19
(2Sa 10: 1-19)
1 Ya aten ram ram na mat ai hpang, Amon Hkawhkam Nahat si mat nna, shi a kasha Hanun hkawhkam tai wa sai.
2 Hkawhkam Dawi gaw, ?Shi a kawa Nahat ngai hpe chyeju madun ai hte maren, kasha Hanun hpe mung sadi dung ai jinghku lai hku, shi hpe ngai madun lu na rai nngai. Dai rai nna shi a matsan dum ai lam madun dan na matu kasa ni hpe Dawi shangun dat wu ai.
Shanhte gaw Amon mung de du ma yang, Hkawhkam Hanun hpe shaga la nna,
3 Amon ningbaw ni gaw hkawhkam wa hpe, ?Nang hpe matsan dum ai lam madun dan na matu, Dawi ndai masha ni hpe shangun dat ai gaw na nwa hpe shagrau sha-a nna galaw ai zawn nang myit nawn da wu ni? Kaja wa teng teng dai hku n rai law! Shanhte gaw anhte hpe gasat dang kau lu hkra nga, ndai mare hpe kin-yu yu na matu shi shanhte hpe ndai de shangun dat nga nu ai,? ngu nna tsun dan ma ai.
4 Hanun gaw Dawi a kasa ni hpe rim la nhtawm shanhte a nhka mun maga mi de na shangun kau ya let, dangbau du hkra shanhte a hpun palawng ni hpe rep kau ya nna dat kau dat wu ai.
5 Shanhte gaw dum nta de nhtang wa na matu grai kaya mat ma ai. Shing rai byin ai lam hpe Dawi na jang, nanhte a nhka mun ni bai tu galu wa ai aten du hkra n nhtang wa ai sha Yerihko mare hta nga nga mu, ngu nna htet dat wu ai.
6 Dawi hpe shanhte a gumlau hpyen shatai kau nga masai hpe Hkawhkam Hanun hte Amon masha ni dum hprang wa ma yang, shanhte gaw Lahta Mesopotamia hte Suri ginwang Mahka hte Zoba mung hkan na hpyen leng hte gumra jawn ai masha ni hpe saw shaga la na nga, gumhpraw tan mali shi daram jaw ma ai.
7 Shanhte gaw gumra hpyen leng mun masum hkying lahkawng hpe saw shaga la lu ma ai. Hkawhkam Mahka wa a hpyen hpung mung sa nna Medeba makau e dap jung tawn wu ai. Amon masha ni mung shanhte a mare ni kaw nna pru sa wa nhtawm htim gasat na matu shajin da nga masai.
8 Ya dai zawn byin ai shiga hpe Dawi na jang, Yoab hte hpyen luksuk mahkra hte hpe shangun dat wu ai.
9 Dai Amon masha ni mahtang pru sa wa nhtawm shanhte a mare daju ngu na Raba mare chyinghka lam e shara la da nga ma ai. Karum la na matu du sa wa ai hkawhkam ni chyawm gaw pa ga de shara la shajang nga ma ai.
10 Yoab gaw gumlau hpyen hpung ni shi hpe ashawng ahpang htim gasat na hkyen nga ai hpe mu jang, Israela hpyenla ni hta na kaja htum ai hpyenla ni hpe shi lata la nhtawm Suri masha ni hte man hkrum rai shara la da shangun wu ai.
11 Naw ngam ai shi a hpyen hpung ni hpe shi a kanau Abishai up hkang ai npu hta tawn da nhtawm Amon masha ni hte myi man hkrum re ai hku shara la da shangun wu ai.
12 Yoab gaw shi hpe, ?Suri masha ni ngai hpe dang nga ma ai hpe nang mu jang, ngai hpe sa karum la e. Amon masha ni nang hpe dang nga ma ai rai yang, ngai nang hpe sa karum la na de ai.
13 N-gun dakan nna nden shaja nga u! Anhte a amyu masha ni hte anhte a Karai Kasang a mare ni a matu ja ja gasat ga. Dai Madu gaw shi ra ai hku hte maren galaw u ga,? ngu nna tsun wu ai.
14 Yoab hte shi a masha ni shawng htim gasat na matu rawt lung wa ma yang, Suri masha ni hprawng htaw mat ma ai.
15 Suri masha ni kagat hprawng htaw mat wa ai hpe Amon masha ni mu jang, shanhte mung Abishai kaw na hprawng mat wa nhtawm mare de htingnut mat wa ma ai. Dai hpang Yoab gaw Yerusalem de nhtang mat wa wu ai.
16 Suri masha ni gaw Israela masha ni a man e sum nga masai hpe shanhte dum chye wa ma ai shaloi, Uhprat hka nu a sinpraw maga, Suri ginwang ni hkan nga ai hpyen hpung ni hpe shaga la nhtawm Zoba Hkawhkam Hadadeza a hpyen luksuk hpe up hkang ai Shobak a up hkang ai npu hta shanhte hpe tawn da ma ai.
17 Dawi gaw dai shiga hpe na jang, shi gaw Israela hpyen hpung ni hpe shinggyin la nhtawm Yawdan hka rap nna Dawi hte man hkrum rai sai Suri masha ni shara la da nga ai de man yawng nna shara la da shangun wu ai. Gasat gala ai lam hpang wa ai hte,
18 Suri hpyen luksuk hpe Israela masha ni e gawt nhtang kau lu nga ma ai. Dawi hte shi a masha ni chyawm gaw Suri gumra leng gawt ai masha hkying sanit hte lagaw hpyenla mun mali hte hpe sat kau ma ai. Shanhte gaw Suri a up hkang du Shobak hpe mung sat kau ma ai.
19 Hadadeza a up hkang ai npu hta taw nga ai hkawhkam ni mahtang Israela amyu masha ni a majaw shanhte sum mat ma ai hpe dum chye wa ma ai shaloi, Dawi hte ngwi pyaw sim sa lam galaw nhtawm shanhte npu hta taw nga ma ai.
20 Suri masha ni mung Amon masha ni hpe bai sa karum la na matu galoi mung n sharawng nga masai.