7
1 Kiriat Yarim masha ni mung dai Madu a Ga Shaka Sumpu hpe la nhtawm bum ga e nga ai Abinadab mying ai wa a nta de dai hpe jashawn da ma ai. Shanhte gaw dai hpe yu hpareng na matu dai wa a kasha Eleaza hpe shachyoi shapra ap da ya ma ai. Ref 7:1: 2Sa 6:2-4; 1Hl 13:5-7.
2 Dai Madu a Ga Shaka Sumpu gaw Kiriat Yarim mare e hkun ning dang nga nga sai. Dai laman hte hta Israela masha ni karum la lam lu la na matu dai Madu kaw jahtau hkrap nga ma ai.
3 Samuela gaw Israela amyu masha ni hpe, ?Nanhte a myit kraw lawang mahkra hte dai Madu hpang de kayin wa myit dai rai yang, maigan hpara ni yawng hte karai num Astarte a sumla ni hpe yeng seng kau lu na rai myit dai. Nanhte nan dai Madu hta tsep kawp ap nawng nna shi hpe chyu sha nawku myit dai rai yang, Hpilisti masha ni a lata na shi nanhte hpe hkye mawai la na ra ai,? ngu nna tsun wu ai.
4 Dai rai nna, Israela masha ni gaw shanhte a Bala hte Astarte hpara sumla ni hpe yeng seng kau nhtawm, dai Madu hpe chyu sha nawku ma ai.
5 Dai hpang, Mizpa shara e jawm hkrum na matu Israela masha ni yawng hpe Samuela hkang dat nhtawm, ?Dai yang e nanhte a matu dai Madu kaw ngai akyu hpyi ya na nngai,? ngu nna tsun wu ai.
6 Dai rai nna, shanhte yawng mung Mizpa shara e zup hpawng ma ai. Hka loi mi hpe mung shanhte ja la nhtawm dai Madu a matu hkungga nawng ya ai zawn dai hpe ru hkaw ma ai; shing rai shani tup lusha gam ma ai. Shaloi shanhte gaw, ?Dai Madu hpe anhte shut kau saga ai law,? ngu nna tsun ma ai. (Ndai gaw Mizpa shara e Israela masha ni hpe Samuela tara dara ya ai lam rai nga ai.)
7 Israela amyu masha ni Mizpa shara e zup hpawng nga masai lam hpe Hpilisti masha ni na ma ai shaloi, shanhte hpe htim gasat na matu Hpilisti hkawhkam manga hte shanhte a masha ni hte rau rawt sa wa hpang ma ai. Israela amyu masha ni mung dai lam na jang hkrit ma ai rai nna,
8 Samuela hpe, ?Hpilisti masha ni a lata kaw na anhte hpe hkye la na matu dai Madu anhte a Karai Kasang kaw tut e akyu hpyi ya nga mi law,? ngu nna tsun ma ai.
9 Samuela gaw sagu kasha langai mi hpe sat nhtawm dai Madu a matu shagu hkungga shatai let hkum ting nat nawng wu ai. Dai hpang, shi gaw Israela hpe karum la na matu dai Madu kaw akyu hpyi wu ai hte maren dai Madu mung shi a akyu hpyi ga hpe htan ya wu ai.
10 Samuela gaw dai shagu hkungga hpe nawng nga yang, Hpilisti masha ni mahtang htim gasat na matu shawng de sit lung wa ma ai; rai ti mung hkring mi rai jang dai Madu gaw sumsing lamu kaw na mu gadu shangoi dat wu ai. Shing rai shanhte gaw tsep kawp kashuk kashak byin mat ai hte hkrit kajawng nna hprawng htaw mat wa ma ai.
11 Israela masha ni mung Mizpa shara kaw na pru nna Bethkara mare ganoi du mat wa hkra Hpilisti masha ni hpe hkan shachyut let shanhte hpe lam dingyang hkan sat kau ma ai.
12 Dai hpang, Samuela gaw nlung langai la nna Mizpa hte Shen lapran e jung tawn nhtawm, ?Dai Madu gaw lam htum hkra anhte hpe karum la mani ai,? ngu nna tsun wu ai. Dai rai nna nlung dai hpe ?Karum la Nlung? ngu nna shamying wu ai.
13 Dai rai nna Hpilisti masha ni sum mat ma ai rai nna Samuela ahkrung nga dingsa Israela a lamu ga hpe shanhte shang gasat la na hpe dai Madu ban shadang nga ai.
14 Hpilisti masha ni madu tawn sai Ekron hte Gat lapran na mare ni yawng Israela a lata de bai nhtang shang mat sai rai nna, Israela gaw mi na shi a lamu ga yawng hpe bai lu la nga nu ai. Israela amyu masha ni hte Hkanani masha ni a lapran e mung ngwi pyaw sim sa lam hpe tawn da nga ma ai.
15 Samuela mung Israela mung hpe shi hkrung nga dingsa up hkang nga ai.
16 Shi gaw shaning shagu Behtela, Gilgala, hte Mizpa shara hkan e kawan du hkawm nna tara dara ya wu ai.
17 Dai hpang, Rama mare na shi a dum nta de nhtang wa nhtawm dai kaw mung tara agyi amu wa galaw ya nga ai. Shi gaw dai Madu a matu tawn hkungri langai Rama mare e gaw da nga ai.