15
1 Samuela gaw Shawlu hpe, ?Ngai gaw shi a Israela amyu masha ni a hkawhkam tai na, nang hpe namman jaw ya na matu dai Madu shangun dat ai wa rai nga nngai. Dai rai nna, Chyahtum Chyalai N-gun rawng ai dai Madu kaning nga tsun ai ga hpe ya madat u. Ref 15:1: 1Sa 10:1.
2 Israela amyu masha ni Egutu mung na pru wa ma ai shaloi, Amalek kaji kawa masha ni shanhte hpe ninghkap ma ai majaw, shi shanhte hpe ari jaw na rai wu ai. Ref 15:2: Pru 17:8-14; Trj 25:17-19.
3 Amalek masha ni hpe sa gasat nhtawm shanhte lu malu sut gan mahkra hte hpe tsep kawp jahten shaza kau ya mu. Arai hpa mung hkum tawn hkum ngam da myit. Numsha, lasha, ma kaji, ma chyangai, sagu, dumsu, gawla-uk hte lawze ni yawng mayawng hpe sat kau mu,? ngu nna tsun wu ai.
4 Shawlu gaw shi a hpyen dap n-gun ni hpe shaga jahpawng dat nna Telem shara e jep yu wu yang, Israela amyu masha ni hta na 200,000 hte Yuda amyu masha hta na 10,000 rai nga ai.
5 Dai hpang, shi hte shi a masha ni Amalek mare de rawt sa nhtawm hkun hkraw ai kadit langai mi hta lagyim hkap nga ma ai.
6 Ya shi gaw Keni masha ni hpe shadum jahprang ga shana dat wu ai gaw, Israela masha ni Egutu mung kaw nna pru wa ma ai shaloi, nanhte a kaji kawa ni shanhte hpe matsan yu dum la manit dai majaw, ?Amalek masha ni hte hpawn nanhte hpe n sat kau hkrup myit ga, shanhte kaw na hkawm pru mat wa mu.? Shaloi, Keni masha ni mung pru mat wa ma ai.
7 Shawlu gaw Amalek masha ni hpe, Hawila kaw nna Egutu mung a sinpraw maga de nga ai Shura mare dingyang gasat ai hte dang kau wu ai;
8 shi gaw Amalek hkawhkam Agag hpe chyahkrung rim la lu wu ai; shi a masha ni yawng hpe chyawm gaw sat sharu kau ma ai.
9 Rai ti mung, Shawlu hte shi a masha ni gaw Agag a asak hte hpawn kaja htum ai sagu, dumsu, grau kaja htum ai dumsu ni, sagu kasha ni hte kaja ai arai hpa hpe mung n shaza kau ai sha jahkrung da ma ai; asung n shang ai hte manu n dan ai arai ni hpe chyu sha jahten shaza kau ma ai.
10 Dai Madu gaw Samuela hpe,
11 ?Shawlu hpe hkawhkam shatai kau ni ai majaw ngai yawn la nngai; shi gaw ngai kaw na kayin mat wa ai hte nye a hkang da ai ga ni hpe mung n madat mat nu ai,? ngu nna tsun wu ai. Dai majaw, Samuela masin pawt nga ai; dai Madu hpe mung shana tup hpyi nem nga wu ai.
12 Shi gaw hpang jahpawt manap jau jau aten e Shawlu hpe sa tam na nga pru mat wa wu ai. Shaloi Shawlu mahtang Hkarmela mare de du nna dai shara e shi a matu masat shadaw langai gaw sharawt da wu ai; dai hpang Gilgala de yu mat wa sai lam Samuela na wu ai.
13 Samuela mung Shawlu nga ai de yu sa wu yang Shawlu gaw, ?Samuela e, dai Madu gaw nang hpe shaman ya u ga! Dai Madu hkang da ai ga hpe ngai madat ni ai,? ngu tsun let shakram la wu ai.
14 Samuela chyawm gaw, ?Ataw, dumsu nbaw ai nsen hte sagu ngoi ai nsen ni hpe she na nngai gaw, kaning re ai rai ta?,? ngu nna san wu ai.
15 Shawlu gaw, ?Nye a masha ni she dai ni hpe Amalek masha ni kaw na la wa ma ai. Dai Madu na a Karai Kasang hpe shagu hkungga nawng ya na nga, kaja htum ai sagu dumsu ni hpe shanhte kyem da nna, kaga gale ni hpe chyawm gaw tsep kawp anhte jahten shaza kau saga ai,? ngu nna htan wu ai.
16 Samuela gaw, ?Naw hkring u; dai Madu ngai hpe mana e tsun ai ga, ngai nang hpe tsun dan na we ai,? ngu nna hkang da wu ai.
Shawlu gaw, ?Ngai hpe tsun dan e,? ngu nna tsun wu ai.
17 Samuela gaw, ?Na hkum nang ahkyak n rai nga ai ngu myit nawn la tim pyi, nang gaw Israela amyu bawsang ni a ningbaw wa rai nga ndai. Dai Madu mung nang hpe Israela hkawhkam shatai nhtawm namman jaw ya nit dai;
18 shi gaw nang hpe dai n hkru ai Amalek masha ni hpe jahten shaza kau na matu hkang da let shangun dat nit dai; shanhte yawng hpe sat kau ngut ai shani du hkra, htim gasat na matu shi nang hpe tsun nu ai.
19 Dai re ai mi, nang shi a ga hpa majaw n madat kau n ni? Hpa majaw lanep arai ni hpe rim magawn wa nna dai Madu n sharawng awng ai amu hpe galaw kau wu ni?,? ngu nna htan wu ai.
20 Shawlu gaw, ?Dai Madu a ga hpe ngai madat ni ai. Shi tsun ai hte maren, ngai sa nna Hkawhkam Agag hpe woi nhtang wa nna kaga Amalek masha ni yawng hpe sat kau da se ai.
21 Rai ti mung, nye a masha ni chyawm gaw shanhte lu madu la ai kaja htum ai sagu dumsu ni hpe n sat kau ai sha, dai Madu na a Karai Kasang hpe shagu hkungga nawng ya na nga, ndai Gilgala mare de shanhte la wa ma ai.
22 Samuela gaw, ?Dai Madu gaw hpa hpe mahtang ra sharawng a ni? Madat mara ai hpe kun? Shing n rai wan nat hkungga ni hte shagu hkungga ni hpe kun? Shi hpe kaja htum ai sagu nawng jau ya ai hta shi a ga madat mara na gaw grau nna mai kaja nga ai.
23 Shi hpe gumlau ai lam gaw hpyi shung shung ai zawn n kaja nga ai; myit tsaw myit dap rawng ai gaw hpara sumla hpe nawku ai htung lai zawn yubak lu nga ai. Dai Madu a hkang da ai ga hpe nang ningdang kau nit dai majaw shi mung nang hpe hkawhkam aya kaw nna jahkrat kau nu ai,? ngu nna htan wu ai.
24 Shawlu gaw, ?Rai sa, ngai shut kau ni ai law; ngai gaw dai Madu a hkang da ai ga hte na a matsun maroi ga ni hpe n madat kau se ai. Ngai gaw nye a masha ni hpe hkrit we ai majaw shanhte ra ai hku galaw kau shangun se ai.
25 Rai ti mung, ya chyawm gaw nye a yubak mara raw dat ya na ngai hpyi nem nngai; dai Madu hpe nawku lu n-ga, ngai hte rau nhtang wa ga,? ngu nna tsun htang wu ai.
26 Samuela gaw, ?Nang hte rau ngai nhtang wa na nngai n rai; dai Madu a hkang da ai ga hpe nang ningdang kau nit dai majaw nang hpe mung Israela hkawhkam aya kaw nna jahkrat kau nu ai,? ngu nna htan wu ai.
27 Dai hpang, Samuela kayin pru mat wa wu yang, Shawlu mahtang shi a lawng hkai ntsa palawng hpe hkan gang wu ai majaw dai palawng je mat nga ai. Ref 15:27-28: 1Sa 28:17; 1Hk 11:30-31.
28 Samuela gaw shi hpe, ?Dai ni, dai Madu gaw Israela mungdan hpe nang kaw na gang je kau nhtawm, nang hta grau kaja ai masha langai ngai hpe jaw kau nu ai.
29 Daru magam n-gun hpung shingkang hte hpring ai Israela a Karai Kasang gaw masu ai n rai; shi a myit chye galai nga ai n rai. Shi gaw shinggyim masha langai n rai, shi a myit galai shai chye ai n rai,? ngu nna tsun wu ai.
30 Shawlu gaw, ?Ngai shut kau ni ai; rai ti mung, nye a amyu masha ni a ningbaw ni hte Israela yawng a man e, ngai hpe dik dik hkungga lara ai lam naw madun dan mi. Dai Madu na a Karai Kasang hpe ngai nawku lu n-ga, ngai hte rau nhtang wa ga,? ngu nna tsun htang wu ai.
31 Dai rai nna Samuela gaw shi hte rau nhtang wa nhtawm Shawlu gaw dai Madu hpe nawku wu ai.
32 Samuela gaw, ?Hkawhkam Agag hpe ndai yang, ngai hpang de woi wa ya mi,? ngu nna hkang dat wu ai. Agag mung shi kaw hkrit gari ai hte sa wa nhtawm, ?Si hkrung si htan re ai laja lana hkrit hpa gaw ngut boi mat sai,? ngu nna shi kraw hta myit nawn la wu ai.
33 Samuela chyawm gaw, ?Na a nhtu kanu law law a kasha ni hpe sum kau shangun nit dai zawn, ya na a kanu hpe mung kasha sum kau ai kanu tai kau shangun na rai sai,? ngu nna tsun wu ai. Shi gaw Gilgala shara na tawn hkungri man e Agag hpe kahtum kadaw di kahtam azat kau wu ai.
34 Dai hpang, Samuela gaw Rama de wa nna, Shawlu mung Gibea na shi a dum nta de wa mat wa wu ai.
35 Samuela hkrung nga dingsa, shi gaw hkawhkam wa hpe galoi mung n mu nu ai; rai ti mung, shi gaw Shawlu a majaw myit yawn nga ai. Dai Madu mung Shawlu hpe Israela hkawhkam shatai kau wu ai majaw yawn nga ai.