1 Dai rai yang gaw kaning ngu tsun na rai ta? Karai Kasang a chyeju law htam wa u ga, yubak hta e naw ahkan nga na kun? 2 Kaja wa dai hku n rai law! Yubak mara hte si hka mat sai ni anhte gaw dai hta e kaning rai naw matut nna pra nga lu na ga ta? 3 Anhte gaw Yesu Hkristu hte kahkyin gumdin nna langai sha rai na matu hkalup hkam la ga ai hpe nanhte kaja wa chye nga myit dai. 4 Dai re ai majaw Hkristu gaw kawa a hpung shingkang hte si mat ai ni kaw na hkrung sharawt la hkrum wu ai hte maren anhte mung asak ningnan hta rawt hkawm wa lu hkra, dai hkalup hkam ai hta e anhte si hkam nna shi hte rau lup makoi ai hkrum saga ai. Ref 6:4: Rom 8:11; Gal 6:15. 5 Hpa majaw nga yang anhte a si hkam ai gaw shi a si hkam ai hte baw sha rai nga ai rai yang gaw Madu shi si ai kaw na bai hkrung rawt wa ai zawn, anhte mung Madu hte nhpang rum ai hku si ai kaw na bai hkrung rawt wa na ga ai. 6 Bai anhte gaw yubak mara a mayam sha naw arai nga ai ni n tai u ga, anhte a yubak gawng shingyan dingsa hpe Yesu hte rau wudang e jen sat kau saga ai hpe anhte chye nga ga ai. 7 Hpa majaw nga yang masha langai mi si ai shaloi shi gaw yubak a n-gun atsam hta na shalawt dat ai hkrum nu ai. 8 Ya anhte gaw Hkristu hte rau si saga ai rai nna Hkristu hte rau mung hkrung nga lu na ga ai ngu nna anhte kam sham nga ga ai. 9 Hpa majaw nga yang, Hkristu gaw si ai kaw na bai hkrung rawt wa sai rai nna htawm hpang de galoi mung bai n si na sai lam anhte chye ga ai. Dai si hkrung si htan gaw shi hpe galoi mung n up da lu na sai. Ref 6:9: Shr 1:18. 10 Dai rai nna shi si hkam sai majaw yubak mara gaw shi a ntsa e n-gun atsam hte n up da lu sai hte ya Madu gaw Karai Kasang hte rau kanawn mazum asak hkrung nga ai. 11 Dai hte maren yubak mara hte seng nna tsun ga nga yang nanhte gaw nanhte a hkum hpe si mat ai ni zawn myit nawn da ra myit dai. Rai ti mung nanhte gaw Yesu Hkristu hta e Karai Kasang hte kanawn mazum asak hkrung nga lu manit dai. 12 Dai re ai majaw nanhte a hkum hkrang a ra kasit ai lam de n hkan n sa na matu yubak mara gaw nanhte a si chye ai hkum hkrang ni hta e galoi mung hkum up shangun nga myit. 13 Dai hta n-ga nanhte a hkum hkrang daw shan hpe mung n hkru n shawp ai hta asung jashawn na matu yubak hpe hkum ap ya myit. Shing rai na malai nanhte si ai kaw na hkrung rawt ai n re ai hku nna mung, ding hpring mai kaja ai lam ni hta jai lang hkam na matu mung tinang hkum hkrang hpe Karai Kasang kaw sak ya mu. 14 Hpa majaw nga yang nanhte gaw jep ai Tara n pu e n rai, Karai Kasang a chyeju n pu e rai nga myit dai majaw, yubak mara gaw nanhte a ntsa e up madu lu na n rai.

15 Dai rai yang gaw kaning ngu na law? Anhte gaw jep ai Tara n pu e n rai nga ga ai, Karai Kasang a chyeju n pu e she rai nga ga ai majaw yubak galaw na ga ni? Shing n rai u ga! 16 Nanhte gaw marai langai ngai hpe madat mara na nga nna tinang a hkum hpe mayam zawn ap nawng kau myit yang gaw, kaja wa nanhte madat mara nga ai Madu a mayam rai nga myit dai hpe nanhte chye nga myit dai, lama wa nanhte gaw atsawm sha yubak mara a shangun ai hpe madat mara hkam la myit yang gaw nanhte si hkrung si htan hkrum na myit dai; shing n rai Karai Kasang a ga hpe madat mara hkam la myit yang gaw nanhte Karai Kasang a man e ding hpring ai ni tai wa lu na myit dai. 17 Nanhte chyawm gaw shawng de kalang mi yubak mara a mayam ni tai yu manit dai rai ti mung nanhte hkap la kam sham sai sharin shaga ai lam hta na teng man ai lam ni hpe myit masin mahkra hte madat mara hkan sa manit dai majaw Karai Kasang a chyeju hpe ngai shakawn kungdawn nngai law! 18 Nanhte gaw yubak kaw na shalawt dat ai hkrum manit dai majaw ding hpring ai a mayam ni nanhte tai wa manit dai. 19 (Nanhte gaw hkum shan hta gawng kya nna chye na na atsam nan n rawng nga myit dai majaw masha chye na loi ai shani shagu shaga ai baw ga hte tsun nngai.) Shawng de kalang mi nanhte gaw n hkru n kaja ai lam amyu myu galaw u ga nanhte a daw shan ni hpe awu asin re ai hte n hkru n shawp ai a lata de mayam tai na matu mahkra ap kau manit dai. Dai hte maren, ya e nanhte gaw san seng mai kaja ai amu galaw lu u ga, ding hpring ai a mayam ni tai na matu nanhte a daw shan ni mahkra hpe ap ya lu na rai myit dai. 20 Nanhte gaw yubak a mayam tai nga ai ten hta ding hpring ai hta na nanhte daw hka nga myit dai. 21 Dai aten hta nanhte hkan sa galaw ai amu ni gaw hpa akyu mi n shabyin ai hta n ga ya e nanhte dai ni a majaw kaya kahpa hkrum manit dai. Dai ni a jahtum ai gaw si mat ai rai nga ai. 22 Rai ti mung ya nanhte gaw dai yubak kaw na shalawt dat ai hkrum nna Karai Kasang a mayam ni tai wa manit dai. Nanhte lu la ai akyu gaw Madu a matu nanhte a hkum hpe awm dawm ap nawng ai a majaw jahtum e htani htana asak lu la ai lam rai nga ai. 23 Hpa majaw nga yang yubak a shabrai gaw si mat ai rai nga ai, rai ti mung Karai Kasang a chyeju kumhpa chyawm gaw anhte a Madu Hkristu hte langai sha rai nga ga ai majaw lu la ai htani htana asak nan rai nga ai.