9
1 Bai, manga ngu na lamu kasa gaw, shi a pahtau dum dat wu ai. Shaloi, lamu de nna ga ntsa de shagan langai mi di hkrat wa ai hpe ngai mu nngai. Dai shagan hpe dai sung htum ai shara na nhkun a sumsaw ap ya wu ai.
2 Dai shagan gaw sung htum ai shara na nhkun hpe shi hpaw dat wu ai rai nna, wan hkut gaw wanhtung kaba kata na wan hkut zawn dai nhkun na mawng lung wa ai hte, dai nhkun kaw na wan hkut a majaw, jan hte lamu ganghkau gaw nsin sin mat wa ai.Ref 9:2: Nin 19:28; Yoe 2:2,10.
3 Dai wan hkut hta na dinggam-yaw ni pru wa nna ga ntsa de hkrat wa ma ai. Shanhte hpe n-gaw-gawk ni lu ai baw daru atsam jaw da mu ai.Ref 9:3: Shr 9:10; Pru 10:12-14; Esa 10:4.
4 Shanhte gaw, ga ntsa na tsingdu hpe mung, tsit lali ai baw magup hpe mung, hpun magup hpe mung, hkra lu na n rai, ngu nna hkang da ai hkrum ma ai. Tinang a lahtan ni hta Karai Kasang a dazik n kap ai masha ni hpe sha zingri lu na ngu nna jep da mu ai.Ref 9:4: Shr 6:6; 8:7; Eze 9:4.
5 Dinggam-yaw ni, dai masha ni hpe shata manga zingri zingrat na hta lai nna sat na ahkang n jaw da mu ai. Dai zingri zingrat ai a machyi ai gaw, n-gaw-gawk na ai zawn nga nna machyi nga ai.
6 Dai shata manga laman shanhte si nhpang tam na mara ai; rai ti mung shanhte dai hpe mu na mu ai n rai; shanhte si mayu na mara ai, rai tim si hkrung si htan gaw shanhte kaw na hprawng mat na ra ai.Ref 9:6: Shr 6:16; Yob 3:21; Esa 2:19; Yer 8:3.
7 Dai dinggam-yaw ni gaw, hpyen gasat na matu byau shajin tawn ai gumra ni hte bung nga ai; shanhte a baw ni hta ja janmau ni zawn san ai chyawp tawn nna shanhte a myiman gaw masha a myiman hte bung nga malu ai.Ref 9:7: Dan 7:8; Yoe 2:4.
8 Shanhte a kara gaw, numsha ni a kara zawn san nga malu ai; shanhte a wa ni gaw hkanghkyi ni a wa zawn san nga malu ai. Ref 9:8: Yoe 1:6.
9 Shanhte a sinda ni hpe hpri sinda magap zawn san ai hte magap tawn da nga ai. Shanhte a singkaw ni kahprap ai nsen gaw, hpyen gasat htim ai gumra leng law law wu ngoi ai nsen hte bung nga ai.Ref 9:9: Yoe 2:5-7.
10 Shanhte gaw n-gaw-gawk a nmai hte palen zawn re ai tu nga malu ai rai nna, dai shanhte a nmai ni hte masha ni hpe shata manga tup zingri na ahkang lu ma ai.
11 Shanhte hta, shanhte a ntsa e up hkang nga ai hkawhkam langai mi lu ma ai; Shi a mying Hebre ga hku Abadon rai nna, Grik ga hku Apolion ( de a lachyum gaw, ?Jahten sharun ai wa,?) ngu ai rai nga ai.
12 Shawng na dingnye gaw lai mat wa sai, nde a hpang e dingnye amyu lahkawng naw du na ra ai.
13 Dai hpang, kru ngu na lamu kasa gaw, pahtau dum dat wu ai. Shaloi Karai Kasang a man e nga ai ja hkungri a jut mali kaw na pru wa ai nsen langai mi hpe ngai na nngai.Ref 9:13: Pru 30:1-3.
14 Dai nsen gaw kru ngu na lamu kasa hpe, ?Uhprat hka nu kaba makau e sharen da ai lamu kasa mali hpe raw dat u!,? nga nna tsun ai.Ref 9:14: Shr 16:12.
15 Dai rai nna dai lamu kasa mali gaw, sharen da ai kaw na raw dat ai hkrum ma ai. Shanhte gaw, shinggyim masha ni hpe htam masum na htam mi sat kau na nga, ahkying, nhtoi, shata, shaning a matu hkyen tawn da ai ni rai nga ma ai.
16 Gumra jawn ai hpyen luksuk ni wan lahkawng tsa re ai lam ngai hpe tsun dan sai.Ref 9:16: Shk 68:17; Eze 38:4; Dan 7:10.
17 Bai, nye a shingran hta gumra ni hte dai ni hta jawn ai ni hpe ngai mu nngai; shanhte gaw wan zawn hkyeng ai, nila seng mut zawn mut ai, kan zawn htoi ai nsam rawng ai sinda magap dagap da ma ai. Gumra ni a baw ni gaw hkanghkyi ni a baw ni hte bung nga ai rai nna, shanhte a shinglet hta na wan numli, wan hkut hte kan pru nga ai.Ref 9:17: 1Hl 12:8; Esa 5:28-29.
18 Dai gumra ni a n-gup hta na pru ai, wan numli, wan hkut hte kan ngu ai tsin-yam masum a majaw, shinggyim masha htam masum hta na htam mi sat kau ai hkrum ma ai.
19 Hpa majaw nga yang, dai gumra ni a atsam gaw, shanhte a n-gup ni hte shanhte a nmai hta rawng nga malu ai. Shanhte a nmai ni gaw lapu hte bung nna baw ni tu nga malu ai rai nna, dai hte masha ni hpe achye ma ai.
20 Ndai tsin-yam tsindam hta na lawt lu nna naw ngam nga ai shinggyim masha ni gaw, shanhte galaw ai amu kaw na myit malai n lu ma ai. Shanhte gaw jinat ni hpe mung, myi n mu, na n na lu ai hte n chye hkawm ai, ja, gumhpraw, magri, nlung hte hpun sumla ni hpe nawku ai lam hpe mung n jahkring kau ma ai.Ref 9:20: Trj 31:20; Shk 106:37; 115:4-7; Dan 5:23.
21 Masha sat ai amu hta na mung, mandan lakle amu, num la shut hpyit ai amu hte lagu lagut amu hta na mung, shanhte myit malai n lu ma ai.