2
1 Na i py kaimy i molam y ly, kai ly, paleung mawn nai tarawi y nangchi teng y kang jeu bi y ai nai katau cheng cheng nai ne.
2 kaimy nangchi ai paleung kang mawn hai lawh baly, kai ai paleung mawn hai nai keung my ne teang y baly, kai ai kawn hai ai nai keung ly ami awm mo?
3 Hunaibaly kai ly huni kypkyp ly katajiu nai bo, ti y baly kai kang jeu nai khala y ly kai ai ang kawn hai ai avo nai keungchi ly kai ai paleung mawn hai lawh na; kai i kawn nai ly nangchi bawibawi i kawn nai ne, nanai kang ym.
4 Kai ly mei katui neangneang tla nai tarawi y paleung y patang nai hawi khrikhri pa-rei phailo seaung nai tajiu nai chy bo; huni ly nangchi ai paleung mawn hai ai tla nai ny y leang, kai ly nangchi i tlang tleaung y tamen nai tleaung y tamen ra nai sai ly nangchi pany lawh thai ai nai teu.
Sa tamang nai ai pahen nai
5 Na i py ami py amichi ai paleung mawn hai nai ly, kaimy leaungrei ai paleung mawn hai nai khyh ny y leang (kang panem ala y ai nai) nangchi bawibawi ai maidenrei paleung ang mawn hai kyh bawibawi nai bo.
6 Huni pajeng naira khumi neangneangchi i sa hai nai ly hunai kamta khumi i vui ly hawi khyp bo;
7 hunaibaly pajeng ai nai tleaung y ly mymy ai pahen u iy, awm hai nem ai nai tla, ti y baly ati mo sa iy hunai kamta khumi ai ly paleung mawn ala naira my pajawn be lawh na.
8 Hunai deaungkho y nangchi ly mymy mang y nangchi tamen naira khaw hai ai nai kang takeng.
9 Hini nai deaungkho y py nangchi ly ati cheaungkhangra y leu tangai na mo, nanai nangchi ai kang cham thai ai nai katajiu nai bo.
10 Na i py ati cheaungkhangra y py ami ai nangchi my pahen nai ngierei ly kai py pahen teang; kai py kapahen chum angchi nai ly, atiti py kapahen baly, nangmychi deaungkho y Krista i mo y ly kapahen nai ne;
11 ti y baly Setan my achi ai kalym vui lawh na; achi ly mymy i sa ai tau nai sai ly pany y nai ny y leang.
Troas y Pawla paleung mawn nai
12 Naibaly kai ly Krista i Satang Kahawi thui pi ai nai Troas avang y katym nai, Areng y ly kai ai katheu ang paeung pi nai khala y ly,Ref 2.12–13: Ataw 20.1
13 kai i amjo amnau Tita ai kaniu y nai deaungkho y kai i phailo mang y ly awmnem naira pipi kango lawh y leang; hunaibaly nichi ai ly leu kahawi y kamprei iy, Makedonia pri y kachei bo.
Krista i saho y eaung nai
14 Na i py Tameuh teng y kawn nai leu tym sy; mymy ly Krista hawi vanrei pajau naira y ang pahawi jojo nai keung hawi, kaimychi ai ang teaung nai meingtym tleirei y mymy ai pany naira i mui amteng hai nai keung py ne.
15 Kaichi ly paheng dudu naichi hawi tama dudu naichi theung y py Tameuh teng y Krista i mui katui ne;
16 kamkawm hareichi i vui ly deira y dei ai nai kamui ne; kamkawm takhrachi i vui ly hengra y heng ai nai kamui ne. Hunai kamtachi i vui ly ami pha pajau ai mo?
17 Khumi neangneangchi ly amichi ai tapawp ai nai Tameuh i leu ai ly ka-pai sa ai nai teaung u nai kamta kaichi ly teaung y leang; kaichi ly meitang khyp naimy Tameuh my ang pato nai, Tameuh i mei ka-niu y Krista y ly leu thui nai ne.