7
(1Hl 17: 1-15)
1 Dai Madu gaw shi a gumlau hpyen ni yawng a lata na shi hpe shim lum hkra bau sin nga ai rai nna shi a hkawhkam htingnu e Hkawhkam Dawi nga nga wu ai.
2 Dai hpang hkawhkam wa gaw myihtoi Nahtan hpe, ?Yu u, ngai chyawm gaw marau hpun hte galaw ai nta hta rawng nga nngai; rai ti mung Karai Kasang a Ga Shaka Sumpu mahtang sumpan sum kata e rawng nga ai le!,? ngu nna tsun wu ai.
3 Nahtan gaw, ?Dai Madu nang hte rau rai nga ai majaw nang myit lu ai hte maren galaw u,? ngu nna htan wu ai.
4 Rai ti mung dai shana jang dai Madu gaw Nahtan hpe,
5 ?Nye a shangun ma Dawi hpe ngai tsun ai ga sa tsun su, ?Nang gaw ngai shanu nga na ngu ai nye a matu htingnu hpe gap ya lu ai wa rai na ndai n rai.
6 Israela amyu masha ni hpe Egutu mung kaw na ngai hkye mawai la ai shani kaw nna dai ni du hkra htingnu kata e ngai galoi mung n rawng yu nngai; sum kata e nga nga nna ngai kayin hkawm ni ai.
7 Israela amyu masha ni hte ngai htawt hkawm wa ai shara shagu hkan e, marau hte galaw ai htingnu nye a matu shanhte hpa majaw n galaw ya myit dai ngu nna Israela amyu bawsang kadai hpe mung ngai lit shatsam let, galoi mung n san yu nngai,?? ngu nna tsun wu ai.
8 ?Dai re ai majaw Chyahtum Chyalai N-gun rawng ai Ngai Madu nan shi hpe tsun ai ga, nye a shangun ma Dawi hpe tsun su, ?Nang gaw yi sun hkauna hkan sagu naw rem nga ai kaw na ngai nang hpe shaw la nhtawm, Israela amyu masha ni hpe up hkang ai du aya nang hpe jaw ni ai.
9 Nang hkawm sa ai shara shagu hkan, ngai nang hte rau nga nga nna, nang naw rawt lung wa yang pyi, na a gumlau hpyen ni yawng hpe ngai gasat dang kau ya nngai. Mungkan ga na galu kaba htum ai ningbaw ni zawn ngai nang hpe mying dan hkung galu kaba shangun na nngai.
10-11 Nye a Israela amyu masha ni a matu shara langai ngai san da nna, dai yang e shanhte shanu nga lu ai hte dip gamyet sha hkrum ai lam hpa mung n nga ai sha, shanhte nga lu na rai ma ai. Shanhte gaw ya du hkra ndai mung de shang nga ma ai rai nna n hkru ai masha ni e hkap gasat ai mung hkrum sha nga manu ai; rai ti mung dai gaw bai byin wa na ra ai n rai; na a gumlau hpyen ni yawng a lata na shim lum hkra bau sin na ga sadi ngai tawn da nngai; na a amyu masha ni hpe mung ngai jaw ya na we ai.
12 Nang si mat nna na a nji nwa ni hte rau lup makoi kau ai hkrum jang, na a shadang sha langai ngai hpe hkawhkam shatai ya let shi a mungdan hpe ngai shagrin shangang ya na we ai.Ref 7:12: Shk 89:3-4; 132:11; Yhn 7:42; Kas 2:30.
13 Shi mahtang she nye a matu htingnu gap ai wa rai na ra ai; shi a magam tingnyang hpe teng teng htani htana ngai shagrin da ya na we ai.
14 Ngai gaw shi a kawa tai nna shi gaw nye a kasha rai na ra ai. Shi shut hpyit ai amu galaw yang, kawa gaw kasha hpe ari jaw ai zawn shi hpe ngai ari jaw na we ai. Ref 7:14: Shk 89:26-27; 2Ko 6:18; Heb 1:5.
15 Nang hkawhkam tai lu hkra, Shawlu a lata kaw na ngai seng kau ai zawn shi hpe karum madi shadaw ai lam ngai dawm kau ya na we ai n rai.
16 Na a amyu matu mara ni tut nawng anga nga na mara ai; na a mungdan hpe htani htana agrin nga shangun na nngai. Na a magam tingnyang gaw galoi mung htum mat na ra ai n rai,?? ngu nna tsun wu ai.Ref 7:16: Shk 89:36-37.
17 Nahtan gaw Karai Kasang shi hpe tsun hpaw dan sai shingran ga magup, Dawi hpe tsun dan wu ai.
(1Hl 17:16-27)
18 Dai hpang Hkawhkam Dawi gaw dai Madu a hpung shingkang shanu nga ai Sum de shang dung nhtawm, ?Tsaw Htum ai Madu e, nye a matu nang galaw ya sai amu ni hpe sawn yu yang, ngai gaw manu dan la ai wa n rai nga nngai; nye a dinghku mung hpa n rai nga ai law.
19 Ti mung ya chyawm gaw dai hta n-ga grau nna pyi galaw ya nga ndai. Tsaw Htum ai Madu e, du wa na shaning ni hta pra sa wa na nye a amyu matu mara ni hte seng ai ga sadi ni hpe mung nang shagrin da ya nga nit dai. Tsaw Htum ai Madu e, nang gaw ndai lam mu shangun nga nit hka!
20 Ngai nang hpe hpa mi naw jat tsun lu na rai ta? Na a shangun ma rai nga ai ngai hpe nang chye nga ndai.
21 Ngai hpe sharin achyin ya na matu ndai amu kaba ni yawng nang galaw nit dai rai nna dai gaw na a myit ra ai hte yaw shada ai amu rai nga ai.
22 Tsaw Htum ai Madu e, nang gaw gade wa galu kaba nga n hka! Nang hte bung ai mi kadai n nga nga ai; nang chyu sha Karai Kasang rai nga ndai gaw anhte tut nawng chye da nga saga ai.
23 Na a amyu masha majing shatai na nga, shanhte hpe mayam shatai nga ai kaw na nang hkye mawai da nit dai, dai Israela amyu ni hte bung ai amyu baw kaga ndai ginding aga ntsa n nga nga ai. Shanhte a matu nang galaw dan sai dai galu kaba ai mauhpa amu ni gaw mungkan ting de na a mying ningsang dan hkung gumhkawng shangun nga sai. Na a amyu masha majing shatai la na nga, Egutu mung kaw na nang shalawt dat sai amyu masha ni rawt lung wa mu yang, kaga masha amyu baw ni hte shanhte a karai ni hpe nang gawt shapraw kau ya nga ndai.Ref 7:23: Trj 4:34.
24 Nang gaw Israela hpe htani htana na a amyu masha majing shatai la nga nit dai; dai rai nna Madu e, nang gaw shanhte a Karai Kasang tai nga nit dai.
25 ?Ya chyawm gaw, Madu Karai Kasang e, ngai hte nye a amyu matu ni hte seng ai nang shagrin da nit dai ga sadi hpe jahpring shatsup ya mi law; nang galaw na ngu nna tsun ai ga hte maren shadik ya e law.
26 Na a mying ningsang galu kaba wa nna amyu masha ni mung, ?Chyahtum Chyalai N-gun rawng ai Madu gaw Israela a ntsa e nga ai Karai Kasang rai nga ai,? nga nna htani htana atsun nga na rai ma ai. Nang gaw nye a magam tingnyang hpe ju majat prat janat shagrin da ya nga nu ga law.
27 Chyahtum Chyalai N-gun rawng ai Madu Israela a Karai Kasang e, na a shangun ma wa ngai hpe ndai lam yawng mayawng nang tsun hpaw dan nit dai. Nye a amyu matu ni hpe hkawhkam shatai ya na nga nna mung nang tsun nit dai majaw ndai akyu hpyi ga hte nang kaw akyu hpyi wam nga nngai law.
28 ?Ya chyawm gaw Tsaw Htum ai Madu e, nang gaw Karai Kasang rai nga ndai; nang gaw na a ga sadi ni hpe tut nawng shatup nga ndai rai nna ngai hpe mung ndai mauhpa ga sadi nang shagrin da ya nga nit dai.
29 Nye a amyu matu ni na a man e matut nna kabu gara lu mu ga, shanhte hpe shaman ya na matu ngai nang hpe hpyi nngai law. Tsaw Htum ai Madu e, ndai hpe nang ga sadi jaw nit dai rai nna na a shaman chyeju gaw nye a amyu matu ni a ntsa e htani htana tawn da ya nga nu ga law,? ngu nna hpyi wu ai.