TIMOHTI KAW SHAGUN DAT AI LAIKA LANGAI
(1 TIMOTHY)
Ga Nhpaw
Timohti gaw Asi kaji mungdan kaw na Hkristan ramma langai mi rai nna kawa gaw Grik, kanu gaw Yuda amyu rai nga ai. Shi gaw kasa Pawlu kaw hkan nang nna sasana magam bungli hta shingdep shingtau re ai wa mung rai nga ai. Timohti kaw shagun dat ai Pawlu a Laika hta lam masum hpe madung dat nna ka dat ai hpe mu lu ai.
Langai ngu na hta:- hpung kata e shut ai hku sharin shaga ai ni hpe sadi jaw ai lam re. Ndai shut ai hku sharin shaga ai lam gaw, ndai myi hte mu lu ai mungkan gaw n hkru n kaja nga ai rai nna masha langai mi hkye hkrang la hkrum na matu laklai nna yak la ai hte sung ai machye machyang lu la ra ai hta n ga, lusha nkau mi hpe koi gam ra ai, dinghku n mai de ai, ngu ai hta madung dat ai makam masham rai malu ai. Lahkawng ngu na hta:- Hpung up hkang lam hte nawku daw jau ai lam, bai hpung woi ni hte shingdep shingtau rai nga ai ni hta nga ra ai arawn alai lam re ai ni hte seng nna matsun da ai lam ni rawng nga ai.
Hpang jahtum Timohti gaw Madu Yesu a kasa langai mi kaning rai tai ra ai lam hte kam sham ai Hkristan hpung masha hpan amyu myu hpe woi awn ningbaw ningla galaw na lit hte seng ai hpaji jaw ai lam ni rai nga ai.
1
1 Anhte a hkye hkrang la ai Karai Kasang hte anhte a myit mada shara rai nga ai Madu Yesu a marang e, kasa rai nga ai ngai Pawlu gaw,
2 dai makam masham hta nye a kasha majing rai nga ai Timohti hpang de laika ka dat nngai. Kawa Karai Kasang hte anhte a Madu Yesu Hkristu kaw na chyeju, matsan dum ai hte ngwi pyaw ai gaw nang hta anga nga u ga law.Ref 1:2: Kas 16:1; 1Ko 4:17; Hpl 2:19; 2Tm 1:2.
3 Ngai Makedoni mung de sa wa ai shaloi e, nang hpe ngai htet da sade ai hte maren Ehpesu mare e nang hpe matut nna nga nga shangun mayu nngai; dai yang e masha nkau mi shut ai makam masham lam ni hpe sharin ya nga ma ai, dai hpe nang shazim jahkring kau lu na rai ndai.
4 Kaja wa n mai byin ai matsun maroi maumwi ni ji woi ji wa ni a ginru ginsa sagawn ai lam hpe galu galang tsun gawn ai lam ni tawn kau na matu shanhte hpe tsun u. Dai lam ni gaw ga li ga law ndang kalang lam hpe sha shapraw nga ai rai nna dai makam masham hte sha chye lu ai Karai Kasang a shatawng shada da ai lam hpe n shabyin lu nga ai.
5 Ndai hkang da ai ga a shatawng shada ai lam gaw, san seng ai myit kaw na pru ai dum chye ai htauli htaula myit hte sawt ai lam n lawm ai makam masham kaw na pru wa ai tsaw ra myit hpe sharawt ya na matu rai nga ai.
6 Masha nkau mi gaw dai lam ni kaw nna yit mat wa nna, angawk angak re ai akyu n rawng tsun bawng dangrang hkat ai lam ni hta shanhte a lam shamat kau manu ai.
7 Shanhte gaw Karai Kasang a tara hpe sharin ya ai sara ni tai mayu ma ai, rai ti mung shanhte gaw tinang nan tsun ai ga ni hpe mung, tinang nan hkrak jaw sai ngu grai kam ai myit hte tsun ai ginlam ni hpe teng sha nga yang n chye na ma ai.
8 Dai jep ai Tara gaw sun ang ai hku jai lang yang, mai kaja nga ai hpe anhte chye ga ai.
9 Kaja wa nga yang anhte a myit chye na da ra ai lam gaw; dai jep ai Tara gaw kaja ai masha ni a matu n rai; tara tawt lai ai ni hte si ging ai mara kaba lu ai ni, Karai kata ai hte yubak lu ai ni, nawku htung n hkan ai ni, makam masham shing n rai wenyi lam hta myit n lawm ai ni, tinang a kanu kawa ni hpe sat ai ni, masha sat ai ni a matu,
10 akyang lailen n kaja ai ni, num shada la shada nga sha ai ni, masha rim makoi nna gumhpraw hte shaw la shangun ai ni, masu nna n teng n man ai sakse hkam ai ni, shing n rai hpa hku hpa lam hku nna mung, dai teng man ai makam masham a sharin shaga ai tara hte nhtan shai ai ni a matu galaw da ai tara rai nga ai.
11 Dai sharin shaga ai lam gaw, hpung shingkang rawng nna a lu ai Karai Kasang kaw na Kabu Gara Shiga hte maren rai nga ai. Dai Kabu Gara Shiga hpe tsun ndau na matu Karai Kasang gaw ngai hpe ap da ni ai.
12 Ngai galaw gun hpai nga ai bungli a matu ngai hpe n-gun lagaw jaw ya ai anhte a Madu Hkristu Yesu hpe ngai chyeju dum shakawn nngai. Shi gaw ngai hpe ging dan ai wa re ai ngu nna sawn la nna shi hpe daw jau na matu san da hkrum ni ai majaw mung shi hpe chyeju dum shakawn nngai.
13 Ngai chyawm gaw lai wa sai ten hta Madu hpe n kaja ai hku mara shagun tsun shatan ai zingri zingrat ai hte roi asawng re ai wa rai nngai. Rai ti mung Karai Kasang gaw ngai hpe matsan dum nga ai; hpa majaw nga yang, ngai hta makam masham garai n rawng ai rai nna ngai hpa galaw nga ai hpe ngai n chye we ai.Ref 1:13: Yhn 9:34,41; Kas 3:14; 8:3; 1Ko 15:9.
14 Anhte a Madu gaw shi a n taw n tsang re ai chyeju nye a ntsa e ru jaw bun ya nna Hkristu hte langai sha tai nna asak hkrung nga ai majaw anhte lu la ang ai makam masham hte tsaw ra ai myit ngai hpe jaw ni ai.
15 Yubak kap ai ni hpe hkye hkrang la na matu Hkristu Yesu gaw mungkan ga de du sa ai nga ai ga gaw, tup hkrak hkap la nna kam sham ging ai teng man kangka re ai ga nan rai nga ai. Dai yubak kap ai ni hta ngai mahtang kaba htum ai wa rai nga nngai.
16 Rai ti mung Karai Kasang ngai hpe matsan dum la ai lam gaw, htawm hpang de Madu hpe kam sham nna htani htana asak lu la na rai nga ai ni yawng a matu mara kasi ningli langai mi tai nga u ga, Hkristu Yesu gaw ngai zawn re ai yubak lu ai ni hta sawng dik ai wa a ntsa e shi a myit galu hkam sharang ai hpe madun dan ai lam rai nga ai.
17 Ya htani htana Hkawhkam rai nna, n hten n mat chye ai hpe myi hte n mu lu ai, langai sha rai nga ai Karai Kasang kaw arawng sadang hte hpung shingkang gaw htani htana prat dingsa e anga nga u ga law! Amen.
18 Ngai sha Timohti e, lai wa sai ten hta nang hpe sha-ang nna htawn tsun ai myihtoi ga ni hte maren, galaw gun hpai sa wa na matu ngai nang hpe ahkaw ahkang ap ya de ai; atsawm sha gasat gala lu na matu dai myihtoi ni htawn tsun ai ga ni hpe laknak zawn jai lang nga u.
19 Dai hta n ga, nang hta makam masham hte asan sha re ai dum chye ai htauli htaula myit rawng nga u ga. Masha nkau mi dai dum chye ai htauli htaula myit e shadum ai hpe n madat ai majaw shanhte a makam masham hpe jahten shabya kau ma ai.
20 Shanhte ni hta Satan a lata de ap kau ai hku nna ngai ari jaw ai Humeni hte Alexandru ngu ai yan lawm ma ai. Shing di ai lam gaw, shanhte a masu matsa shatan nhkan ai lam jahkring kau mu ga, sharin ya na matu rai nga ai.