6
Numsha ni
1 Numsha ni hta grau tsawm htum ai jan e,
na a tsaw ra wa kade sa mat wa sata?
Nang hpe anhte tam karum ya lu u ga, na a tsaw ra wa gara lam hku
pru mat wa ai gaw, anhte hpe tsun dan mi.
Numsha
2 Nye a tsaw ra wa gaw balsam hpun tu ai shi a sun
de sa mat wa nu ai.
Shi gaw yam nga hpung hpe sun hta e ushat jaw nna
hka law pan ni hpe di shinggyin la nga ai.
3 Nye a tsaw ra wa gaw nye a matu rai nna ngai gaw shi a matu rai nga nngai;
shi gaw shi a yam nga hpung hpe hka law pan prang yang hkan e shayaw nga ai.
Lasha
4 Nye a nja jan e, nang gaw Yerusalem mare zawn tsawm htap nga nna;
Tiza mare zawn yu tsawm nga ndai,
dai hkik hkam ai mare ni zawn yu mau na daram rai nga ai.
5 Na a myi ni hpe ngai kaw nna kayin mat wa u,
dai ni gaw ngai hpe myit shajup da nga ai.
Na a kara gaw Gilead kawng lanem hkan e nga ai
bainam uhpung mi zawn ka manawt nga ai.
6 Na a awa ni gaw ya sha kashin kau ngut sai
sagu hpung zawn hpraw nga ai.
Shanhte hta na langai mung yet mat ai n rai,
shanhte yawng ra n rawng hkra bung ma ai.
7 Na a shabyi ni myi man magap a shingdu e htoi tu nga ai.
8 Hkawhkam wa gaw hkawhkam jan kru shi, lashi num matsat shi,
n dang hti hkra law ai num mahkawn ni lu u ga.
9 Rai ti mung, ngai gaw langai hpe chyu sha tsaw ra ai rai nna,
shi gaw hkrudu zawn tsawm htap nga ai.
Shi gaw shi hpe shangai ai kanu a shayi sha rai nna
kanu grai tsaw ra ai ma rai nga ai.
Numsha ni yawng shi hpe yu nna shakawn ma ai;
hkawhkam jan ni hte lashi num ni shi hpe mahkawn shakawn ma ai.
10 Jahpawt manap nhtoi zawn praw rai mada yu ai gaw kadai wa rai ta?
Shi gaw jan shata zawn htoi tu nga ai rai nna
tsawm htap ai hte kabrim nga ai.
11 Kadit e tu ai hkai bawng ni tu n tu,
sabyi ru ni lap prut n prut,
hkainu si hpun ni pu n pu, sa yu na matu
namsi sun de ngai yu wa nngai.
12 Hpyen majan a matu hpyen leng gawt ai wa zawn
tsaw ra myit a matu nang ngai hpe myit katu shangun nga ndai majaw ngai hkrit gari nga nngai.
Numsha Ni
13 Shulam numsha e, ka manawt u, ka manawt u.
Nang ka manawt ai hpe anhte mu lu u ga.
Numsha
Nanhte gaw masha ni jawm yu nga ai ka-ang e ngai ka manawt ai hpe
hpa majaw yu mayu myit ta?