2
1 Rai ti mung nang chyawm gaw teng man ai makam masham hte myit hkrum ai lam hpe
hkaw tsun sharin shaga lu na rai ndai.
2 Asak kaba sai dingla ni hpe chyaru n len ai sha sadi na matu, temsi rai
nga na matu, mu mada chye na ya na matu
hte tinang hkum hpe hkang lu na matu
mung, teng man ai makam masham rawng
nga na hte, tsaw ra nna shakut sharang
ai lam hta hpring tsup kunghpan nga mu
ga mung sharin shaga u.
3 Dai hte maren, asak kaba sai gumgai ni mung, kam sham nna tara hkungga ai ni,
shatan nhkan ga n tsun ai hte chyaru
a mayam n tai ai sha mai kaja ai lam
sharin achyin chye ai ni rai lu mu ga,
nang shanhte hpe sharin shaga ya lu na
rai ndai.
4 Shing rai Karai Kasang a mungga gaw shatan nhkan n hkrum u ga, shanhte mung
tinang ni hta asak naw kaji ai hpawmi ni
tinang a madu wa hte kashu kasha ni hpe
tsaw ra ai,
5 Sumnung shingdi nna sari sadang rawng ai, san seng ai dinghku num kaja tai
nna tinang a madu wa hkang ai hku hkan
ai ni rai lu na matu sharin shakyang
ya lu na ma ai.
6 Dai hte maren shabrang ni mung, tinang hkum hpe hkang nna sari sadang hte nga
mu ga, shadum shahprang nga u.
7 Lam shagu hpe galaw gun hpai ai lam hta, nang hkum nan kaja ai kasi ningli tai
nga u. Myit malang ai hte grai laja
lana ahkyak shatai ai hku shadum sharin
u.
8 Na a hpyen ni gaw nanhte hpe hpa lam hta mung mara n mu tam ai majaw kaya
hkrum mu ga, nang gaw masha ni a mara
shagun n hkrum hkra teng man ai ga ni
hte shadum sharin nga u.
9 Mayam ni gaw tinang a madu a npu e taw nga nna lam shagu hta shanhte kaw
myi man pa lu hkra ga nhkap n tsun
ai hte,
10 lagu masun la ai baw n galaw mu ga. Shing rai na malai, shanhte gaw galoi
mung kaja reng ai hte kangka sadi dung
ai ni re ai lam madun dan lu na rai ma
ai. Ndai lai ladat hku nna, shanhte gaw
tinang galaw ai lam nga manga hta anhte
a hkye hkrang la ai Karai Kasang a
mungga a ningja hpe shapraw shadan dan
lu na rai ma ai.
11 Hpa majaw nga yang, Karai Kasang gaw masha amyu yawng hpe shi a hkye hkrang
la ai chyeju shapraw shadan dan nu ai.
12 Anhte gaw anhte a galu kaba ai Karai Kasang ngu ai hkye hkrang la ai Madu
Yesu a hpung shingkang dan pru na a lu
ai nhtoi hpe ala nga let, tara n hkungga
ai myit hte mungkan ga hpe marin marit
ai myit hpe kabai kau na matu mung,
13 sari sadang hte si si rai nga na lam, ding hpring nna tara hkungga ai asak
hkrung lam hte ndai mungkan hta nga
pra na matu mung, dai chyeju tara gaw
anhte hpe sharin ya nga ai.
14 Anhte hpe tara tawt lai ai n hkru n kaja ai mara yawng mayawng hta na hkye hkrang
shaw la na matu mung, anhte gaw myit
masin san seng nna shi hte chyu sha seng
ai amyu tai let, kaja reng ai magam bungli
galaw na myit katu sharawng ai amyu tai
na matu mung, Hkristu gaw anhte a matu
mara shi hkum dai hpe ap ya kau nu ai.
Ref 2:14: Trj 7:6; 26:18; Ehp 2:10; 5:2;
1Tm 2:6; Heb 9:14.
15 Nang gaw ndai lam ni hpe hkaw tsun sharin shaga u. Nang n-gun jaw shadum shahprang
sharin shaga ai shaloi nang lu ai ahkang
aya nga manga jai lang u; kadai mung nang
hpe n gawn n sawn, n yu kaji mu ga.