2
(1Hk 5:1-18)
1 Hkawhkam Shawlumon gaw dai Madu hpe nawku na matu htingnu langai hte shi a matu hkawhkam htingnu langai hpe mung gap na daw dan da wu ai.
2 Shi gaw arung arai htaw shalai ya na masha 70,000 hpe mung, bum ga de nlung tawk na masha 80,000 hte hpe mung san tawn da wu ai. Magam bungli reng hkang na masha 3,600 hte hpe mung san tawn da wu ai.
3 Shawlumon gaw Turu Hkawhkam Hiram hpang de ning ngu nna shana dat wu ai: ?Nye wa a hkawhkam htingnu galaw na matu arit mailung tawng ni hpe dut ya nit dai zawn ngai hte mung galaw ga.
4 Dai Madu nye a Karai Kasang hpe shagrau sha-a na matu Nawku Htingnu langai, ngai galaw na nngai. Dai gaw chyoi pra ai shara tai nna nye a amyu masha ni hte ngai gaw dai Madu hpe manam pyaw ai baw hte manam hawm ai namji namya ni hpe nat nawng let mung, shi hpe nawku na nngai; shi hpe chyoi pra ai muk hkungga ni hpe mung anhte matut manoi nawng jau na ga ai; anhte gaw dai Madu anhte a Karai Kasang hpe shagrau sha-a na matu jahpawt de, shana de shagu, Bansa Nhtoi ni hta mung, Shata Praw Na Poi ni hta mung, kaga chyoi pra ai nhtoi ni hta mung wan nat hkungga nawng jau na ga ai. Ndai amu hpe htani htana hkan galaw nga na matu Israela masha ni hpe shi hkang da nu ai.
5 Anhte a Karai Kasang gaw kaga karai hta grau kaba nga ai majaw galu kaba ai Nawku Htingnu langai gaw gap na matu ngai yaw shada da we ai.
6 Sumsing lamu a dam lada ai lam yawng mayawng pyi shi hpe n rawng da lu nga ai majaw kadai mung Karai Kasang a matu Nawku Htingnu langai hpe teng teng gap lu na n rai nga ai. Dai re ai mi, Karai Kasang hpe manam pyaw ai baw nat nawng na hta kaga, Nawku Htingnu hpe ngai kaning di gap lu na rai nga a ta?Ref 2:6: 1Hk 8:27; 2Hl 6:18.
7 Dai re ai majaw tawk ka ai amu hta kung kyang nna aja, gumhpraw, magri mang hte hpri hpe mung chye galaw ai hte amut, shaba pu nsam hte hkyeng ai sumpan hpe maka chye ka ai masha langai shangun dat e. Dai wa gaw Yuda mung hte Yerusalem mare na nye wa lata san da sai lata sama masha ni hte rau amu galaw na rai nga ai.
8 Na a mailung kran masha ni kade wa kung kyang nga ma ai gaw ngai chye nga nngai rai nna Lebanon mung na arit hpun, chyamka hpun hte shinglim mailung tawng ni hpe ngai hpang de sa ya mi.
9 Hpunpyen law law lu la hkra hkyen lajang la ra ai amu hta na a masha ni hpe karum na matu nye a masha ni hpe shangun dat na ngai jin jin rai nga nngai; hpa majaw nga yang, ngai gap na ngu shatawng shada da ai ndai Nawku Htingnu gaw dam lada rai kaba nna hkik hkam nga ai.
10 Ngau shaw ai na a masha ni hpe hkaulan mam bushel 100,000, muk-yaw mam bushel 100,000, sabyi galan 110,000 hte tsanlun sau galan 110,000 nang hpe ngai jaw na nngai.
11 Hkawhkam Hiram gaw Shawlumon hpang de laika langai htang shana dat wu ai. Shi gaw, ?Dai Madu gaw shi a amyu masha ni hpe tsaw ra nga ai majaw shi nang hpe shanhte a hkawhkam shatai nu ai.
12 Sumsing lamu hte ginding aga hpe hpan tawn da ai dai Madu Israela a Karai Kasang hpe shakawn kungdawn mu. Shi gaw dai Madu a matu Nawku Htingnu hte shi a matu hkawhkam htingnu ni hpe ya gap na nga, chye na hkawn hkrang ai nyan hte kung kyang nna hpaji byeng-ya rawng ai kasha Hkawhkam Dawi hpe jaw nu ai.
13 Hpaji byeng-ya rawng nna lata amu hta kung kyang ai Huram mying ai wa hpe ngai shangun dat ya na nngai.
14 Shi a kanu gaw Dan a amyu bawsang hta na rai nhtawm shi a kawa gaw Turu mare na masha rai nga ai. Shi gaw aja, gumhpraw, magri mang, hpri, nlung hte hpunpyen ni kaw na kaning re ai arung arai ni hpe tawk ka shapraw na lam chye nga ai. Shi gaw lamu mut nsam, shaba pu nsam, hkyeng ai sumpan hte mani ai lachyit sumpan ni hpe maka chye galaw ai wa mung rai nga ai. Shi gaw tawk ka ai baw amyu myu hte shi hpe hpaji jaw ai maka hpa hpe mung chye galaw nga ai. Shi gaw lata maka pru ai na a masha ni hte mung, na a kawa Hkawhkam Dawi a matu galaw ya ai masha ni hte rau galaw u ga.
15 Dai rai nna nang ga sadi tawn da nit dai hte maren, hkaulan mam, muk-yaw mam, sabyi hte tsanlun sau ni hpe ya anhte hpe jaw mi.
16 Nang ra ai made arit hpun ni hpe Lebanon bum hkan na anhte kran nhtawm dai ni hpe gyit nna wawn shachyaw let Yopa mare du hkra wawn hte shayawng ya na ga ai. Dai yang kaw nna Yerusalem mare de hpai la na rai ndai,? ngu nna tsun wu ai.
(1Hk 6:1-38)
17 Hkawhkam Shawlumon gaw shi a kawa Dawi yuptung jahpan hta la ai hte maren, Israela mungdan e nga ai maigan masha ni a yuptung jahpan hta la wu ai. Dai mung e maigan masha yawng 153,600 nga nga ai.
18 Shanhte hta na 70,000 hpe lit gun hpai na matu mung, 80,000 hpe bum ga de nlung tawk na matu mung, 3,600 hpe amu galaw ai ni hpe hkan yu up hkang na matu mung lit shatsam da nga ai.