4
(1Hk 7:23-51)
1 Hkawhkam Shawlumon gaw pe 30 kaba ai man bung hte pe 15 tsaw ai magri mang tawn hkungri langai galaw wu ai. Ref 4:1: Pru 27:1-2.
2 Shi gaw din din re ai magri mang hka lawng langai mi hpe mung galaw ai rai nna dai gaw sung de pe 7 chyen, shingdan pe 15 hte de a grup grup de pe 45 rai nga ai.
3 Dai hka lawng a mahka grup yin na matu ni hta usu nsan ai sumla hpe yan lahkawng hkrep nna mawn shatsawm da nhtawm hka lawng jaw yang dai ni hpe mung jaw shalawm wu ai.
4 Dai hka lawng hpe man maga mi de usu masum sum rai shinggan de man yawng nna man mali maga de tsap nga ai magri mang usu shi lahkawng a shingma ntsa e mara da nga ai.
5 Hka lawng a shakum ngu na gaw letma 3 htat nga ai; de a mahka gaw hka gawm mahka zawn rai nna nampan pu makawp zawn shinggan maga de kangwi da nga ai. Dai hka lawng hta hka galan 15, 000 shang nga ai.
6 Shanhte gaw angdung 10 galaw nna 5 hpe Nawku Htingnu a dingda maga de, kaga 5 hpe dingdung maga de tawn da nga ai. Dai ni hpe wan nat hkungga nawng ya ai dusat hkum daw shan ni hpe kashin kau ai shaloi lang ma ai. Hka lawng kaba na hka chyawm gaw hkinjawng ni shin na matu rai nga ai. Ref 4:6: Pru 30: 17-21.
7-8 Shanhte gaw lang nga ai kasi hte maren, ja pyengdin shadun 10 hte ku 10 hpe galaw nhtawm Nawku Htingnu a gawk kaba hta pyengdin shadun manga hte ku manga de garan tawn da ma ai. Shanhte gaw ja ban latsa hpe mung galaw da ma ai. Ref 4:7: Pru 25:31-40. Ref 4:8: Pru 25:23-30.
9 Shanhte gaw hkinjawng ni a matu kata wang langai hte shinggan wang hpe mung galaw ma ai. Wang chyinghka ni hte wang lapran na chyinghka ni hpe magri mang hte sup da nga ma ai.
10 Dai magri mang hka lawng hpe Nawku Htingnu a sinpraw dingda jut makau e tawn da nga ma ai.
11-16 Huram gaw di bu, shingban hte hka wan ni hpe mung galaw wu ai. Nawku Htingnu a matu shi galaw na ngu nna Hkawhkam Shawlumon hpe shi ga sadi jaw da nu ai arai yawng hte hpe shi galaw shangut da wu ai. Dai ni gaw:
Shadaw lahkawng
Shadaw ntsa na hka wan zawn re ai magum ni
Magum shagu a ntsa e hkri da ai
Saidawng kasi
Magum shagu a ntsa e grup grup de yan
lahkawng grang da ai magri mang hkainu si 400 rawng nga ai.
Leng shi
Angdung shi
Hka lawng
Hka lawng hpe madi da ai usu shi lahkawng
Di bu, shingban hte zun labra ni rai nga ai.
Lata sama Huram gaw dai Madu a Nawku Htingnu kata hta lang na matu Hkawhkam Shawlumon shi hpe hkang da nu ai hte maren, dai arai yawng mayawng hpe magri mang jet hte galaw shatsawm da wu ai.
17 Hkawhkam wa gaw dai arai yawng hpe Suhkot hte Zereda lapran na Yawdan Kadit hta nga ai wan htung hta jaw shangun wu ai.
18 Arung arai grai law hkra galaw ai rai nna, lang kau sai magri mang kade rai nga sai hpe kadai mung n daw dan lu nga ai.
19 Hkawhkam Shawlumon gaw Nawku Htingnu a matu ja hte chya shatsawm da wu ai; dai ni gaw tawn hkungri, Karai Kasang hpe nawng ya ai muk mara tawn na ku ni,
20 pyengdin shadun ni hte shatawng shada da ai hte maren, Chyoi Pra Htum ai Shara a man e shatu ai ja jet hte galaw da ai pyengdin ni;
21 mawn sumli da ai nampan ni, pyengdin ni, lakap ni,
22 pyengdin lakap ni, angdung ni, manam pyaw ai baw bang ai ban ni, grung ai wan n-ga hpai na wan ban ni rai nga ai. Ndai ni yawng hpe ja jet hte galaw da nga ai. Nawku Htingnu a shinggan chyinghka ni hte Chyoi Pra Htum ai Shara de shang wa ai chyinghka ni hpe ja hte sup da ma ai.