25
(2Hk 14:2-6)
1 Amazia gaw asak hkun manga ning hta hkawhkam tai wa nhtawm, Yerusalem hta hkun jahku ning up nga ai. Shi a kanu gaw Yerusalem mare na Yehoadin rai nga ai.
2 Shi gaw dai Madu awng sharawng ai amu hpe galaw ti mung myit lawm ai hku galaw ai n rai.
3 Shi gaw hkawhkam daru magam n-gun ngang ngang lu jum la ai hte rau shi a kawa hpe sat kau ai du salang ni hpe sat kau wu ai.
4 Rai ti mung shi chyawm gaw dai Madu hkang da nu ai Mawshe a Tara hta hkan ai kashu kasha ni hpe n sat kau ya nga ai. Dai tara hta, ?Shanhte a kashu kasha ni shut kau ai ru hka amu ni a majaw kanu kawa ni sat kau ai hkrum na n rai; kanu kawa ni shut kau ai ru hka amu ni a majaw kashu kasha ni sat kau ai hkrum na ma ai n rai; shi hkum nan shut kau ai ru hka amu a majaw dai wa chyu sha sat kau ai hkrum na rai nga ai.? Ref 25:4: Trj 24:16.
(2Hk 14:7)
5 Hkawhkam Amazia gaw shanhte a amyu lakung ni hkan nna hpyen hpung de shang na matu Yuda hte Benyamin amyu bawsang na amyu masha ni hpe jahpawng tawn da nna, hpyen hkying mi up hkang ai du, latsa up hkang ai du ni a npu hta tawn da nga ai. Dai hta asak hkun ning shing n rai dai hta lai ai masha yawng 300,000 lawm nga ai. Shanhte gaw hpyen hpung ni hta shang ram ai ni rai nna nri ni hte ninggang ni hpe atsawm sha chye lang sai hte majan gasat na matu shajin da nga masai.
6 Dai hta n-ga, Israela kaw na hpyenla 100,000 mi hpe mung gumhpraw tan mali daram hte saw shaga la wu ai.
7 Rai ti mung myihtoi langai mi gaw hkawhkam wa hpang de sa nhtawm shi hpe, ?Nang hte rau ndai Israela hpyenla ni hpe hkum woi et; dai Madu gaw dingdung mungdan na ndai masha ni hte rau nga nga ai n rai.
8 Shanhte gaw majan gasat ai hta nang hpe n-gun shaja ya na re ngu nang myit la mai nga ti mung, awng padang hte hkrat sum ai lam hpe jaw ya na daru magam n-gun gaw Karai Kasang kaw na sha rai nga ai rai nna na a gumlau hpyen ni nang hpe dang kau na mara ai,? ngu nna tsun wu ai.
9 Amazia gaw myihtoi wa hpe, ?Ataw, shanhte a matu gumhpraw jaw kau mase ai gaw kaning di na rai ta?,? ngu nna san wu ai.
Myihtoi wa gaw, ?Dai Madu gaw dai hta grau nna nang hpe nhtang jaw lu nga ai!,? ngu nna tsun htang wu ai.
10 Dai rai nna Amazia gaw gumhpraw hte saw shaga da ai hpyen hpung ni hpe shabai kau nhtawm dum nta de wa mat shajang na matu shanhte hpe tsun dat wu ai. Dai lam a majaw Yuda amyu masha ni hpe ahkup ahka nga mat hkra shanhte pawt let tinang nang a nta de wa mat shajang ma ai.
11 Amazia gaw nden marai shaja la let shi a luksuk hpe woi nhtawm Jum Kadit de woi sa wa wu ai. Dai yang e Edom hpyenla ni hpe htim gasat ma ai rai nna hpyenla mun mi hpe sat kau nhtawm,
12 kaga mun mi hpe mung rim la lu wu ai. Shanhte lu rim la ai bawng masha ni hpe Sela mare na ninggam pungding de woi lung wa nhtawm kabai jahkrat kau ma ai rai nna dai lunghkrung npu e shanhte yawng sat kau ai hkrum nga ma ai.
13 Dai aten shi hte rau gasat na matu Amazia e hkum shingdang kau hkrum ai Israela hpyenla ni gaw Samari hte Bet Horon lapran na Yuda mare ni hpe htim gasat ma ai rai nna masha hkying masum hte hpe sat kau nhtawm lanep law law magawn la nga ma ai.
14 Ya Amazia gaw Edom masha ni hpe gasat dang kau nna nhtang wa wu ai shaloi shanhte a hpara sumla ni hpe shi hte rau la wa nna dai ni hpe shadun nhtawm nawku let manam pyaw ai baw nat nawng ya wu ai.
15 Shing re ai amu a majaw dai Madu masin pawt ai rai nna Amazia hpang de myihtoi langai shangun dat wu ai. Shaloi myihtoi wa gaw, ?Na a lata kaw nna shanhte a masha ni hpe pyi n dang hkye la lu ai maigan karai ni hpe nang hpa majaw nawku nga n ta?,? ngu nna hpyi tsun wu ai.
16 Dai lam tsun ai shaloi Amazia gaw, ?Nang hpe hkawhkam wa a hpaji jaw hku anhte galoi aten kaw nna san da nga ga ni? Atsin zim rai nga u, shing n rai yang, ngai nang hpe sat kau na ra ai!,? ngu nna ginjang shawn wu ai.
(2Hk 14: 8-20)
17 Yuda Hkawhkam Amazia hte shi a hpaji jaw masha ni Israela hpe gasat na maw mawn ma ai. Dai hpang shi gaw Yehu a kashu, Yehoahaza a kasha Israela Hkawhkam Yehosha hpang de shada da gasat dakat hkat na lam shana dat wu ai.
18 Yehosha mung Amazia hpe ning ngu bai htang shana dat wu ai: ?Lang mi, Lebanon Bum ni hta tu ai ju singwum langai gaw marau hpun hpang de ning ngu shana dat wu ai: ?Nye a shadang sha hte hkungran na matu shayi sha ya sha e.? Shaloi na nam na matse labye langai lai sa wa nhtawm dai singwum hpe kabye agrawp kau wu ai.
19 Ya chyawm gaw Amazia e, nang gaw Edom masha ni hpe gasat dang kau nit dai majaw shakawng shakat dagrang nga ndai; rai ti mung nta e mahtang nga nga na matu ngai nang hpe hpaji jaw nngai. Nang hte na a amyu masha ni a ntsa e du wa na ru yak tsin-yam tsindam hpe nang hpa majaw shalut kabrawng nga n ta??
20 Rai ti mung Amazia mahtang n madat ya wu ai. Dai gaw Amazia hkrat sum na matu Karai Kasang a myit ra ai lam rai nga ai, hpa majaw nga yang shi gaw Edom hpara sumla ni hpe nawku kau wu ai.
21 Dai rai nna Israela Hkawhkam Yehosha gaw Yuda Hkawhkam Amazia hpang de yu sa nhtawm Yuda mung na Bet Sheme mare e shada hkrum nna gasat hkat ma ai.
22 Yuda hpyen luksuk mahtang sum mat ma ai rai nna hpyenla ni langai hte langai tinang nang a nta de hprawng mat wa shajang ma ai.
23 Yehosha mung Amazia hpe rim la nhtawm Yerusalem mare de woi wa wu ai. Dai mare de du jang, Ehprim Chyinghka lam kaw nna Jut Chyinghka du hkra nga ai mare bunghku hpe pe 600 du hkra run kau wu ai.
24 Shi gaw Obed Edom amyu matu ni sin ai Nawku Htingnu na aja gumhpraw mahkra hpe mung, Nawku Htingnu hta lang ai arung arai mahkra hpe mung, hkawhkam htingnu na sut gan ni hpe kashun la nna Samari mare de la mat wa wu ai. Shi gaw asak a matu shagyeng hkrum ai ni hpe mung shi hte rau woi mat wa wu ai.
25 Yuda Hkawhkam Amazia mahtang Israela Hkawhkam Yehosha hta shi manga ning jan hkra naw hkrung nga ai.
26 Amazia hkaw dung ai npawt kaw nna hpang jahtum du hkra na shi galaw ai amu magup hte a lam hpe Yuda hte Israela Hkawhkam ni a Labau Laika hta ka matsing da nga ai.
27 Shi gaw dai Madu hpe gumlau rawt ai kaw nna Yerusalem hta shi hpe gumlau na maw mawn mu ai majaw hpang jahtum Lahkisha mare de hprawng mat wa wu ai; rai ti mung shi a gumlau hpyen ni shi hpe hkan shachyut nhtawm dai yang e shi hpe sat kau ma ai.
28 Shi a moi mang hpe gumra ntsa e mara nhtawm Yerusalem mare de htaw wa nna Dawi a Mare na hkawhkam lupwa hta lup makoi da ma ai.