1 Acui caan hrawngah Siangpahrang Herod ni Pawlpi sungtel hrekkhat hrem hngai hram a thawh. 2 Johan ih upa Jeim cu ralreen in a thah sak hngai. 3 Acucu ni Judahpawl an lung a awi sak hngai ti a hmuh tikah Piter khaw a pon sak hngai rih. (Ahihi Colphulhlo Sang Puai lio ah a ii.) 4 A ponngah tikah thawng ah a thla ih, Lontak puai hnukah mipi hemih suahpi khaitia in, ralkap buur li ih Žhenmi buur pi a kilsak hngai. 5 Piter thawng ih an thlak lio ah Pawlpi ni amah caah tiakpi in Pathian hemah thla an cam.

6 Herod ni a suah sak thok rangan zan rori ah, Piter cu thir hreng pahnih in an khuah ih ralkap pahnih lalakah a me. A kiltule cu sangka hmala ah dingin thawnginn cu an kil langlang. 7 Rinlopi ah Bawipa ih vanmi pakhat a langih khaan zate sung cu khuatle ni a tlet. Piter ih naak cu beengin a Žhangih, “Hang tho lohli,” tiah a ti. Culeh hrengpawl cu a kutngel in an tla. 8 Vanmi ni, “Na tavai vai la na kedaap daaptia,” tiah a ti. Piter ni a cuti cun a vua. Cutikah vanmi ni, “Na angkithuah khawhtia in ma zul,” tiah a ti. 9 Piter ni pawnla ah suakin a zul; ihmansela vanmi ih bonnak cu a ngaingai a ik a tiahthiam lo; lansaknak hmu ah a ruat tia. 10 Thawnginn kiltu pakhatnak leh pahnihnak an lon hnukah khuapi sung luhnak thir kotka hmala ah an suak. Kotka cu amah thu in an caah a hongtia, culeh an suakih lam tluan an vah lio ah vanmi ni a mata lohli. 11 Cutikah Piter cu a lung a tiimih, “Bawipa ni a vanmi thlah in Herod ih kut leh Judahpawl ih ma phiarhrual khaihnak hmawhhmawh in a ma rungsuak ti a tu fiang ing ee,” tiah a ti. 12 Acucu a tiahthiam ngah vete in, mi tlungpi khawmtia ih thla an cam rero nak, Johan, a min pace Marka a imi, ih nu Mari ih inn ah a tat. 13 Pawnla kotka a kin tikah Roda timi hemomnu ni kotka hong dingin a pha. 14 Piter ih aw a ik a tiahthiam ih a lung a awi tuk ruangah, kotka hong loin, inn sung ah a vong zuangih Piter kotka ah a ding tiin a than. 15 Anmimi ni, “Na aa herawn,” tiah an ti. Ihmansela ani ni cu Piter a i kau tiin a Žang reuri. Anmimi ni, “A vanmi itu pang!” tiah an ti. 16 Aculioah Piter ni kotka cu a kin peh berbo; culeh an hon tikah amah an hmu ih an don a har. 17 Daite ih om dingah a kut a tehthawi hngai, culeh Bawipa ni khawti in thawng sung in a suahsak ti a sim hngai. Cun, “Hihi Jeim leh unaupawl sim uh law,” tiah a ti hngai. Cuhnukah mata hngai in hmun pace ah a tat. 18 Mawla a phat tikah cun, Piter itu a cang timi thu ah ralkaple cu zokzakloin an buai. 19 Herod ni a hrawlih hmuh ngah lo tikah a kiltule cu thu hliakhlai hngai in a thah sak hngai. Cuhnukah Jerusalem in Sisaria ah a hang Žumih acunangah a caamta.

20 Herod cu Tai-ar leh Sidon khuamipawl parah a thin a sia ngaite. Curuangah a hemah a buur in an tat; Siangpahrang ihkhun kiltu Blastas cu anmah Žan hngai dingih an sawm ngah hnukah, remdaihnak an dil, icatile an ram cu Siangpahrang ih ram ah pur an sum bil. 21 Tiammi ni ah Herod cu a Siangpahrang thuam sinthlaitia in, toŽhiang ah a to ih mizapi hemah thu a sim. 22 Mipi ni, “Minung aw a i lo, Pathian aw a ii,” tiah an au berbo. 23 Culeh, Pathian a sunparsak lo ruangah Bawipa ih vanmi ni tiakin a vua lohli, cun sangkhut ni an aw ih a thi. 24 Mi ni Pathian thu an za deuhdeuh ih an zum miarmo. 25 An rian an uh ngah hnukah Barnabas leh Saul cu, a min pace Marka a imi Johan hruaitain Jerusalem in an kirŽhan.