrei chy nai sala y awm nai my ly, khri pa-rei nang parai ai naira deungtasarei vui ang sa pi ryhryh nai ne;
18 kaichi ly atiti niu thai naichi ai khen y naimy, atiti niu thai y naichi ai khen nai ne; atiti niu thai naichi ly tanarei chy i vui teu; atiti niu thai y naichi naini deungtasarei i vui ne.