2
1 Hana gaw ning ngu akyu hpyi wu ai: Ref 2:1-10: Luk 1:46-55.
?Dai Madu gaw nye a myit masin hpe kabu gara ai lam hte jahpring ya nu ai;
shi galaw dan sai amu a majaw ngai kade sha kabu gara nga n hka!
Ngai gaw nye a gumlau hpyen ni hpe mani nngai;
Karai Kasang ngai hpe karum la nga sai majaw ngai kade sha kabu pyaw nga n hka!
2 ?Kadai mung dai Madu zawn chyoi pra nga ai n rai;
shi zawn re ai mi kadai n nga,
anhte a Karai Kasang zawn makawp maga la lu ai wa kadai n nga ai.
3 Nanhte a ja ja shakawng ga tsun ai hpe jahkring kau mu;
nanhte a gumrawng gumtawng ai ga hkum ni hpe shazim kau mu.
Dai Madu gaw chye ningchyang Karai Kasang rai nga ai;
shi gaw amyu masha ni galaw ai amu yawng mayawng hpe jeyang ya nga ai.
4 N-gun ja ai hpyenla ni a ndan ni daw mat sai,
rai ti mung n-gun kya ai ni n-gun ja nga ai.
5 Lang mi hkru hkru kat kat nga lai wa sai amyu masha ni lusha tam na matu,
ya jang, shanhte nan nchyang shang nga masai,
rai ti mung kawsi hpang gara ai ni kawsi hpang gara galoi mung hkrum na mara ai n rai.
Dai maudung dung ai madu jan gaw kasha sanit shangai nu ai,
rai ti mung law law a kanu chyawm gaw kasha langai mung n nga mat nga ai.
6 Dai Madu gaw sat kau ai hte asak bai jahkrung ya nga ai;
shi gaw amyu masha ni hpe katsan ga de shayu kau nna,
shanhte hpe bai woi la nga ai.
7 Shi gaw masha nkau mi hpe matsan kau shangun nna, kaga ni hpe lu su shangun nga ai;
shi gaw masha nkau mi hpe shagrit kau nna kaga ni hpe galu kaba shangun nga ai.
8 Shi gaw matsan mayan ni hpe ga nhpu kaw na mung,
ra kadawn ai ni hpe shanhte a nni nkri kata kaw na mung sharawt la nga ai.
Shi gaw dai ni hpe hkawhkam kasha ni a manang shatai nhtawm
shagrau sha-a ai shara ni hta tawn da nga ai.
Dai Madu gaw ginding aga a npawt nhpang ni hpe madu da nga ai;
dai ni a ntsa e mungkan ga hpe shi gaw da nga ai.
9 ?Shi gaw sadi sahka myit rawng ai amyu masha ni a asak hkrun lam ni hpe makawp maga ya nga ai,
rai ti mung, n hkru ai ni chyawm gaw nsin kata hta hkoi mat na mara ai;
masha gaw tinang a atsam hte dang lu ai n rai.
10 Dai Madu a gumlau hpyen ni gaw jahten kau ai hkrum na mara ai;
shi gaw shanhte hpe ninghkap na matu sumsing lamu kaw na mu shangoi dat ya na ra ai.
Dai Madu gaw mungkan ga ting hpe tara jeyang na ra ai;
shi gaw shi a hkawhkam wa hpe daru magam n-gun jaw na ra ai,
shi gaw shi lata la sai hkawhkam wa hpe awng padang lu shangun na ra ai.?
11 Dai hpang, Elakana gaw Rama shara e nga ai shi a nta de nhtang mat wa ti mung, ma Samuela chyawm gaw Shilo mare e nga let, hkinjawng Eli a npu hta nga nhtawm dai Madu hpe daw jau nga ai.
12 Eli a shadang sha yan gaw n shawp n kap nga ma ai rai nna, dai Madu hpe mung,
13 amyu masha ni kaw na hpyi la lu ai hkinjawng ni hte seng ai hkan sa na tara matsun ni hpe mung, shan hpa zawn n nawn ya ma ai. Shing rai na malai, masha langai gaw shi a shagu hkungga hpe nawng ya ai shaloi, hkinjawng wa a shangun ma wa, masum bra re ai shan lakung hte rau sa wa wa rai nga ai. Shan naw shadu nga yang,
14 shan di kata de shan lakung hte achyaw la nhtawm, hkinjawng wa hpang de la wa ya ya di ma ai. Shagu hkungga nawng jau na nga Shilo mare de du sa wa ai Israela amyu masha ni yawng hpe dai zawn hkap galaw law rai ma ai.
15 Dai sha n-ga, sau man garai n nat nawng yang, hkinjawng wa a shangun ma sa nhtawm dai shagu hkungga nawng ya ai wa hpe, ?Hkinjawng wa a matu kakang na shan loi mi jaw rit; nang kaw na shadu da sai shan n la mayu ai, shan katsing chyu sha ra ai da,? ngu nna tsun tsun di ma ai.
16 Lama rai nna masha dai wa, ?Sau man shawng nat nawng ai hte teng man ai hku galaw lu n-ga; dai hpang mahtang nang ra ai made la u,? ngu nna htan wu yang, dai hkinjawng wa a shangun ma mahtang, ?N rai law! Ngai hpe ya jang jaw rit! Nang n jaw ai rai yang, dai hpe ngai kashun la na nngai!,? ngu nna tsun tsun rai ma ai.
17 Eli a kasha yan mahtang dai Madu hpe nawng jau ai hkungga ni hpe dai zawn n shagrau hkungga ma ai majaw, shan a yubak gaw dai Madu a man e grai kaba nga malu ai.
18 Ndai aten hta, dai ma Samuela gaw chyoi pra ai lachyit hpa hkai lawng hpun let dai Madu hpe matut nna daw jau wu ai.
19 Shi a kanu gaw shaning shagu kaji ai ntsa palawng galu chywi nhtawm shaning shagu, shagu hkungga nawng ya na matu galaw ai shara de shi a madu wa hte rau lung wa ai shaloi, shi hpe la lung wa ya ya di nga ai.
20 Dai hpang, Eli gaw Elakana hte shi a madu jan hpe shaman ya na wu ai rai nna shi hpe, ?Shi kaw nang ap nawng da nit dai kasha a malai num ndai hta kaga kashu kasha ni, dai Madu nang hpe jaw ya nga u ga law,? ngu nna tsun wu ai.
Dai hpang, nta de shanhte nhtang mat wa ma ai.
21 Dai Madu gaw Hana hpe shaman ya nu ai rai nna, shadang sha masum hte shayi sha lahkawng hte hpe bai shaprat wu ai. Dai ma Samuela mung dai Madu hpe daw jau ai amu galaw let kaba wa nga ai.
22 Ya, Eli asak grai kaba ai hte ugut gu sayang she, shi a kasha yan Israela masha ni hpe galaw ai lam magup hte a lam hpe mung, dai Madu a hpung shingkang shanu nga ai Sum de shang wa ai chyinghka lam e amu galaw ai numsha ni hte pyi rau yup nga ma ai lam hpe mung na wu ai.
23 Dai rai nna, shi gaw shan hpe, ?Nan hpa majaw ndai amu ni hpe galaw nga myit ni? Masha shagu hte mung nan galaw ai n hkru n shawp ai amu a lam ngai hpe tsun dan ma ai.
24 Ngai sha yan e, dai zawn re ai lam hpe jahkring kau manu! Ya dai Madu a amyu masha ni tsun kajai nga ai lam gaw hkrit kajawng hpa amu she rai nga ai!
25 Masha shada da shut hpyit ai rai yang, Karai Kasang hkap makawp ya lu ti mung, Karai Kasang hpe shut hpyit ai rai yang, kadai wa hkap makawp la lu nga a ta?,? ngu nna tsun wu ai.
Rai ti mung shan mahtang kawa a ga n madat ma ai majaw, shan hpe sat kau na matu dai Madu daw dan kau nu ai.
26 Dai ma Samuela chyawm gaw matut kaba wa nna dai Madu a man e mung, masha a man e mung myi man pa nga ai. Ref 2:26: Luk 2:52.
27 Myihtoi langai wa gaw dai Madu kaw na ndai mungga hte rau Eli kaw sa du wu ai: ?Na a nji nwa Arun hte shi a dinghku masha ni Egutu hkawhkam a mayam ni naw tai nga ma yang, ngai gaw Arun kaw dan pru ni ai.
28 Tawn hkungri hta daw jau amu galaw na matu mung, manam pyaw ai bat nat nawng na matu mung, hpa hkai lawng hpun nna ngai hte bawng ban jahkrup na matu mung, Israela amyu bawsang ni yawng hta na nye a hkinjawng ni tai nga na matu, shi a dinghku hpe ngai lata la ni ai. Shing rai tawn hkungri ntsa nat ai shagu hkungga kumhtaw hkam la na ahkang ngai shanhte hpe jaw da ni ai. Ref 2:28: Pru 28:1-4; Jaw 7:35-36.
29 Nye a amyu masha ni kaw ngai hpyi ai shagu hkungga hte hkungga ni hpe hpa majaw sha marim mayu ai myit hte yu myit ni? Eli e, Nye a amyu masha ni ngai hpe nawng ya ai shagu hkungga ni yawng hta na kaja htum ai arai ni hpe hkru hkru kat kat sha shangun let na a kasha ni hpe ngai hta grau hkra hpa majaw shagrau da n ni?
30 Na a dinghku hte na a lakung lama ni hkinjawng ni zawn prat tup ngai hpe daw jau lu mu ga ngu, dai MaduIsraela a Karai Kasang ngai nan lai sai prat ni hta ga sadi tawn da ni ai. Rai ti mung ya chyawm gaw dai ga sadi galoi mung grin sana n rai nga sai hpe ngai tsun nga nngai! Shing rai na malai, ngai hpe shagrau sha-a ai ni hpe ngai shagrau sha-a na nngai; ngai hpe n kaw n law re ai ni hpe ngai mung n gawn n sawn di kau na we ai.
31 Madat u! Na a dinghku na masha kadai mung ugut gu dingla hkra n hkrung nga lu mu ga, na a dinghku hte na a lakung lama ni hta na shabrang ni yawng hpe ngai sat kau ya na aten du wa nga sai.
32 Kaga Israela amyu masha ni hpe shaman chyeju yawng jaw kau ai shaloi, nang gaw yu manawn ai hte ru tsang hkrum na rin dai; rai ti mung na a dinghku masha kadai mung asak kaba dingla ugut gu hkra galoi mung bai hkrung nga lu na mara ai n rai.
33 Ti mung, na a matu mara langai ngai hta na marai langai mi hpe chyawm gaw ngai jahkrung da ya na we ai; shi gaw ngai hpe hkinjawng amu hte galaw daw jau na ra ai. Rai ti mung, shi gaw myi kyaw ai wa tai wa nna myit mada lam yawng hpe shamat kau na ra ai, kaga na a amyu matu mara ni yawng mung kashun kashe du daw sai hkaw amu hte si mat shajang na mara ai.
34 Na a kasha Hopni yan Hpineha shan lahkawng lani jan e sha si mat ai shaloi, dai gaw ngai tsun matsun hte maren teng teng byin wa na ra ai lam nang hpe madun dan na ra ai. Ref 2:34: 1Sa 4:11.
35 Ngai hta sadi dung na ra ai hkinjawng langai hpe ngai lata la na nngai. Shi gaw ngai galaw shangun mayu ai lam magup hte hpe galaw na rai wu ai. Ngai lata san da sai hkawhkam wa a man e tut nawng daw jau na mara ai amyu matu mara ni ngai nang hpe jaw ya na nngai.
36 Naw hkrung nga ai na a matu mara ni kadai mung dai hkinjawng wa kaw sa nhtawm gumhpraw hte lusha shi kaw sa hpyi na ra ai; lama ma lu sha hkra nga, hkinjawng ni hpe karum ya lu na ahkang hpyi la na mara ai.?