1 Shawlu gaw Hpilisti masha ni hpe sa gasat ai kaw nna bai du wa jang, Dawi gaw Engedi makau na nam mali hkan e nga nga ai lam sa tsun dan ma ai. 2 Shawlu gaw Israela hta na kaja htum ai hpyenla hkying masum woi nna, Dawi hte shi a masha ni hpe Aya Lunghkrung a sinpraw maga hkan e sa tam ma ai. 3 Shi gaw lam makau na sagu lawng nkau mi hte htep rai nga ai lungpu hku langai mi de, hkum tsan na nga shang wa wu ai. Dawi hte shi a masha ni mung dai lungpu hku a kata htum maga de makoi rawng nga ma ai. Ref 24:3: Shk 57 Ga Baw; Shk 142 Ga Baw. 4 Shanhte gaw shi hpe, ?Ndai gaw na a matu ahkaw ahkang rai nga lit dai! Dai Madu gaw na a gumlau hpyen wa hpe na a lata e ap ya na wu ai rai nna nang ra ai hku shi hpe galaw lu na ndai, nga nna mung nang hpe tsun da nga ai,? ngu nna tsun dan ma ai. Dawi gaw gumrawt sa nhtawm Shawlu n chye ai sha, shi a palawng galu daw mi hpe kadoi di la ya wu ai. 5 Rai ti mung dai hpang Dawi a myit masin gaw shi hpe sharu hpang nga ai rai nna shi a masha ni hpe, 6 ?Dai Madu lata san da sai hkawhkam nye a Madu hpe machyi shangun ai amu kaning re ai kaw na mung, dai Madu ngai hpe hkum kau ya n-ga law! Shi gaw dai Madu lata san da sai hkawhkam rai nga ai majaw ngai shi hpe kachyi mi pyi machyi shangun lu na nngai n rai!,? ngu nna tsun wu ai. Ref 24:6: 1Sa 26:11. 7 Dai rai nna Dawi gaw Shawlu hpe shanhte n gasat ang ai lam shi a masha ni hpe chye na wa hkra tsun dan wu ai.

Shaloi Shawlu gaw rawt nna lungpu hku kaw na pru wa nhtawm bai hkawm matut wu ai. 8 Dai hpang, Dawi gaw shi a hpang e hkan pru wa nhtawm shi hpe, ?Hkawhkam wa e!,? ngu nna shaga wu ai. Shaloi Shawlu kayin mada dat yu wu yang, Dawi gaw ga de dingnyawm dagup let shagrau hkungga jaw wu ai hte, 9 ?Ngai mahtang nang hpe machyi hkra mat hkra shakut nga nngai, ngu nna masha ni tsun kajai nga ai hpe nang hpa majaw madat kau n ni? 10 Ya sha, dai Madu gaw nang hpe nye a lata hta lungpu hku e ap ya sai hpe nang hkum nan mu lu na rai ndai. Nye a masha nkau mi mahtang nang hpe sat kau na matu tsun ma ai, rai ti mung nang gaw hkawhkam tai na matu dai Madu lata san da sai wa rai nga ndai majaw ngai nang hpe kachyi mi mung machyi n jahkrum n-ga law, ngu na a matu myit yawn let hkam sha nga nngai. 11 Yu yu u, nye wa e, ya ngai lang da nga ai na a ntsa palawng adaw achyen hpe mada yu u! Ngai nang hpe sat kau lu sha gaw rai sai, rai ti mung shing rai galaw na malai ndai adaw hpe sha kadoi di la nngai. Ndai hpe yu nna ngai nang hpe gumlau na matu n myit hkawn nga ai hpe mung, nang hpe n machyi shangun mayu ai hpe mung, nang hpe chye na hkawn hkrang shangun mayu nngai. Ngai chyawm gaw nang hpe hpa mung n shut n hpyit kau yu tim, nang mahtang ngai hpe sat kau na matu tam gyam hkawm nga ndai. 12 Dai Madu gaw an hta na shut ai wa hpe jeyang nga u ga! Ngai nang hpe dik dik n machyi jahkrum na rai nga nngai majaw ngai hte hpai shai hkra nang galaw ai amu a matu chyawm gaw shi nang hpe ari jaw u ga. 13 Moi na ga malai hta, ?N hkru ai amu hpe n hkru ai masha ni chyu sha galaw ma ai,? ngu nna tsun ai ga hpe mung nang chye nga ndai; dai rai nna nang hpe ngai n machyi hkra na de ai. 14 Israela hkawhkam wa hpa baw hpe sat na matu shakut hkawm nga ai hpe yu yu mu! Shi hpa baw hpe hkan shachyut hkawm nga ai kun? Gwi chyasi, wa hkalai mi rai nga ai kun? Ref 24:14: 1Sa 26:20. 15 Dai Madu gaw an hta na kadai wa shut ai hpe jeyang nna daw dan hparan ya nu ga. Ndai lam hpe shi mada yu nna, ngai hpe makawp maga la ai hte na a lata kaw na mung hkye la u ga law,? ngu nna tsun wu ai.

16 Dawi gaw dai ga ni hpe shaga ngut ai shaloi, Shawlu gaw, ?Nye kasha Dawi e, nang teng sha rai nga a ni?,? ngu tsun let shi jahtau hkrap hpang wa wu ai. 17 Dai hpang, shi gaw Dawi hpe, ?Nang galaw ai lam jaw nga ai; ngai mahtang shut nga nngai. Ngai nang hpe dai zawn shut ai hku galaw kau ti mung nang chyawm gaw ngai hpe grai kaja ai hku galaw nga nit dai! 18 Dai Madu gaw ngai hpe na a lata e ap ya tim nang ngai hpe n sat kau nit dai majaw, nye a ntsa e nang kade wa mai kaja nga ndai hpe dai ni nang madun dan nga nit dai. 19 Masha wa mi shi a gumlau hpyen wa hpe kade lang lu rim tim, n machyi jahkrum ai sha dat kau shangun mai nga a ni? Dai ni nang ngai hpe galaw nit dai amu a majaw, dai Madu gaw nang hpe shaman ya nga u ga law! 20 Ya nang gaw Israela hkawhkam tai na ra ai mung, dai mungdan gaw nang up hkang ai npu hta matut nna grin nga na mung, ngai hkrak chye ni ai. 21 Rai ti mung, nye a mying hpe mung, nye a dinghku masha ni a lakung lama mying ni hpe mung tsep kawp n malap kau hkrum u ga, nye a amyu matu mara ni hpe naw shangam da ya na, dai Madu a mying ningsang hta ngai hpe ga sadi jaw e law,? ngu nna tsun wu ai. 22 Dawi mung shi shatup na lam, ga sadi jaw dat wu ai.

Dai hpang Shawlu mung nta de nhtang mat wa nhtawm Dawi hte shi a masha ni mung shanhte makoi ai shara de nhtang mat wa ma ai.