36
(2Hk 23: 30-35)
1 Yuda amyu masha ni gaw Yoshia a kasha Yoahaza hpe lata la nhtawm namman jaw ya let Yerusalem mare hta hkawhkam shatai da nga ma ai.
2 Shi gaw Yuda Hkawhkam tai wa ai shaloi asak hkun masum ning rai nna Yerusalem mare hta shata masum up nga ai.
3 Egutu Hkawhkam Niko chyawm gaw shi hpe bawng masha hku rim woi mat wa nhtawm Yuda masha ni hpe gumhpraw pawng 7,500 hte ja pawng 75 shawa la wu ai.
4 Niko gaw Yoahaza a kanau Eliakim hpe Yuda hkawhkam shatai nhtawm shi a mying hpe Yehoiakim ngu nna galai kau ya wu ai. Yoahaza mahtang gaw Egutu mung de Niko e woi mat wa hkrum nga wu ai. Ref 36:4: Yer 22:11-12.
(2Hk 23:36-24:7)
5 Yehoiakim gaw Yuda hkawhkam tai wa ai shaloi asak hkun manga ning rai nna Yerusalem mare hta shi langai ning up hkang nga ai. Shi gaw dai Madu shi a Karai Kasang hpe shut kau wu ai. Ref 36:5: Yer 22:18-19; 26:1-6; 35:1-19.
6 Babelon Hkawhkam Nebuhkadneza gaw Yuda mung hpe shang gasat nna Yehoiakim hpe rim la nhtawm Babelon mung de hpri saidawng hte gyit nna Babelon mung de woi mat wa wu ai. Ref 36:6: Yer 25:1-38; 36:1-32; 45:1-5; Dan 1:1-2.
7 Nebuhkadneza gaw Nawku Htingnu na sut gan nkau mi la wa nna, Babelon mare na shi a hkawhkam htingnu hta tawn da wu ai.
8 Yehoiakim galaw ai amu magup ngu na shi galaw ai matsat shabat lam ni hpe Israela hte Yuda Hkawhkam ni a Labau Laika hta ka matsing da nga ai. Shi a kasha Yehoiahkin gaw shi a hkang hta galai nna hkawhkam tai wa sai.
(2Hk 24:8-17)
9 Yehoiahkin gaw Yuda hkawhkam tai wa ai shaloi asak shi matsat ning rai nna Yerusalem mare hta shata masum e nhtoi shi ya up nga ai. Shi mung dai Madu hpe shut kau wu ai.
10 Ya ginhtawng ta bai du jang, Nebuhkadneza gaw Yehoiahkin hpe bawng rim la nna Nawku Htingnu na sut gan arung arai ni hte hpawn, Babelon mung de woi wa wu ai. Dai hpang Nebuhkadneza gaw Yehoiahkin a kawa toi rai nga ai Zedekia hpe Yuda mung hte Yerusalem a hkawhkam shatai da wu ai. Ref 36:10: Yer 22:24-30; 24:1-10; 29:1-2; 31:1; Eze 17:12-13.
(2Hk 25:1-21; Yer 52:1-3a)
11 Zedekia gaw Yuda hkawhkam tai wa ai shaloi asak hkun langai ning rai nna Yerusalem mare hta shi langai ning up nga ai. Ref 36:11: Yer 27:1-22; 28:1-17.
12 Shi mung dai Madu hpe shut hpyit kau nna dai Madu a mungga htawn tsun ai myihtoi Yeremia a ga hpe myit nem ai hte madat ai n rai.
(2Hk 25:1-21; Yer 52:3b-11)
13 Zedekia gaw Karai Kasang a mying ningsang hta shi hpe dagam nna sadi dung shangun ai Hkawhkam Nebuhkadneza hpe gumlau wu ai. Shi gaw myit malai lu nna dai Madu Israela a Karai Kasang hpang de kayin wa na matu ja ja ningdang wu ai. Ref 36:13: Eze 17:15.
14 Dai hta kaga, Yuda ningbaw ni, hkinjawng ni hte amyu masha ni gaw shanhte a grup yin hkan nga nna hpara sumla ni hpe nawku ai masha amyu baw ni a yubak kasi hta hkan let, dai Madu shi nan shachyoi shapra da sai Nawku Htingnu hpe mung awu asin di kau ma ai.
15 Dai Madu shanhte a kaji kawa ni a Karai Kasang gaw shanhte hpe mung, Nawku Htingnu hpe mung naw shangam da mayu wu ai majaw shi a amyu masha ni hpe shadum jahprang na matu myihtoi ni hpe matut shangun da wu ai.
16 Rai ti mung shanhte gaw Karai Kasang a kasa ni hpe asawng asang di nhtawm Karai Kasang a mungga hpe n kaw n law di nna shi a myihtoi ni hpe mani asawng kau mu ai majaw hpang jahtum dai Madu gaw shi a amyu masha ni hpe lawt lam htum mat hkra masin kahtet bu nga ai.
17 Dai rai nna dai Madu gaw shanhte hpe sa htim gasat na matu Babelon hkawhkam hpe shangun dat wu ai. Hkawhkam wa gaw Nawku Htingnu kata e nga ai Yuda la shabrang ni hpe du hkra, sat kau wu ai. Shi gaw kaji kaba hpe mung, lasha numsha ni hpe mung, machyi masha hte hkam kaja ai masha kadai hpe n nga, matsan dum ai myit rawng nga ai n rai. Karai Kasang gaw shanhte yawng hpe shi a lata de ap kau ya nga ai. Ref 36:17: Yer 21:1-10; 34:1-5.
18 Babelon hkawhkam gaw Nawku Htingnu a sut gan arung arai hte hkawhkam hte shi a du salang ni a sut gan nlang ni hpe gasat hpya la nna Babelon mare de la wa wu ai.
19 Shi gaw Nawku Htingnu hte mare hpe mung hkawhkam htingnu sut gan ni yawng nat kau nhtawm mare bunghku hpe mung agrawp shaza kau wu ai. Ref 36:19: 1Hk 9:8.
20 Shi gaw naw hkrung nga ai ni yawng hpe Babelon mung de woi wa ai rai nna shanhte gaw shi hte shi a amyu matu mara ni hpe Persi mungdan a daru magam n-gun rawt wa ai aten du hkra, mayam amu galaw let daw jau nga ma ai.
21 ?Lamu ga hpe bansa jaw ai htung tara n hkan shatup ai majaw dai hpe bai shatup na matu lamu ga gaw sanit shi ning tup katsi katsang shara tai mat na ra ai,? ngu nna myihtoi Yeremia a ga hku dai Madu tau tsun da ai ga gaw dik wa nga sai. Ref 36:21: Yer 25:11; 29:10.
(Ezr 1:1-4)
22 Persi Hkawseng Kuru hkaw dung ai shawng shaning hta myihtoi Yeremia a ga hku tsun nu ai Madu a ga gaw dik wa nga sai. Dai rai nna shi gaw ndai hkang da ai ga hpe ka shapraw nna shi up ai mungdan shara shagu hkan ja ja hti ndau na matu Kuru hpe shadut galaw shangun wu ai. Dai aming gaw ndai hku rai nga ai:
23 ?Ndai gaw Persi Hkawseng Kuru a hkang da ai ga rai nga ai. Dai Madu Sumsing lamu a Karai Kasang gaw ngai hpe mungkan ga ting hpe up hkang shangun ni ai. Yuda mung Yerusalem mare hta shi a matu Nawku Htingnu langai gap na lit ngai hpe jaw da ni ai. Ya chyawm gaw Karai Kasang a amyu masha ni rai nga myit dai nanhte yawng gaw dai de sa wa manu; dai Madu nanhte a Karai Kasang gaw nanhte hte rau nga nga u ga law.? Ref 36:23: Esa 44:28.