11
Jerusalem palau takhra kamkawmchi ai Petera my satang thai hai nai
1 Nabaly Judai pri y awm nai amtaw thau naichi hawi, amjo amnauchi my ly Cheng Takhrachi py Tameuh i leu patawm bo, nanai thai bo.
2 Hunaibaly Petera ly Jerusalem y tym kalau bo nabaly lengkhym takip naichi my mymy teng y,
3 “Nang ly lengkhym takip y naichi teng y lyn iy cha lawh ly,” napi nai preng.
4 Na i py Petera my ly pakeung i dengdairei ka-thui naimy nichi teng y thui pi pachai i,
5 “Joppa avang y chiu kasa, naibaly atiti mo katahm i atiti pawm, kanih len parai nai kamta taki palyhrei y thang iy, kani mang i dengdairei abang kathiu nai amang kamta kaniu:
6 huni ly kai i ahawi y my ang tym; naibaly huni ly kai khen ryry nai adawn veangveang i khaileaung pri i mawi kheu palyhrei awm naichi hawi, daichi mawichi hawi, avah naichi hawi, salo mang i tavochi py kaniu.
7 Naibaly raawi ly,’ Petera, angthau tleh ly, cho,’ ang napi nai kathai.
8 Na i py kaimy ‘Areng, ny y leang: chai y nai hawi amso ngai nai ly kai i labeaung y kun vai y leang,’ kanapi.
9 Na i py kani mang i dengdairei raawi tlen nyhrei naira y ly, ‘Tameuh my pachai chum nai bo y ly nang ly chai y ti moh,’ nanai ang pathang.
10 Hunai ka-tawm ryry naimy tlen thomrei awm; naibaly ati cheaungkhang kani mang y abang kalau ali teang bi bo.
11 “Naibaly khen cham, khumi leaung thomrei, Kaisari avang i dengdairei kai teng y ang pato naichi ly kai i awm naira lyum y angdo bo.
12 Naibaly phailo my ami ai py patle y naimy mychi teng y abang ai nai kai ai leu pei. Hini amjo amnau leaung tariurei naichi py abang teang i, huni khumi i yhm y kaichi kun;
13 naibaly ni my ly kaichi teng y mymy i yhm y kani pri i amtaw thau nai angdo nai ai niu nai sai hawi, kani pri i amtaw thau nai ly mymy teng y, ‘Joppa avang y khumi pato ly, Simon, amyn ka-reu Petera napi nai ai ly hawi ba; ni my ly leu ang thui pi ai i,
14 huni leu ly nang ai hawi, nang i dengtheung bawibawichi ai py hengra nga hai ai,’ nanai py ang thui pi.
15 Naibaly kai ly leu thui amteaung khala y Phailo Kachai ly achi i tlang tleaung y ang tym angchei nai khala i kamta ly, mymychi i tlang tleaung y py tym bo.
16 Naibaly Areng i leu, ‘Johan my ly tui hawi baptis sa ly, na i py nangchi ly Phailo Kachai y baptisma nga ai,’ napi nai sai ly kai pany vau bi bo.Ref 11.16: Ataw 1.5
17 Hunaibaly ‘Areng Isu Krista ai achi ym bo nabaly Tameuh my achi teng y atiti pei nai ly nichi teng y py pei teang nai bo y ly, kai nai Tameuh ai mana ei pajau ai a?” napi.
18 Nichi ly huna nai leu thai khala y ly sai py tlau y i, “Hunaibaly Tameuh my Cheng Takhrachi ai py hengra nga ai nai uikhei ai nai pei teang nai bo to,” nanai Tameuh ai palo bo.
Antiokei i palau takhra kamkawm
19 Naibaly Stephana molam y ana nai ahei naichi ly Phawiniki pri hawi, Kupra tlawn py, Antiokei avang y tym pa-rei chei iy Judachi teng y harei ny y baly ami teng y py leu thui y.Ref 11.19: Ataw 8.1–4
20 Na i py mymychi theung y phyreichi ly Kupra hawi Kurini khumichi ne, hunichi my ly Antiokei avang y tym iy Krikchi teng y py leu thui i, Areng Isu i satang thui pi teang bo.
21 Naibaly Areng i kiu my mymychi ai sabawm i, khumi neangneang ym iy Areng mang y hi lengleang.
22 Naibaly mymychi i satang ly Jerusalem y achu nai palau takhra kamkawmchi i kano y kun iy, nichi ly Bernaba ai Antiokei avang y khrairei pato bo.
23 Naibaly mymy hu y tym nai khala y ly Tameuh i pahenra niu i khri pa-rei kawn na, nichi bawibawi ai Areng ai hawihai palai amkhaw cheng ai nai pachei;
24 mymy ly khumi kahawi ne i , Phailo kachai hawi ym naira kawi nai ne. Naibaly khumi neangneang Areng ai ym panawi bi bo.
25 Naibaly Barnaba ly Sawla ai hau ai nai Tarsa avang y chei i, mymy ai niu baly Antiokei avang y hawi bo.
26 Naibaly nini ly sanengrei cheng cheng palau takhra kamkawmchi hawi achu jojo i, khumi neangneangchi ai py patiu teang. Antiokei avang y ly abangnaichi ai Kristian, nanai amyn pathi manme nai ne.
27 Naibaly hunai thym khala y ly Tameuh i leu thui nai keung amichi mo Jerusalem i dengdairei Antiokei avang y chei kathiu.
28 Naibaly mymychi theung y leaungrei, amyn Akaba napi nai ly angdo iy, khaileaung pri verei y khrikhri pa-rei takang theu ai, nanai phailo my thui pi nai ly thai hai; huni ly klawdia my peang nai thym khala y tym.Ref 11.28: Ataw 21.10
29 Hunaibaly abangnaichi leaung leaungrei ly mymy i kamjau ryrei Judai pri y awm nai amjo amnauchi teng y sabawm nai pa ai nai tau;
30 huni ly sa tanga i, Barnaba nini Sawla i kiu y krykeungchi teng y pa u bo.