16
(1Hk 15:17-22)
1 Yuda Hkawhkam Asa hkaw dung ai sumshi kru ning hta Israela Hkawhkam Basha gaw Yuda mung hpe shang gasat nhtawm Yuda mung de shang pru lu ai lam ni yawng hpe dan di kau na nga, Rama mare hpe bunghku kum hpang wa wu ai.
2 Dai re ai majaw Hkawhkam Asa gaw Nawku Htingnu hte hkawhkam htingnu kata e ngam da ai ja gumhpraw ni hpe la nhtawm Damasku mare Suri Hkawhkam Benhadad hpang de dai arai ni hte rau ndai mungga hte hpawn shangun dat wu ai.
3 ?Anhte a kawa ni zawn anhte mung myit hkrum manang tai nga ga law. Ndai aja gumhpraw gaw na a matu kumhpa rai nga ai. Dai rai nna nang hte jinghku ga shaka shagrin da nga ai Israela Hkawhkam Basha a ga shaka hpe ya jang run kau u; shaloi nye a mungdaw kaw na shi a hpyen hpung ni hpe dawm la kau na ra ai.?
4 Benhadad mung Asa tang shawn ai ga hpe myit hkrum ya wu ai rai nna Israela masha ni hpe gasat na matu shi a up hkang du salang ni hte hpyen luksuk ni hpe shangun dat wu ai. Shanhte gaw Iyon, Dan, Abela Bet Mahka, hte arung arai mahkawng da ai dum ni nga ai Hpilisti mung na mare ni yawng gasat dang la kau ma ai.
5 Shing rai byin sai lam hpe Hkawhkam Basha na jang, shi gaw Rama mare bunghku kum ai amu jahkring nna kau da wu ai.
6 Dai hpang Hkawhkam Asa gaw Yuda mung ting na masha ni hpe shaga jahpawng da nhtawm Basha lang ai nlung hte hpunpyen ni hpe Rama mare kaw nna hpai shapraw la nhtawm dai ni hte Geba hte Mizpa mare bunghku kum ai hta lang na matu hkang da wu ai.
7 Dai aten hta myihtoi Hanani gaw Hkawhkam Asa hpang de sa nhtawm, ?Dai Madu na a Karai Kasang hpe kam hpa na malai Suri hkawhkam hpe kam hpa nga ndai majaw Israela hkawhkam a hpyen luksuk ni gaw na a lata kaw na lawt mat wa masai.
8 Ehtiopi hte Libya masha ni gaw hpyen leng law law hte gumra jawn ai masha law law rawng ai hpyen luksuk kaba n rai nga a ni? Rai ti mung nang gaw dai Madu hta shamyet shanat nga ndai majaw shanhte hpe dang kau lu ai awng padang nang hpe jaw ya nit dai.
9 Dai Madu hta sadi sahka myit rawng nga ai ni hpe n-gun atsam jaw ya na nga, shi gaw mungkan ga ting hpe mada azi yu wu ai. Nang chyawm gaw angawk ai hku galaw kau nit dai majaw ya kaw nna hpyen majan tut nawng ahkrum nga na nit dai,? ngu nna tsun wu ai.
10 Dai ga gaw Asa hpe masin grai pawt shangun nga ai rai nna myihtoi wa hpe htawng hta sharen da ma ai. Dai aten hta nan Asa gaw amyu masha nkau mi hpe mazut ai hku zingri hpang wa nu ai.
(1Hk 15:23-24)
11 Asa hkaw nnan dung hpang ai kaw nna jahtum du hkra hkrum hkra ai mabyin lam yawng hpe Yuda hte Israela ni a Labau Laika hta ka matsing da nga ai.
12 Asa Hkawhkam tai ai sumshi jahku ning hta laja lana re ai lagaw ana kap mat ai rai nna lagaw hten htu mat wu ai; rai ti mung karum la na matu dai Madu kaw n kayin wa ai sha tsi sarawun ni kaw mahtang kayin mat wa wu ai.
13 Lahkawng ning na ai hpang, shi si mat sai rai nna,
14 Dawi a Mare hta shi a matu shi tawk da ai lungrawk lup hta lup makoi da ma ai. Shanhte gaw shi hpe lup makoi na matu shi a moi mang hpe manam pyaw ai namji namya ni hte namman sau ni lang nna hkyen lajang da ma ai. Shi si mat ai a majaw yawn hkyen ai kumla hku nna grai kaba ai wan nat poi mung galaw ma ai.