16
Timothei ly Pawla nini Sila hawi vanrei abang nai
1 Naibaly mymy ly Derbe avang y hawi Lustra avang y py tym; naibaly khen cham, hu y amyn Timothei abangnai leaungrei awm, mymy ly ym nai Juda neampachy i chapo ne, na i py ampo ly Krik khumi ne.
2 Lustra hawi Ikonion avang y awm nai amjo amnauchi my ly mymy ai palo.
3 Pawla my ly ni ai mymy teng y hawi ai nai ngai; hunaibaly huni tengtang i Judachi deaungkho y ni ai lengkhym takip pi, ampo ly Krik khumi ne, nanai nichi ly pany be veng bo.
4 Naibaly nichi ly avang tleirei chei nai tarawi y Jerusalem i amtaw thau naichi hawi miteaung kehchi i leu pei nai ly patawm ai nai nichi teng y au bo.
5 Hunaibaly palau takhra kamkawmchi ly ym naira y khaw iy kani tleirei peung ryh peung ryh bo.
Troas y Pawla i paleung mei y niu nai
6 Naibaly Phailo Kachai my Asia pri y leu thui ai nai paka nai deaungkho y nichi ly Phrukia hawi Kalatia pri ly hi be bo;
7 naibaly Musia pri ahawi y tym iy Bithunia pri y kun ai nai tau u; na i py Isu i Phailo my pei y;
8 hunaibaly Musia pri ly katlen i Troas avang y kathiu bo.
9 Naibaly vum y Pawla ly amang kamta Makedonia pri i khumi leaungrei angdo iy, “Makedonia pri y angpeang ly, kaichi ai sabawm ba,” nanai takeng ryry nai niu.
10 Naibaly huni amang kamta atiti niu nai pajau baly kaichi Makedonia pri y chei ai nai tau praw i, mymychi teng y Satang Kahawi thui pi ai nai Tameuh my ang palau, nanai kaichi pany bo.
Philipi y Ludia ly ym nai khumi lawn nai
11 Naibaly kaichi ly Troas avang i dengdairei paleaung mang theu iy, kataw chei prei nai Samothraki avang y tym, naibaly khawn mang ly Neapoli avang y chei bi;
12 naibaly hu i dengdairei ly Philipi avang y chei: huni ly Makedonia pri i avang harei nai ne, huni ka-peang y ly avang aly len keh nai ne, Rom avangchi i angpyn nai avang ne; kaichi ly huni avang y ni awm nai kani kra kyh.
13 Naibaly kaichi ly Anawn Kani y ly apai pa-kho palem mang i tavo peang y chiu sa nai meingthym ne, nanai athang khai naira y chei; naibaly ateh i neampachy jeu achu naichi teng y leu thui pi.
14 Naibaly amyn Ludia, kanih kamsen jeaung jo nai keung, Thuatira avang i khumi, neampachy leaungrei ly kaichi i leu thui nai ly tangai bo, naibaly ni ai ly Pawla i leu thui nai patawm ai nai Areng my mymy i paleung paeaung bo.
15 Naibaly mymy hawi, my i dengtheaungchi hawi baptisma nga pajau nai kha y, “Kai ly Areng ai ym tatang, nanai nangchi athang khai baly, kai i yhm y ango u ba,” napi; naibaly mymy ly kaichi ai khrikhri pa-rei takeng i patawn bo.
Pawla nini Sila ly Philipi theaung y tla nai
16 Naibaly hina nai awm, kaichi ly chiu sa nai meingtym y chei nai thym khala y anglo leaungrei ami mo, vawinam i leung kawp nai hawi avum, ni ly leung kawp nai deaungkho y mymy i yhmkeungchi ai ly kamran neangneang nga hai.
17 Huni anglo ly Pawla kaichi ai hui iy, “Hini khumi paheng nai lam ang thui pi nai keungchi ly Salo Keh i Tameuh i miseaungchi na a hi ly,” nanai aeu.
18 Mymy ly hunai kamta kani kra parai nai sa. Hunaibaly Pawla ly paleung hawi y i, hi vui iy vawinam teng y ly, “Isu Krista i amyn y mymy i taku theung i dengdairei theu ai nai leu kang pei,” napi. Naibaly huna nai thym khyp khala y my theu ryp bo.
19 Naibaly yhmkeungchi ly mychi i kamran nga naira tama vui bo, nanai pany i, Pawla nini Sila ai patiu iy miteaung kehchi i mo y seng meingtym y ryh bo.
20 Hunaibaly tara chih nai keungchi teng y pahawi iy, “Hinichi ly Juda ne, achi i avang y khrikhri pa-rei khrukhra iy,
21 atiti reita thla mo achi kawn ai nai hawi patawm ngaungau y naichi patiu lawh ly, achi ly Rom amjy teu na iy,” napi.
22 Hunaibaly khumi mipuichi ly nini ai ni ai nai angthau, tara chih nai keungchi py nini i kanih theng pi pawn iy cheaungvawi y pakhau ai nai leu pei.
23 Naibaly nini ai neangneang pakhau nai bo y theaung y khai iy, typ nai keung teng y ly hawihai palai typ ai nai leu pei kheng;
24 huna tanrei leu pei nai deaungkho y mymy ly nini ai theaung sala katem i naira y paeung iy, nini i kheuy deaungki thiu hai thleng.
25 Na i py aneng hyh khala y Pawla nini Sila ly Tameuh teng y chiu py chiu sa, khulym py thui i, theaung tla naichi ly tangai u bo;
26 naibaly tlenrei khyh my kaleih khri pa-rei theu, hunaibaly theaung lengseaung leng nai mang y ahyn bo; katheu bawibawi py am-eaung praw iy, khumi leaung leaungrei i pakheng naira ly akheaung bebe veng.
27 Naibaly typ nai keung ly i nai anglaw iy, theaung katheu am-eaung nai niu i, theaung tla naichi ly tleaung pawn mi bo na i, mymy i haisau aphiu iy apadei ai nai tau.
28 Na i py Pawla my athorei my, “ati sai py aso moh; kaichi hi y awm angym bebe mang,” nanai aeu.
29 Naibaly typ nai keung my ly maiteaung palau hai i tlenrei my satla kathiu nai kun iy jei nai kaso theu naimy Pawla nini Sila i mo y ambeu; naibaly nini ai ly theu hai i,
30 “Arengni awi, hengra nga ai nai mana kasa ai mo?” napi.
31 Naibaly nini my ly, “Areng Isu ai ym, hunaibaly nang hengra nga ai, nang hawi nang i dengtheungchi py,” napi.
32 Naibaly nini ly mymy teng y hawi, mymy i yhm y awm nai bawibawichi teng y py Areng i leu thui pi.
33 Naibaly huni vum y huna nai thym khyp khala y my nini ai pahawi iy pakhau nai tamo ly sawp pi pan; naibaly mymy hawi mymy i dengtheungchi bawibawi py baptisma nga praw ryp.
34 Naibaly mymy i yhm y nini ai pahawi kalau iy, cha ai nai pawi pi, naibaly Tameuh ai ym nai deaungkho y mymy hawi mymy i dengtheungchi bawibawi py khri pa-rei amo theu parai bo.
35 Naibaly kani si iy tara chih nai keungchi my ly, “Huni khumi nini ai patheu,” napi ai nai khumi patiu nai keungchi ai pato.
36 Naibaly theaung typ nai keung my ly Pawla teng y, “Tara chih nai keungchi my ly, ‘Theu hawi sy,’ nanai khumi ang pato; hunai deaungkho y theu hawi ly, paleung awmnem naimy tako hawi ba,’ napi.
37 Na i py Pawla my nichi teng y, “Kaini ly Rom khumi nai iy, sum y naimy kaini ai khumi humchi i mei ka-niu y ang pakhau nai, theaung y ang khai lawh nai iy, vai ly kangviu y pathau ai nai tau u lawh a? Ny y leang; mymychi kypkyp my jeu u sy ly, kaini ai patheu u sy,” napi.
38 Hunaibaly khumi patiu nai keungchi my huni leu ly tara chih nai keungchi teng y thui pi, Naibaly nini ly Rom khumi ne, nanai thai i jei u bo;
39 naibaly chei u iy hawihai parawi i patheu bo, avang i dengdairei tako vui ai nai nini ai takeng.
40 Naibaly nini ly theaung i nai theu hawi iy Ludia i yhm y kun bo; naibaly nini ly amjo amnauchi hawi avum hawi i, nichi ai paleung awm hai nem iy chei hawi bo.