7
Stephana i leu thui nai
1 Naibaly pathyp pi nai keung kalen keh my ly, “Hini leu ly teng a?” napi.
2 Naibaly Stephana my ly, “Amjo amnauchi hawi ngaaichi awi, tangai cham.Ref 7.2–3: AA 12.1
3 Achi i ampo Abraham ly Haran avang y awm y rai khala y Mesopotamia pri y awm nai kha y, nang parai nai Tameuh ly ni teng y amteng i, ‘Nangmy i pri hawi cheng theung i dengdairei theu ly, kaimy pri kang patei ai nai mang y chei,’ napi.
4 Hunaibaly mymy ly Kaldai khumichi pri i dengdairei theu i, Haran avang y awm bo; naibaly mymy i ampo dei nai bo y hu i dengdairei vai hini nangchi i awm nai pri y Tameuh my ni ai angpyn hai bo.Ref 7.4: AA 11.31, 12.4
5 Naibaly mymy ly hi y ly ni ai ati sai py meingtym athun ai nai kheu chiu naira ka-lawn py pei y leang; na i py mymy ly chanau so y rai khala y my mymy hawi, mymy bo i kangpreangchi i vui khrairei amtym ai nai pei ai nai adeu.Ref 7.5: AA 12.7, 13.15, 15.18, 17.8
6 “Naibaly Tameuh my hina nai kamta thui i, ‘Nangmy i kangpreangchi ly ami i pri y saneng chungvai palyhrei awm ai i, nichi ai miseaung palawn iy ana py ana ai.Ref 7.6–7: AA 15.13–14
7 Naibaly nichi ai miseaung palawn ai nai chengchi ai ly kaimy chih ai, naibaly hunai bo y nichi ly theu ai i, hini meingtym y kai i kalop sa ai, nanai thui.Ref 7.6–7: AA 15.13–14
8 Naibaly mymy ly ni teng y lengkhym takip ai nai leu maikawm khai. Hunaibaly Abraham ly Isaka ai sa i, kani tajarei kha y lengkhym takip: naibaly Isaka ly Jakob ai sa; naibaly Jakob ly cheng holai nyhreichi i amsi sangumchi ai sa bo.Ref 7.8: AA 17.10–14, 21.2–4, 25.26, 29.31—35.18
9 “Naibaly cheng holai nyhreichi i amsi sangumchi my Josepha ai ly keng i, Aikupta pri y jo vui; na i py Tameuh my mymy teng y awm hai i,Ref 7.9: AA 37.11, 28, 39.2, 21
10 mymy i patang naira bawibawi y lawi hai jojo: Aikupta pri i samrang Pharaoa ai py tamen hai i, khumi cheng parai nanai py pany hai; hunaibaly mymy ai ly Aikupta pri hawi mymy i yhm y awm nai khumi bawibawichi i tlang tleaung y krykeung y palawn bo.Ref 7.10: AA 41.39–41
11 “Naibaly Aikupta pri hawi Kanan pri bawibawi y ly takang theu i, khrikhri pa-rei patang naira tym bo; achi i amsi sangumchi py cha ai nai pipi ngo pajau y bo.Ref 7.11: AA 42.1–2
12 Na i py Jakob ly Aikupta pri y choh awm, nanai pany baly achi i amsi sangumchi ai pato; huni ly pato angchei nai ne.
13 Naibaly py-nyh pato nai khala y Josepha ly mymy i amjo amnauchi teng y mymy i satang thui pi; naibaly Pharaoa ly Josepha i cheng pany bo.Ref 7.13: AA 45.1, 16
14 Naibaly Josepha my ly taviu i my i ampo Jakob hawi, mymy i amjo amnau bawibawichi ai palau, nichi bawibawi ly vui saryh taja leaung pangrei awm.Ref 7.14: AA 45.9–10, 17–18, 46.27
15 Hunaibaly Jakob ly Aikupta pri y chei bo; naibaly mymy hawi achi i amsi sangumchi ly dei i,Ref 7.15: AA 46.1–7, 49.33
16 Sukem avang y ajeaung khrai, naibaly Abraham ly Sukem avang i Hamora i chapo teng y tangka y van nai angawm y nichi ai up bo.Ref 7.16: AA 23.3–16, 33.19, 50.7–13; Jos 24.32
17 “Naibaly Tameuh my Abraham teng y leu adeu nai tym ai nai neng kasa kha ly, Josepha ai pany y nai samrang takhraRef 7.17–18: Theu 1.7–8
18 awm nai khala y khrairei nichi ly Aikupta pri y peung ryh peung ryh i, nawi ryh nawi ryh bo.
19 Huni khumi ly achi i cheng ai ana paryp iy, achi i amsi sangumchi ai patang hai i, mymychi i chanau chymplei naichi ai heng y ai nai aphi hai veng.Ref 7.19: Theu 1.10–11, 22
20 Huna nai thym khala y ly Mosi ai tapen i, mymy ly khrikhri pa-rei mo hawi na, mymy ai ampo i yhm y lo thomrei pacho;Ref 7.20: Theu 2.2
21 naibaly ni ai aphi veng bo nabaly Pharaoa i chaniu my la iy, mymy i chapo palawn ai nai pacho bo.Ref 7.21: Theu 2.3–10
22 “Naibaly Mosi ai ly Aikupta pri khumichi i cheng naira bawibawi patiu i, mymy i leu y hawi atiti sa naira y py khrikhri pa-rei ham na.
23 Naibaly mymy ly saneng vui palyhrei awm nai khala y mymy i amjo amnau, Israela kangpreangchi ai de ai nai tau.Ref 7.23–29: Theu 2.11–15
24 Naibaly hunichi theung y khumi leaungrei ai patang hai nai niu i, mymy ai ama hai iy ana nai keung ai vawitheung tha nai Aikupta khumi ai pakhau bo.
25 Tameuh my ni i kiu y mymychi ai lawi hai nai ne, nanai amjo amnauchi my pany, nanai mymy ly dawn: na i py nichi ly pany y leang.
26 Naibaly khawn mang y mymychi theung i khumi leaung nyhrei ani nai thym khala y mymy ly nini teng y tym i, ‘Arengni awi, nangni ly amjo amnau chy bo; ati mana nai nangmyni tengtawi teng y parai nai sa hawi lawh mo?’ nanai aly hai ai nai tau.
27 Na i py ahawi i tlang tleaung y hawi y sa nai keung my ly Mosi ai nui vui iy, ‘Kaichi i tlang tleaung y nang ai krykeung hawi tara chih ai nai keung y ami my ang khai mo?
28 Jangdyh Aikupta khumi ai padei nai kamta kai ai py padei ai nai tau lawh a?’ napi.
29 Naibaly Mosi ly huni leu deaungkho y preang vui iy Midian pri y awm jo i, hu y ly chapo nyhrei sa bo.Ref 7.29: Theu 18.3–4
30 “Naibaly saneng vui palyhrei chi nai bo y Sinai mawi i daichi ka-vym y mai angveaung nai lymlo kangpho theung y kani pri i amtaw thau nai leaungrei mymy teng y amteng bo.Ref 7.30–34: Theu 3.1–10
31 Naibaly Mosi my niu baly mymy i atiti niu nai ly khri pa-rei rengrang tlai ly, napi; naibaly khen ai nai ahawi y chei nai thym khala y Areng i raawi my,
32 ‘Kai ly nang i amsi sangumchi i Tameuh ne, Abraham hawi, Isaka hawi, Jakob hawi nichi i Tameuh ly’ napi. Hunaibaly Mosi ly kaso theu i khen vam y bo.
33 Naibaly Areng my ly mymy teng y, ‘Nang i kheu i phainai ly aleng; nang i angdo naira ly meingtym kachai ne.
34 Aikupta pri y awm nai kai i khumichi i ngari patang nai sai ly kaniu bo mang, mymychi i tangam nai py kai ly thai jojo, kai ly mymychi ai palawi ai nai kang satla nai bo. Khen cham, nang ai Aikupta pri y kang pato ai,’ napi.
35 “Huni Mosi ai ly, Nang ai krykeung hawi tara chih ai nai keung y ami my ang khai mo? Na nai paka nai ly, lymlo kangpho y kani pri i amtaw thau nai ni teng y amteng nai my ly sabawm i, Tameuh my mymy kypkyp ai ly krykeung hawi lawi hai nai keung ne rau ai nai pato nai ne.Ref 7.35: Theu 2.14
36 Mymy ly Aikupta pri y hawi, Pangli Tui Kamsen y hawi daichi ka-vym y saneng vui palyhrei sala y py atiti rengrang hawi ka-ma-rachi patei veng iy, mymychi ai theu hai iy pahawi bo.Ref 7.36: Theu 7.5, 14.21; Kati 14.33
37 “Huni Mosi kypkyp ly Israela kangpreangchi teng y, ‘Tameuh my nangchi i amjo amnauchi theung i nai kai kamta amo leaungrei ai ang theu hai ai,’ napi nai keung ne.Ref 7.37: Leu 18.15, 18
38 Huni Mosi ly Sinai mawi y arum hai nai kani pri i amtaw thau nai hawi, achi i amsi sangumchi hawi daichi ka-vym y achu naichi theung y awm nai ne; mymy ly ang pei pateang ai nai Tameuh i leu kangheng nga nai keung ne;Ref 7.38: Theu 19.1—20.17; Leu 5.1–33
39 achi i amsi sangumchi ly mymy i leu tangai ai nai ngai y i, paka veng iy Aron teng y,
40 ‘Kaichi ai pahawi ai nai tameuhchi so pi kyh ba; hini Mosi, kaichi ai Aikupta pri i dengdairei pahawi nai keung i satang nai khy kaichi ly pany y veng bo,’ nanai mymychi i paleung ly Aikupta pri mang y dawn ali teang bi bo.Ref 7.40: Theu 32.1
41 Naibaly hunai thym khala y ly si cho myn sa nai, huni myn y ly apathyp iy mymychi i kiu i sa naira y amo theu bo.Ref 7.41: Theu 32.2–6
42 Hunaibaly Tameuh my hi pi vui i kani mang i ka-sichi ai chiu thai ai nai mymychi ai khen pi joja veng bo; amochi i cha-iu y,Ref 7.42–43: Amo 5.25–27
‘Israela chengchi awi, daichi ka-vym y saneng vui
palyhrei sala y tleh nai mawi hawi, apathyp naira
hawi kai ai talam a?
43 Nangchi ly Moloka i kanih yhm hawi,
tameuh Rephana i ka-si py chiu ai nai
Nangchi i sa nai mynchi ai syn u lawh:
Hunai deaungkho y Babulon avang palem mang y
kang la veng ai,’ nanai tajiu nai kamta ly,
44 “Mymy i myn niu nai ka-tawm sa ai nai Mosi ai thui pi nai keung i khai pi rym nai kamta ly, achi i amsisangumchi my daichi ka-vym y pany hai nai kanih yhm ly nga u bo;Ref 7.44: Theu 25.9, 40
45 huni teang achi i amsi sangum kangpreang bi naichi ly Cheng Takhrachi i pri nga ai nai athun nai thym khala y ly, Josua hawi vanrei kun hai; nichi ai ly Tameuh my achi i amsi sangumchi i mo y Davida awm khala y khrairei patheu jojo.Ref 7.45: Jos 3.14–17
46 Daivida my ly Tameuh i mei ka-niu y kawn naira nga i, Jakob i Tameuh i vui y awm naira sa pi ai nai hneiRef 7.46: 2 Sam 7.1–16; 1 Neng 17.1–14
47 Na i py Solomon ly mymy i vui yhm sa pi lawh;Ref 7.47: 1 Ar 6.1–38; 2 Neng 3.1–17
48 ati py ne sy Salo Kangteng my ly kiu y sa nai yhm y awm vai y; amo my ly hinai kamta thui i,
49 ‘Areng my ly, Kani ly kai i atehra ne,Ref 7.49–50: Is 66.1–2
Khaileaung ly kai i kheu amchymra ne,
Kai i vui yhm mani ka-tawm sa pi ai mo?
Kai i anawn naira meingtym py ati mo?
50 Hini ati cheaungkhang ly kai i kiu y sa nai ny y a? napi,’ nanai ne.
51 “Nangchi paleung katang hawi, paleung hawi kano takip y naichi awi, nangchi ly mana khala py Phailo Kachai ai paka jojo; nangchi i amsi sangumchi i sa nai kamta nangchi py sa u jojo.Ref 7.51: Is 63.10
52 Nangchi i amsi sangumchi my amochi theung y ano y nai ly ami awm mo? Khumi Kahawi jeu ai nai satang thui pi rym nai keungchi ai py nichi padei; ni ai ly patiu hai nai keungchi hawi, padei nai keungchi py vai nangmychi lawn u bo;
53 kani pri i amtaw thau naichi my pei pateang nai Reita nga veng iy patawm y pasi lawh naichi awi,” napi.
Stephana ai lengseaung hawi aphi u ka nai
54 Naibaly nichi ly huni leu thai iy paleung yh-i na i, mymy i tlang tleaung y ho akachai.
55 Na i py mymy ly Phailo Kachai my kawi i kani mang y khen jo iy, Tameuh i nang parai nai sai hawi, Tameuh i lamtang mang y Isu angdo nai py niu;
56 naibaly “Khen cham, kai ly kani am-eaung nai niu i, Tameuh i lamtang mang y Khumi i Chapo angdo nai py kaniu,” napi.
57 Na i py nichi ly athorei my aeu i mychi i kano atamym iy vanrei my ni teng y angpreng achu mang i, avang i dengdairei patheu iy lengseaung y aphi priu:
58 pany hai nai keungchi ly thawndeang leaungrei, amyn Sawla i kheu keung y mychi i kanih khai chupchup.
59 Hunaibaly Stephana ly, “Areng Isu awi, kai i phailo lo ba,” nanai palau nai thym khala y ly nichi ly lengseaung y aphi tliu siu na.
60 Naibaly mymy ly kheukhu di iy athorei my aeu i, “Areng hini nichi i kamngo sa nai ly nichi i tlang tleaung y aniu hai moh kyh ba,” napi. Naibaly huni leu thui pajau baly i veng bo. Sawla my py dei ai nai avo, napi.