4
1 Shawlu a kasha Ishboshet gaw Hebron mare e Abna sat kau hkrum sai lam hpe na ai shaloi, shi hkrit nga ai; Israela amyu masha ni yawng mung hkrit kajawng nga ma ai.
2 Ishboshet hta majan e htim hpya ai hpung ni a ningbaw ni rai nga ai du lahkawng nga nga ai; dai yan gaw Benyamin amyu bawsang ni nga ai Berot shara hta nga ai Rimon a kasha Bana hte Rehkab yan rai nga ai. (Berot gaw Benyamin lamu ga hta lawm nga ai.
3 Dai mare hta mi kaw nna nga ai masha ni gaw ya du hkra nga nga ai Gitim mare de hprawng mat wa ma ai.)
4 Shawlu a amyu matu hta na kaga langai mi gaw Shawlu yan Yonahtan sat kau hkrum ai shaloi asak manga ning kaba sai Yonahtan a kasha Mehpiboshet rai nga ai. Yezrela mare kaw na shan sat kau hkrum sai shiga du jang, ma hpe yu gawn ai jan mung shi hpe hta pawn la nna woi hprawng mat wa wu ai. Rai ti mung hprawng wa yang nau tin kau ai majaw shi hpe tat jahkrat kau ai hte ma mung lagaw hten mat wu ai.Ref 4:4: 2Sa 9:3.
5 Rehkab yan Bana gaw Ishboshet a nta de sa wa ma ai rai nna dai de shani ka-ang shi hkring sa la nga ai aten, jan pungding madi ai aten daram hta du shang wa ma ai.
6 Chyinghka lam e hkaulan mam katsap nga ai numsha gaw yup shamwi ai hte yup taw nga yang, Rehkab hte Bana yan mayun shang mat wa ma ai.
7 Dai hpang nhku kata de kalang mi bai sit shang wa nhtawm Ishboshet yup nga ai gawk kata de shang nna shi hpe sat kau ma ai. Shan mung shi a baw hpe daw la nhtawm dai hpe lang let shana tup dai Yawdan Kadit hku lai sa wa ma ai.
8 Shan gaw Hebron e hkaw dung ai Dawi hpang de dai baw sak jaw nhtawm shi hpe, ?Ndai gaw nang hpe sat na maw ai na a hpyen Shawlu a kasha Ishboshet a baw rai nga ai. Shawlu hte shi a amyu matu mara ni hpe matai dawp na matu dai Madu gaw dai ni nang Madu hkawhkam hpe ahkang jaw nit dai,? ngu nna tsun ma ai.
9 Dawi gaw shan hpe, ?Ru yak shoihpa lam shagu hta na ngai hpe hkye hkrang la ai dai ahkrung nga ai Madu hta ngai dagam shaka da nngai!
10 Ziklag mare na kasa langai mi ngai kaw sa nhtawm kabu hpa shiga tsun dan na nga myit nna Shawlu si mat sai lam ngai hpe tsun dan yu ni ai. Shaloi ngai shi hpe rim la nna sat kau we ai. Dai gaw shi tsun dan ai kabu hpa shiga a matu ngai shi hpe jaw ai kumhpa rai nga ai! Ref 4:10: 2Sa 1:1-16.
11 Shi a nta kata e yup nga ai dai ding man ai masha wa hpe n hkru ai masha ni sat kau ai gaw gade wa grau n kaja nga sahka! Shi hpe sat kau nga manit dai majaw ya ngai matai dawp na nngai; nan hpe ndai ginding aga kaw nna seng kau na mawe ai!,? ngu nna htan wu ai.
12 Dawi gaw shi a hpyenla ni hpe hkang dat ai hte Rehkab hte Bana yan hpe sat kau ma ai; shan a lagaw lata ni hpe kahtam daw la nna Hebron hka lawng makau e noi da ma ai. Ishboshet a baw hpe chyawm gaw shanhte la nna Hebron mare e Abna a lup hta lup makoi da ma ai.