1-3 Htung hte maren jasan jaseng lu ai hkinjawng ni grai n law ai hte Yerusalem mare e amyu masha ni law law garai n hpawng nga ma ai majaw shawng na shata ngu na galaw ang ai aten hta, amyu masha ni dai Shalai Wa Ai Poi n lu galaw kau ma ai. Dai re ai majaw Hkawhkam Hezekia, shi a du salang ni hte Yerusalem mare masha ni gaw shata lahkawng ngu na hta dai poi galaw na matu myit jahkrum da nga ma ai. Hkawhkam wa gaw Israela hte Yuda mung na amyu masha ni yawng hpang de shiga shana shangun dat wu ai. Shi gaw Ehprim hte Manashe amyu bawsang ni hpe Yerusalem mare na Nawku Htingnu de sa na matu mung, dai Madu Israela a Karai Kasang hpe shagrau sha-a na Shalai Wa ai Poi galaw ai hta shang lawm na matu, shanhte hpe laksan saw shaga dat ai laika hte shaga dat wu ai. 4 Hkawhkam wa hte amyu masha ni gaw shanhte galaw na amu a majaw kabu awng sharawng nga ma ai rai nna, 5 shanhte gaw dingdung maga Dan mare kaw nna dingda maga Berasheba du hkra nga ai Israela masha ni yawng Yerusalem mare de sa zup nna shawng de na hta grau law ai masha wunawng wuwa gaw Tara hte maren, Shalai Wa Ai Poi galaw na matu saw shaga dat ma ai. 6 Hkawhkam wa hte shi a du salang ni hkang dat mu ai hte maren, shiga shana ai ni gaw Yuda hte Israela mung ting de jawt hkawm let ning ngu saw shaga dat ma ai:

?Israela amyu masha ni e, nanhte gaw Asuri e gasat ka-up la ai kaw na naw hkrung nga lu ai ni rai myit dai. Dai re ai majaw dai Madu Abraham, Isak hte Yaku a Karai Kasang hpang de ya kayin wa marit; shi nanhte kaw kayin wa na ra ai. 7 Dai Madu shanhte a Karai Kasang hpe n kam n sham ai nanhte a kaji kawa ni hte hpu nau Israela masha ni zawn hkum rai nga myit. Nanhte mu lu myit dai hte maren, shi shanhte hpe laja lana ari jaw nu ai. 8 Shanhte zawn myit hkum ja nga myit; dai Madu a ga hpe madat mara nga mu. Dai Madu nanhte a Karai Kasang gaw htani htana a matu shachyoi shapra da ai Yerusalem mare na Nawku Htingnu de sa nhtawm shi hpe nawku mu, shaloi shi nanhte hpe galoi mung pawt bu na ra ai n rai. 9 Nanhte gaw dai Madu hpang de kayin wa myit dai rai yang, bawng masha ni zawn woi mat wa ai hkrum ai nanhte a kahpu kanau jinghku ni hpe matsan yu dum nna, dum nta de bai nhtang wa shangun na ra ai. Dai Madu nanhte a Karai Kasang gaw myit galu kaba nna matsan dum nga ai majaw nanhte shi hpang de kayin wa jang, shi nanhte hpe hkap la na ra ai.?

10 Shiga gun ai ni gaw Ehprim hte Manashe amyu bawsang ni nga ai mare shagu hte dingdung maga Zebulun amyu bawsang ni nga ai shara de du hkra jawt hkawm ma ai; rai ti mung amyu masha ni chyawm gaw shanhte hpe mani asawng nna ashu kau ma ai. 11 Ti mung, Ashe, Manashe hte Zebulun amyu bawsang ni hta na masha nkau mi mahtang Yerusalem mare de sa wa na lam ra sharawng nga ma ai. 12 Hkawhkam wa hte shi a du salang ni hkang dat ai ga hta hkan let, shi a myit ra hkan lu hkra nga, Karai Kasang mung Yuda mung hta amu galaw ai hte amyu masha ni hpe shanhte daw dan ai hte maren myit hkrum shinggyin da wu ai.

13 Shata lahkawng ngu na hta matsi n rawng ai muk sha na matu amyu masha wunawng wuwa ni gaw Yerusalem e hpawng nga ma ai. 14 Shanhte gaw Yerusalem e shagu hkungga hte manam pyaw ai baw nat yang lang ai tawn hkungri ni yawng htawm kau nna Kidron Kadit de sa kabai kau ma ai. 15 Dai shata a shi mali ya shani e, Shalai wa Ai Poi shagu hkungga a matu sagu kasha ni sat ma ai. Htung hte maren n san n seng ai hkinjawng ni hte Lewi ni chyawm gaw grai kaya dum nna shanhte hkum hpe dai Madu hta ap nawng ma ai hte Nawku Htingnu kata hta ya shanhte wan nat hkungga nawng ya lu manu ai. 16 Shanhte gaw Karai Kasang a masha Mawshe a Tara hta tsun matsun da ai hte maren Nawku Htingnu kata hta shara la shajang ma ai. Lewi masha ni mung hkungga asai hkinjawng ni hpe jaw ya mu ai rai nna shanhte gaw dai hpe tawn hkungri ntsa e lapri bun ma ai. 17 Amyu masha law law wa htung hte maren n san n seng nga ma ai majaw Shalai Wa Ai Poi a matu sagu kasha ni hpe shanhte n sat lu ma ai rai nna shanhte a matu Lewi masha ni dai amu hpe galaw ya ma ai; dai Madu hpe sagu kasha ni sat nawng nga ma ai. 18 Dai sha n-ga, Ehprim, Manashe, Yisahka hte Zebulun amyu bawsang ni kaw na du sa wa ai masha law law hte gaw htung hte maren jasan jaseng ai amu n galaw ma ai. Shanhte gaw Shalai Wa Ai Poi hpe n htap n htuk ai hku masat poi galaw nga ma ai. Dai rai nna Hkawhkam Hezekia gaw shanhte a matu ndai akyu hpyi ga hte hpyi nem wu ai: 19 ?O Madu, anhte a kaji kawa ni a Karai Kasang e, htung hte maren shanhte n san n seng shajang nga ma ti mung, myit masin mahkra hte nang hpe nawku nga ai ni a mara hpe na a mai kaja ai myit hte mara dat ya u law.? 20 Dai Madu gaw Hezekia a akyu hpyi ga htan ya nhtawm amyu masha ni a mara raw dat ya nna shanhte hpe n machyi shangun wu ai. 21 Yerusalem mare hta hpawng nga masai amyu masha ni gaw sanit ya tup kabu gara ai myit hte Matsi N Rawng Ai Muk Sha Poi galaw ma ai; Lewi masha ni hte hkinjawng ni mung shanhte a n-gun lagaw mahkra hte dai Madu hpe shani shagu shakawn kungdawn ma ai. 22 Hezekia mung dai Madu hpe nawku daw jau ai hta chye chyang kungkyang ai Lewi masha ni hpe shakawn shagrau nga wu ai.

Ya shanhte gaw sanit ya tup dai Madu shanhte a kaji kawa ni a Karai Kasang hpe shakawn kungdawn let shagu hkungga ni nawng ya ngut jang, 23 shanhte yawng gaw kaga sanit ya poi bai de na lam bawng ban jahkrup da ma ai. Dai re ai majaw shanhte gaw kabu gara ai hte poi galaw ma ai. 24 Hkawhkam Hezekia gaw amyu masha ni sat sha na matu usu hkying mi hte sagu hkying sanit jaw ya wu ai; du salang ni mung shanhte hpe usu hkying mi hte sagu mun mi jaw ya ma ai. Hkinjawng wunawng wuwa ni mung htung hte maren jasan jaseng la shajang nga ma ai. 25 Dai re ai majaw, Yuda amyu masha ni, hkinjawng ni, Lewi ni hte dingdung maga de na yu sa ai amyu masha ni hte Israela hte Yuda mung hta shanu nga sai maigan masha ni ngu na masha shagu hte gaw kabu gara nga ma ai. 26 Dawi a kasha Hkawhkam Shawlumon a prat kaw nna ndai zawn re ai hpa mung n byin yu nga ai majaw Yerusalem mare hta kabu gara ai lam hte hpring nga ai. 27 Hkinjawng ni hte Lewi masha ni gaw amyu masha ni a matu dai Madu a shaman chyeju shaman ya na matu nga, hpyi nem ya nga ma ai. Sumsing lamu na shi a nta hta shanhte a akyu hpyi ga ni hpe Karai Kasang na ya ai hte hkap la nga ai.