5
1 Bai, tingnyang hta dung nga ai wa a hkra lata hta, laika man kata e mung, ntsa e mung laika ni ka da nna dazik sanit hte dawk shakap tawn da ai laika shabawn langai mi hpe ngai mu nngai. Ref 5:1: Esa 29:11; Eze 2:9-10: Dan 12:4.
2 Dai hpang n-gun ja ai lamu kasa langai mi gaw, ?Dai dazik ni hpe gaw kau na hte dai laika shabawn hpaw na kadai ging dan nga a ta?,? nga nna nsen kaba hte jahtau tsun ai hpe ngai mu nngai.
3 Rai ti mung, sumsing lamu hta e mung ginding aga ntsa e mung, mungkan ga a lawu tsang hta mung, dai laika hpe hpaw nna de a kata na laika hpe yu na kadai n nga ai.
4 Dai laika shabawn hpaw nna de a kata de ka da ai lam ni hpe hti yu na ging dan ai masha kadai hpe mung n mu tam ai majaw, ngai ja ja hkrap nngai.
5 Dai rai nna, salang ni hta na langai mi gaw, ?Hkum hkrap et. Yu u! Yuda amyu hta na hkanghkyi ngu ai Dawi a amyu kaba matu mara gaw, awng padang lu nna dai dazik sanit hpe gaw kau nna laika shabawn hpe hpaw lu sai,? nga nna tsun ai.Ref 5:5: Nin 49:9-10.
6 Shaloi, Sagu Kasha langai mi gaw, hkrung ai dusat amyu mali hte salang ni shinggrup tawn ai tingnyang a ka-ang e tsap nga ai hpe ngai mu nngai. Shi gaw hkungga nawng na matu sat kau hkrum sai Sagu Kasha hte bung nga ai. Shi hta nrung sanit hte myi sanit tu nga ai. Shanhte gaw dinghta ga hproi hkra shangun dat hkrum ai Karai Kasang a Wenyi sanit hte rai nga ma ai.Ref 5:6: Esa 53:7; Eze 1:5; 4:10.
7 Dai Sagu Kasha sa nna, tingnyang hta dung nga ai wa a hkra lata na laika shabawn hpe la wu ai.
8 Dai laika hpe lu la ai shaloi jang, dai dusat amyu mali hte salang hkun mali gaw, dai Sagu Kasha a man e dingnyawm ma ai. Shanhte langai hte langai gaw tingse hte Karai Kasang a masha ni a akyu hpyi ai ga ngu ai manam pyaw ai baw hte hpring chyat nga ai ja gawm ni hpe mung lang nga ma ai.Ref 5:8: Shr 4:8-10; 8:3-4; 15:2; Shk 141:2.
9 Shanhte gaw, ?Nang gaw dai laika shabawn hpe la na hte,
dazik ni hpe gaw kau na ging dan nga ndai.
Hpa majaw nga yang, nang sat kau hkrum nit dai rai nna, na a nawng jau si hkam ai hte,
amyu bawsang shagu hta na mung, ga amyu shagu hta na mung, Karai Kasang a matu masha ni hpe nang mari la nit dai rai nga ai, nga nna mahkawn ningnan mahkawn ma ai.Ref 5:9: Shk 40:3; 98:1; Esa 42:2; Kas 20:28; Ehp 1:7; Heb 9:12; 1Pe 1:18-19; 1Yh 1:7.
10 Nang gaw shanhte hpe, anhte a Karai Kasang hpe daw jau ai amu gun hpai lu na matu hkawhkam mungdan hte hkinjawng amyu langai mi shatai nu ai hte,
shanhte gaw ga ntsa e up hkang na ahkang aya lu na mara ai.? Ref 5:10: Shr 20:6; 22:5; 1Pe 2:5.
11 Dai hpang ngai bai yu dat yang, dai tingnyang a grup yin e mung, dusat amyu mali hte salang ni a grup yin e mung, tsap nga ai lamu kasa ni a nsen hpe ngai na nngai. Dai lamu kasa ni gaw, mun, sen, wan, a htam law law hti n dang hkra rai nga ma ai.Ref 5:11: Shr 4:4-6; Shk 68:17; Dan 7:10; Heb 12:22.
12 Shanhte gaw,
?Sat kau hkrum ai Sagu Kasha gaw,
hpung dagu, sut gan, hpaji atsam, n-gun lagaw arawng sadang, hpung shingkang hte,
shakawn kungdawn ai hpe hkam la ging nga ai law!,? nga nna nsen kaba hte shakawn nga ma ai.
13 Dai hta n ga, lamu lahta tsang hta na mung, ginding aga ntsa hta na mung, mungkan ga a lawu tsang hta na mung, panglai hta na mung, ninggawn tawa ting na hkrung mahkrung yawng hte gaw,
?Tingnyang hta dung nga ai wa hte Sagu Kasha gaw,
arawng sadang hpung shingkang hte daru magam, anga nga u ga law!,? nga nna shanhte mahkawn mangoi nga ma ai hpe ngai na nngai.Ref 5:13: Shr 6:16; 7:10; Rom 9:5; Hpl 2:10; 1Tm 6:16; 1Pe 4:11.
14 Shaloi dai dusat amyu mali gaw, ?Amen!,? nga nna htan ma ai; salang ni mung dingnyawm nna nawku ma ai.