11
1 Lebanon e, na a chyinghka ni hpe hpaw tawn u,
shaloi, wan gaw na a arit hpun ni hpe hkru kau lu nga ai!
2 Marau hpun ni e, hkrap ai hte sharung shayawt nga mu-
arit hpun ni kadawng mat sai;
dai shingkang rawng ai hpun ni hten mat sai!
Bashan wamyi hpun ni e, hkrap ai hte sharung shayawt nga mu-
maling dinggram kran kau nga sai!
3 Mung up salang ni jahtau let yawn ma ai;
shanhte a hpung shingkang htum mat manu ai!
Hkanghkyi ni a shabam ai nsen hpe madat u;
Yawdan hka mayan hku na shanhte a maling nta hten za mat sai!
4 Dai Madu nye a Karai Kasang gaw ngai hpe, ?Sat na matu rem da ai sagu hpung a sagu rem amu galaw nga u.
5 Madu ni gaw dai ni hpe sat ti mung ari hkrum na mara ai n rai. Shanhte gaw dai shan dut nhtawm, ?Dai Madu hpe shakawn kungdawn mu! Anhte sut su saga ai!,? ngu nna tsun ma ai. Tinang a sagu rem ai ni pyi shanhte hpe matsan dum nga ma ai n rai,? ngu nna tsun wu ai.
6 (Dai Madu gaw, ?Ngai gaw ginding aga ntsa na masha kadai hpe mung galoi mung n matsan dum na nngai. Ngai nan amyu masha ni hpe shanhte a mung up du ni a lata hta ap kau na mawe ai. dai mung up du ni gaw ginding aga hpe jahten shaza kau na mara ai; shanhte a lata kaw na ngai hkye hkrang la na nngai n rai,?) ngu nna tsun wu ai.
7 Sagu ni hpe dut mari ai ni gaw ngai hpe saw shaga ma ai; dai rai nna ngai gaw sat na matu san da ai sagu ni hpe rem ai wa ngai tai nga nngai. Ngai gaw dawhkrawng lahkawng la nna langai mi hpe ?Myi man pa lam? kaga langai mi hpe ?Myit hkrum lam? ngu nna shamying nngai. Shaloi sagu hpung hpe ngai bau rem nngai.
8 Ngai hpe n dawng ai kaga sagu rem masum hpe n yu sharang lu ai majaw shanhte yawng hpe shata mi laman yeng seng kau nngai.
9 Dai hpang, ngai gaw sagu hpung hpe, ?Ngai gaw nanhte a sagu rem wa galoi mung tai sana n rai; si ai wa mung si mat nu ga; shamyit kau hkrum na wa mung shamyit kau ai hkrum nu ga; naw ngam nga ai ni mung shanhte shada da shaza hkat manu ga,? ngu nna tsun we ai.
10 Dai hpang, ngai gaw, ?Masha amyu baw ni yawng hte dai Madu tawn da ai ga shaka hpe run kau na matu ?Myi man pa lam? ngu shamying ai dawhkrawng hpe la nna shadaw kau nngai.
11 Dai rai nna, dai shani e dai ga shaka run kau hkrum nna, dut mari hkrum ai sagu ni ngai hpe azi yu nga ma ai rai nna, dai Madu tsun ai hte maren ngai galaw ai hpe shanhte chye nga ma ai.
12 Ngai gaw shanhte hpe, ?Nanhte myit sharawt myit yang, ngai hpe nye a shabrai jaw mi. Rai ti mung, n sharawt myit yang mung rai nu ga,? ngu nna tsun nngai. Dai majaw nye a shabrai hku nna gumhpraw sumshi ngai hpe jaw ma ai. Ref 11:12-13: Mat 27:9-10. Ref 11:12: Mat 26:15.
13 Dai Madu gaw ngai hpe, ?Dai ni hpe Nawku Htingnu sut dek hta tawn da u,? ngu nna tsun wu ai. Ngai hte ging dan ai manu rai nga ai ngu nna shanhte myit nawn ai dai shagrau sha-a ai gumhpraw sumshi hpe ngai la nna, Nawku Htingnu sut dek hta tawn da nngai.
14 Dai hpang, ?Myit hkrum lam? ngu nna shamying ai lahkawng ngu na dawhkrawng hpe ngai shadaw kau ai rai nna Yuda hte Israela a myit hkrum lam gaw daw hten mat nga ai.
15 Shaloi dai Madu gaw ngai hpe, ?Ndai aten manu n dan ai sagu rem wa a amu daw chyen ni hpe naw galaw u.
16 Nye a sagu hpung hpe bau rem na langai mi hpe san da ni ai, rai ti mung shi gaw jahten shaza kau na ngu jahkrit shama hkrum nga ai sagu ni hpe karum ai n rai; mat mat ai ni hpe hkan tam la ai n rai; machyi ai ni hpe shamai shatsai ya ai n rai, hkam kaja ai ni hpe ushat jaw ai n rai, shing rai galaw na malai hpum sau htum ai sagu shan shi sha nna, shanhte a lahkru ni hpe malawk kau ya na ra ai.
17 Dai manu n dan ai sagu rem wa gaw dingnye hkrum nga ai! Shi gaw shi a sagu hpung hpe kau da nga ai rai nna, hpyen majan gaw shi a daru magam n-gun hpe tsep kawp jahten kau na ra ai. Shi a lahpum nyui mat nna, shi a hkra maga na myi, kyaw mat na ra ai,? ngu nna tsun wu ai.