SHAKAWN KUNGDAWN 83
1 O Karai Kasang e, azim sha hkum nga nga et;
chyasi chyamang hkum rai nga et, atsin sha mung hkum nga nga et!
2 Yu u, na a gumlau hpyen ni gumlang nga ma ai;
nang hpe n ju n dawng nga ai ni rawt malan nga ma ai.
3 Shanhte gaw na a amyu masha ni hpe gumlang na matu mayun hpaji daw nga ma ai;
nang e makawp maga da nga ai ni hpe mung, shanhte gumlang na maw mawn nga ma ai.
4 Shanhte gaw, ?Sa marit, shanhte a mungdan hpe anhte jahten kau ya ga:
shing rai, Israela amyu ni htani htana malap kau ai hkrum nga mu ga,? nga nna tsun ma ai.
5 Shanhte gaw shanhte a yaw shada ai lam hpe jawm myit hkrum da ma ai,
nang hpe gumlang na matu, jinghku hpung langai hpe jawm hpaw ninghtan da nga ma ai:
6 Edom amyu masha ni hte Ishmaela amyu ni,
Moba amyu masha ni hte Hagara amyu ni;
7 Gebala amyu ni, Amon hte Amalek amyu ni,
Hpilisti ni hte Turu amyu masha ni lawm nga ma ai.
8 Asuri masha ni mung, Lawt a aru arat ni rai nga ai
Amon masha ni hte Moba masha ni hpang maga de, jinghku hpyen hpung hta shang lawm nga masai.
9 Shanhte hpe Midian masha ni hte Kishon hka nu makau e,
Sisera hte Yabin yan hpe di ai zawn di kau u.Ref 83:9: Trg 7:1-23; Trg 4:6-22.
10 Nang shanhte hpe Endora e dang kau ai hte
shanhte a moi mang ni gaw ga ntsa e, yat taw mat mu ai.
11 Oreb hte Zeeb hpe nang galaw kau ai zawn, shanhte a ningbaw ningla ni hpe mung di u;
Zeba hte Zalmuna hpe nang galaw kau ai zawn, shanhte a du salang ni yawng hte hpe mung dang kau u, Ref 83:11: Trg 7:25; Trg 8:12.
12 ?Karai Kasang madu da ai lamu ga hpe anhte gaw,
anhte a matu la kau na ga ai,? nga nna kadai wa tsun kau nga a ta?
13 Karai Kasang e, shanhte hpe ga nhpu zawn agat kau nna;
nbung e shapoi kau ai numhkaw zawn, shapoi kau u.
14 Maling dinggram hpe wan hte hkru kau nga ai,
bum ni hpe jahkat kau ai sharaw wan shinglet numli ni zawn:
15 na a nbung laru hte shanhte hpe hkan shachyut nang nna,
na a nbung bungga ni hte shanhte hpe jahkrit kau u.
16 Madu e, shanhte a myi man ni hpe, kaya kahpa hte ka-up da ya u;
na a daru magam n-gun, shanhte hpe hkam la shangun u.
17 Shanhte gaw htani htana sum mat ai hte jahkrit shama ai hkrum sha nga mu ga;
tsep kawp sari jahpoi hkrum ai hte shanhte si htum mat mu ga.
18 Nang chyu sha Madu rai nga ai lam hte ga ntsa ting hta e,
Tsaw Htum ai Wa rai nga ai lam hpe shanhte chye na la mu ga law.