13
1-2 Shawlu gaw masha hkying masum hpe shaga shaw la nhtawm shanhte hta na hkying lahkawng hpe shi hte rau Mikmasha hte Behtela bum ga e tawn da nna, hkying mi hpe shi a kasha Yonahtan hte rau Benyamin amyu bawsang ni a lamu ga na Gibea mare de shangun dat wu ai. Ngam ai masha ni hpe tinang dum nta de wa kau shangun dat wu ai.
3 Ya, Geba e nga ai Hpilisti dap up wa hpe Yonahtan sat kau wu ai lam hpe Hpilisti masha ni yawng na ma ai. Dai hpang Shawlu mung Hebre masha ni majan de shang na matu mungdan ting de pahtau dum na, kasa ni hpe shangun dat wu ai.
4 Shawlu gaw Hpilisti dap up wa hpe sat kau nu ai lam hpe mung, Hpilisti masha ni shanhte hpe n ju nga ai lam mung, Israela masha ni yawng na ma ai. Dai rai nna Gilgala e Shawlu hte matut mahkai let zup hpawng ga nga, amyu masha ni htan dat ma ai.
5 Hpilisti masha ni mung Israela ni hpe htim gasat na matu zup hpawng ma ai; shanhte hta hpyen leng mun masum, gumra jawn ai masha hkying kru hte panglai hkin-gau hkan na zaibru zawn law ai hpyenla ni nga nga ai. Shanhte gaw Betawen a sinpraw maga Mikmasha de sa wa nhtawm dai yang e dap jung ma ai.
6 Dai hpang, shanhte gaw Israela amyu masha ni hpe n-gun hte maja htim gasat ma ai majaw shanhte hpe myit chyum myit htum di shangun ma ai. Dai rai nna Israela amyu masha nkau mi mahtang lungpu hku ni, lunggrawp lungwawp ni, lunghkrung lungbra ni, nhkun ni hte hka htung ni hkan e makoi nga ma ai;
7 kaga nkau mi chyawm gaw Yawdan hka rap nna Gad hte Gilead a mung ni hkan hprawng makoi nga ma ai.
Shawlu gaw Gilgala e naw nga nga ai rai nna, shi hte rau nga nga ai amyu masha ni mahtang hkrit gari nga ma ai.
8 Samuela matsun madun ai hte maren galaw na matu nga, Shawlu gaw Samuela hpe sanit ya tup la nga ai; rai ti mung Samuela mahtang Gilgala de garai n du rau wu ai majaw, amyu masha ni mung Shawlu kaw nna hprawng mat wa shajang ma ai rai nna, Ref 13:8: 1Sa 10:8.
9 shi gaw shanhte hpe, ?Wan nat hkungga hte mahku hkungga ni hpe la wa ya mi,? ngu nna tsun wu ai. Shaloi wan nat hkungga shi nawng ya ai rai nna,
10 dai hkungga nawng ya ngut jang she, Samuela du sa wa nga ai. Shawlu mung shi hpe tau la na nga pru sa nhtawm hkap hkalum la wu ai;
11 rai ti mung, Samuela mahtang, ?Nang hpa galaw kau sata?,? ngu nna tsun wu ai.
Shawlu gaw, ?Amyu masha ni ngai kaw na hprawng mat wa ai hte nang mung madat da ai ahkying hta n du rai nna mung, dai sha n-ga, Hpilisti masha ni Mikmasha shara e hpawng nga ma ai majaw,
12 bai Hpilisti masha ni ndai ngai nga ai Gilgala de sa gasat na mara ai; dai Madu kaw na chyeju garai n hpyi la nga nngai wa,? ngu nna ngai myit nawn kau ni ai. Dai rai nna nye myit hkam sha ai hte shagu hkungga nawng kau se ai,? ngu nna htan wu ai.
13 Samuela gaw, ?Dai gaw angawk ai bungli rai nga sai. Dai Madu na a Karai Kasang nang hpe jaw ai hkang da ai ga hpe n hkan nit hka. Nang lama madat mara nna hkan sa taw gaw, nang hpe mung, na a matu mara ni hpe mung Israela mung hpe htani htana up shangun na rai wu ai.
14 Rai ti mung, ya chyawm gaw nang up hkang lu sana n rai nit dai. Nang shi a ga n madat kau nit dai majaw, dai Madu gaw shi yu sharawng ai masha hpe tam nna, shi a amyu masha ni hpe up hkang shangun na rai wu ai,? ngu nna htan wu ai. Ref 13:14: Kas 13:22.
15 Samuela mung Gilgala kaw nna pru nhtawm shi a hkrun lam bai hkawm mat wa wu ai. Shawlu gaw shi a hpyenla ni hpang de sa wa wu yang, naw ngam nga ai shi a amyu masha ni mung shi a hpang hkan nang ma ai. Shanhte gaw Gilgala kaw nna Benyamin a lamu ga e nga ai Gibea mare de sa mat wa ma ai. Shaloi Shawlu gaw shi a hpyen hpung ni hpe hkan jep wu yang masha kru tsa daram rai ma ai.
16 Shawlu, shi a kasha Yonahtan hte shanhte a masha ni gaw Benyamin a lamu ga na Geba mare hta dap jung ma ai; Hpilisti masha ni chyawm gaw Mikmasha shara e dap jung ma ai.
17 Ya, Hpilisti hpyenla ni gaw hpyen ni hpe shang hpya na nga, hpung masum rai shanhte a dap kaw nna pru sa wa ma ai; hpung mi gaw Shuala mung na Ohpra maga de pru sa wa ma ai.
18 Kaga hpung langai mi gaw Bet Horon maga de sa wa ma ai, bai kaga hpung mi gaw Zeboim Kadit hte nam mali hpe praw rai mu mada lu ai lamu ga jarit lam maga de sa wa ma ai.
19 Hpilisti masha ni mahtang, Hebre masha ni hpe ri nhtu hkum dup nga nna hkrai hkum shadang ai majaw, Israela mung ting hta ndup shara ni n nga nga ai.
20 (Israela masha ni mahtang shanhte a nahtai, shanghkawp, nwa hte nhkyau re ai ni hpe Hpilisti masha ni kaw sa dup la ra ma ai; nwa hpe adup shadai ai hte hpri shingju
21 ni hpe bai gram lajang ai shaloi gumhpraw dengga kaji langai ngai jaw ra nga malu ai; nahtai shing n rai shanghkawp ni hpe shadai yang dengga lahkawng ya ra nga malu ai.)
22 Dai rai nna majan shani e Shawlu hte shi a kasha Yonahtan hta kaga Israela hpyenla ni kadai mung ri nhtu n lang lu nga ma ai.
23 Hpilisti masha ni gaw Mikmasha uhkan hpe makawp maga na matu hpyenla hpung mi hpe shangun dat wu ai.