23
(2Hk 11:14-16)
1 Ya kru ning la ngut ai hpang, hkinjawng Yehoiada gaw ya amu galaw na aten rai sai, ngu nna daw dan wu ai. Dai rai nna luksuk du manga rai nga ai Yeroham a kasha Azaria, Yehohanan a kasha Ishmaela, Obed a kasha Azaria, Adaia a kasha Masea, hte Zihkri a kasha Elishahpat hte hte myit hkrum ga shaka galaw tawn da wu ai.
2 Shanhte gaw Yuda mung na mare nga manga yawng de jawt hkawm nhtawm shanhte hte rau Lewi masha ni hte amyu lakung yawng a ningbaw ni hpe Yerusalem mare de woi nhtang wa ma ai.
3 Shanhte yawng Nawku Htingnu kata hta jawm hpawng nna Hkawhkam kasha Yosha hte ga shaka tawn da nga ma ai. Shaloi Yehoiada gaw shanhte hpe, ?Ndai gaw si mat sai hkawhkam wa a kasha rai nga ai! Hkawhkam Dawi a amyu matu ni hkawhkam tai lu na nga nna dai Madu ga sadi tawn da nu ai hte maren ya shi gaw hkawhkam tai wa na wa rai nga sai. Ref 23:3: 2Sa 7:12.
4 Ndai gaw anhte galaw na amu rai nga ai. Ya Bansa Nhtoi hta bungli sa galaw ang ai hkinjawng ni hte Lewi masha ni hta na hpung mi gaw Nawku Htingnu a chyinghka ni sin na rai myit dai;
5 hpung mi gaw hkawhkam htingnu sin nhtawm ngam ai hpung mi mahtang Npawt Chyinghka e sin na rai myit dai. Amyu masha ni yawng chyawm gaw Nawku Htingnu wang kata hta hpawng nga na rai ma ai.
6 Bungli gun hpai ang ai hkinjawng ni hte Lewi masha ni hta kaga kadai mung Nawku Htingnu kata gap da ai nta de n shang lu nga ai. Shanhte gaw ap nawng da sai ni rai nga ma ai majaw mai shang ti mung, ngam ai amyu masha ni mahtang dai Madu a matsun maroi ga hpe madat let shinggan e nga nga na rai ma ai.
7 Lewi masha ni gaw shanhte a nhtu lang da let hkawhkam wa a grup yin e sin nhtawm hkawhkam wa hkawm sa ai shara shagu de hkan nang nna Nawku Htingnu kata de shang wa ai ni kadai hpe mung sat kau na rai nga ai,? ngu nna tsun wu ai.
8 Lewi masha ni hte Yuda amyu masha ni gaw Yehoiada a matsun maroi ga hkan galaw nga ma ai. Bansa Nhtoi e bungli hkring ai masha ni hpe n dat kau ai sha bungli sa wa ai ni hte pru wa ai ni hpe up hkang du ni shaga tawn da ma ai.
9 Yehoiada gaw Nawku Htingnu e tawn da ai Hkawhkam Dawi madu tawn ai nri ni hte ninggang ni hpe du ni a lata hta ap ya wu ai.
10 Hkawhkam wa hpe makawp maga na nga, Nawku Htingnu a man grup grup yawng maga de nhtu lang ai masha ni hpe jahkrat tawn da wu ai.
11 Dai hpang Yehoiada gaw Yosha hpe woi shapraw la nhtawm shi a baw ntsa e janmau shagup ya ai hte hkawhkam ahkang aya hte up hkang na Tara ni rawng ai laika kanan langai ap ya nna hkawhkam shatai la ma ai. Dai hpang hkinjawng Yehoiada hte shi a shadang sha ni Yosha hpe namman jaw ya ma ai. Masha shagu hte mung, ?Hkawhkam wa asak galu u ga law!,? ngu nna jahtau tsun ma ai.
12 Ahtalia gaw hkawhkam wa hpe amyu masha ni mahkawn shakawn let kabu gara nga ai nsen na wu ai shaloi, shawa masha ni hpawng de nga ai Nawku Htingnu de tin tin sa wa wu ai.
13 Shaloi dai yang e, hkawhkam nnan wa gaw Nawku Htingnu de shang wa ai chyinghka lam makau na, hkawhkam ni a matu san da ya ai shara ngu na shadaw makau e tsap nga nna grup grup de luksuk du ni hte pahtau dum ai ni nga nga ma ai hpe sa mu wu ai. Amyu masha ni yawng mung kabu gara jahtau garu nhtawm pahtau dum nga ma ai. Nawku Htingnu na mahkawn mangoi chye ai ni mung madum sumpyi amyu myu hte dai poi hta dum shakawn nga ma ai. Shi gaw yawn let shi a hpun palawng gang je kau nhtawm, ?Gumlau law! Gumlau law!,? ngu nna jahtau tsun dat wu ai.
14 Yehoiada gaw Ahtalia hpe Nawku Htingnu wang e n sat kau mayu ai majaw luksuk du ni hpe shaga la nhtawm, ?Sin langa ni nga ai lam yan lapran hku shi hpe woi shapraw mat wa mu; shi hpe hkye mawai la mayu ai wa kadai hpe mung sat kau lu na rai myit dai,? ngu nna tsun wu ai.
15 Shanhte gaw shi hpe rim la nna hkawhkam htingnu na Gumra Chyinghka lam de woi mat wa nhtawm sat kau ma ai.
(2Hk 11:17-20)
16 Hkinjawng Yehoiada gaw Hkawhkam Yosha hte amyu masha ni shi hte matut mahkai nna dai Madu a amyu masha tai wa lu mu ga nga, ga shaka tawn da shangun wu ai.
17 Dai hpang shanhte yawng gaw Bala nawku htingnu de sa nna run hpya kau ma ai. Dai yang na tawn hkungri ni hte hpara sumla ni hpe shanhte agrawp mani kau nna Bala hkinjawng Matan hpe mung tawn hkungri ni a man e sat kau da ma ai.
18 Yehoiada gaw Nawku Htingnu na amu ni woi galaw na matu hkinjawng ni hte Lewi masha ni hpe san tawn da wu ai. Shing rai Hkawhkam Dawi shanhte hpe galaw shangun ai bungli ni hte Mawshe a Tara hte maren, dai Madu a matu shagu hkungga nat nawng na amu galaw ma ai. Shanhte gaw mahkawn mangoi ai hte poi galaw ai amu ni hpe mung woi hpareng nga ma ai.
19 Htung hte maren n san n seng ai kadai hpe mung sin yu na matu Nawku Htingnu chyinghka ni hta lit la ya na sin langa ni hpe mung Yehoiada san tawn da wu ai.
20 Luksuk du ni, mare du salang ni hte ngam nga ai amyu masha ni yawng Yehoiada kaw sa zup nhtawm hkawhkam wa hpe Nawku Htingnu kaw nna hkawhkam htingnu de du hkra hkan bawp nang nga ma ai. Shanhte gaw chyinghka kaba hku shang wa nhtawm hkawhkam wa mung shi a tingnyang ntsa e dung nga wu ai.
21 Amyu masha ni yawng mung kabu gara ai hte hpring nga ma ai rai nna dai mare gaw sim sa nga ai; Ahtalia chyawm gaw sat kau ai hkrum nga nu ai.