TIMOHTI KAW SHAGUN DAT AI LAIKA LAHKAWNG
(2 TIMOTHY)
Ga Nhpaw
Timohti kaw shagun dat ai Pawlu a Laika Lahkawng hta lawm ai lam ni gaw malawng maga Pawlu shi a asak naw kaji ai magam gun manang mung rai, shingdep shingtau mung rai re ai Timohti hpe hpaji jaw ai lam ni rai nga ai. Ndai laika hta madung dat nna ka dat ai lam gaw, hkam sharang ra ai lam re. Hkrum sha nga ai nni nkri hte nhtan shai ninghkap ai ni yawng a man e, Yesu Hkristu a lam sakse hkam ai amu hpe matut nna kangka ai hte sakse hkam nga na hte dai Kabu Gara Shiga hte Ga Shaka Dingsa a sharin shaga ai lam hpe ngang ngang kang kang hkam la let sharin achyin ya ai sara hte Kabu Gara Shiga hkaw tsun gat hkai hkawm ai sara lit hpe atsawm sha gun hpai na matu Timohti hpe hpaji jaw shatsam dat wu ai.
Bai nna, ?Masha hpe mai kaja ai lam n shabyin ai, madat la ai ni hpe hten run ai lam shabyin shangun ai machye machyang rawng nna angawk angak nga ai ndang kalang ga tsun shaga ai,? hta shang lawm ai hkrithpa lam ni hte seng nna alak mi Timohti hpe sadi jaw da nga ai.
Ndai lam ni mahkra hta, laika ka ai wa a asak hkrung lam hte yaw shada ai lam, shi a makam masham, myit galu hkam sharang ai, tsaw ra ai, shakut sharang ai hte zingri zingrat a majaw nni nkri hkrum ai lam ni hpe Timohti kasi ningli la na matu shadum dat ai.
1
1 Karai Kasang a myit ra ai hku hte, maren Hkristu Yesu a kasa tai nna Hkristu Yesu hte langai sha tai nga ai a marang e anhte lu la na ga ndat hte seng ai asak a lam shana shabra na matu shangun dat hkrum ai ngai Pawlu gaw, nye a tsaw ra ai ngai sha Timohti hpe ga shana dat nngai.
2 Kawa Karai Kasang hte anhte a Hkristu Yesu gaw nang hpe chyeju matsan dum ai hte ngwi pyaw lam jaw ya u ga law.
3 Nye a ji wa ni galaw ai zawn, san seng ai myit hte ngai daw jau nga ai Karai Kasang hpe ngai shakawn nngai. Ngai gaw shani shana akyu hpyi ai hta nang hpe galoi mung adum nga let Karai Kasang hpe chyeju shakawn nga nngai.
4 Na a myi prwi ni hpe ngai dum ya nga nngai rai nna ngai hta dai kabu gara ai hte hpring tsup wa u ga, nang hte hkrum lu na matu ngai grai myit n dawt nga nngai.
5 Nang gaw na a nwoi dwi Lui hte na nnu Uni yan hta shawng rawng ai baw n sawt ai makam masham nang hta mung rawng nga ai hpe ngai dum nga nngai. Shanhte hta rawng ai baw makam masham gaw nang hta mung rawng nga na hpe ngai kam nga nngai.
6 Dai re ai majaw ngai nang hpe lata mara nna aya dang ya ai shaloi Karai Kasang kaw na nang hkam la sai chyeju kumhpa hpe ahkrung nga shangun na matu nang hpe ngai bai shadum dat de ai.
7 Hpa majaw nga yang, Karai Kasang anhte hpe jaw ai Wenyi e, anhte hpe hkrit agam ai myit jaw mi ai n rai; Dai Madu a Wenyi gaw anhte hpe n-gun atsam, tsaw ra myit hte tinang hkum hpe hkang la lu ai myit she jaw mi ai.
8 Dai rai nna anhte a Madu a matu sakse hkam ai hta hkum kaya nga u; bai nna Hkristu a jaw e bawng dung ai wa nye a majaw mung hkum kaya nga u; shing rai na malai, Karai Kasang gaw nang hpe n-gun lagaw jaw da nit dai hte maren, dai Kabu Gara Shiga a jaw e nni nkri hpe hkam sharang u. Ref 1:8: Rom 1:16; Hpl 1:7; Kol 1:24; 1Tm 2:6.
9 Karai Kasang gaw anhte galaw sai mai kaja dum ai amu bungli lama ma a majaw n rai, shi nan a yaw shada ai lam hte chyeju a majaw anhte hpe hkrang la nna shi a amyu masha tai na matu shaga la mani ai. Shi gaw mungkan nnan lat ai ten a shawng kaw nna Hkristu Yesu a marang e dai chyeju anhte hpe jaw da mani ai.
10 Rai ti mung ya gaw, anhte a hkye hkrang la ai Madu Hkristu Yesu du sa ai aten e, dai lam anhte hta shadan dan dat mani ai. Shi gaw si hkrung si htan a atsam hpe yeng seng kau nna, dai Kabu Gara Shiga hku nna n si n mat ai asak hkrung lam hpe shadan dan dat nu ai.
11 Dai Kabu Gara Shiga hpe shana shabra na matu Karai Kasang gaw ngai hpe kasa langai mi hku nna mung, sharin achyin ya ai sara hku mung, san da ni ai.Ref 1:11: Kas 9:15; Ehp 3:7-8; 1Tm 2:7.
12 Dai lam a majaw ndai nni nkri ru yak jam jau ni hpe ngai hkam jan nngai, Rai ti mung nye a kam hpa ai myit gaw ngai hta naw hpring chyat nga ai. Hpa majaw nga yang, ngai kadai wa hpe kam manoi nga nngai gaw ngai chye nga ai hte ngai hpe kam nna nye a lata hta ap tawn da sai dai Kabu Gara Shiga hpe tara jeyang ai Shani Nhtoi du hkra makawp maga mahkyu da ya lu ai n-gun atsam shi hta rawng nga ai ngu nna ngai myit mu myit hkut nga nngai.
13 Ngai nang hpe sharin ya ai teng man ai mungga hpe nang hkan sa na kasi kamang shatai let ngang ngang jum da nna, anhte Hkristu Yesu hte langai sha tai nhtawm asak hkrung ai hte seng ai makam masham hte tsaw ra myit hta ngang ngang jum manoi nga u.
14 Nang hpe kam nna ap ya da sai mai kaja ai arai ni hpe anhte hta shanu nga ai dai Chyoi Pra ai Wenyi a atsam hte a mahkyu nga u.
15 Nang chye nga ndai hte maren, Hpugelu yan Heramoge hte hpawn Asi kaji mung e nga ai ni yawng ngai hpe kau da mani ai.
16 Dai Madu gaw Onesihpuru a nta masha ni hpe chyeju jaw ya u ga, hpa majaw nga yang shi gaw law law lang ngai hpe myit n gun lu la shangun ni ai hta n ga, shi gaw ngai bawng dung hkrum nga ai hpe n kaya ai wa rai nga ai.
17 Shi gaw Roma mare du ai shaloi jang, ngai hpe n mu yang mu hkra hkan tam sagawn la ai.
18 Madu gaw shi hpe dai tara jeyang ai nhtoi hta matsan dum ai lam jaw ya u ga; Ehpesu mare e shi ngai hpe gade wa karum sai gaw, nang atsawm sha chye nga ndai.