SHAKAWN KUNGDAWN 80
1 Israela amyu masha ni a Sagu Rem Wa e, anhte hpe madat ya mi;
sagu hpung ni a ningbaw wa e, anhte hpe na ya mi.
Singkaw tu ai hkrung kanu ni a ntsa na, na a tingnyang hta dung nga ai wa e,Ref 80:1: Pru 25:22.
2 Ehprim, Benyamin hte Manashe amyu baw ni hpe nang hkum nan shadan dan nna;
na a daru magam n-gun madun dan ai hte anhte hpe hkye hkrang la na du sa wa rit!
3 Karai Kasang e, anhte hpe bai woi nhtang wa mi law!
Na matsan dum lama ai myit anhte hpe madun ya mi, shaloi anhte hkye hkrang
la ai hkrum na raga ai!
4 Chyahtum Chyalai n-gun rawng ai Madu Karai Kasang e, nang gaw galoi du hkra,
na a amyu masha ni a akyu hpyi ai ga ni a jaw e, pawt nga na n ni?
5 Nang gaw anhte a yawn hkyen ai hpe lusha zawn jaw sha nna;
myi prwi hpe gawm kaba hta jaw lu nga ndai.
6 Nang gaw anhte a lamu ga hpe, grup yin mungdan ni hpe sa gasat shangun nga ndai;
anhte a gumlau hpyen ni mung anhte hpe n kaw n law di mi ai.
7 Chyahtum Chyalai n-gun rawng ai Karai Kasang e, anhte hpe bai woi nhtang wa
mi law!
Na matsan dum lama ai myit anhte hpe madun ya mi, shaloi anhte hkye hkrang
la ai hkrum na raga ai!
8 Nang gaw Egutu mung kaw na sabyi ru langai mi hpe la wa ndai;
kaga amyu baw ni hpe nang gawt shapraw kau nhtawm,
dai hpe shanhte a lamu ga hta, hkai nit dai.
9 Sabyi hpun tu kaba wa lu na matu lamu ga hpe nang jasan shatsawm ya nga ndai;
de a hpun ru ni ga de ru jung mat wa nna dai gaw lamu ga ting a ntsa e, hkram wa
nga sai.
10 Dai gaw kawng ni hpe, shi a shingnip hte hkung ka-up nga ai;
de a lakung ni mung kaba la ai arit hpun ni hpe htawng nga sai.
11 De a lakung ni gaw Nawng Kaba de lagra nna,
Uhprat hka nu du hkra, hkrawn jat wa sai.
12 Dai hpe kum shinggrup da ai shakum ni hpe nang hpa majaw jahten kau nga n ta?
Ya gaw, ndai lam hku lai sa ai ni kadai rai ti mung,
dai sabyi si ni hpe lagu di la lu nga manu ai;
13 dai hpun hpe wa ndu ni e, kabye agrawp mat wa nna,
matse labye dusat ni, dai hte hkru kat nga ma ai.
14 Chyahtum Chyalai n-gun rawng ai Karai Kasang e, anhte hpe mada mara la mi!
Sumsing lamu kaw nna anhte hpe gum yu nna,
na a amyu masha ni hpe hkye hkrang la na matu, du sa wa rit!
15 Nang kaba shangun ai sabyi hpun lawn hte
nang hkai da ai sabyi ru ni hpe sa makawp maga la u.
16 Anhte a gumlau hpyen ni dai hpe wan nat kau nna, kran daw kau nga masai;
shanhte hpe masin kahtet ai hte yu nna shanhte hpe jahten kau u!
17 Nang lata la sai amyu masha ni ngu ai, n-gun grai ja wa hkra
nang sharawt tawn ai amyu hpe mada mara ai hte makawp maga ya nga u.
18 Anhte galoi mung, nang kaw na htak mat wa na ga ai n rai;
anhte hpe jahkrung la mi, anhte nang hpe shakawn nga na ga ai.
19 Chyahtum Chyalai n-gun rawng ai Madu Karai Kasang e, anhte hpe bai woi nhtang
wa mi law.
Na a matsan dum lama ai myit anhte hpe madun dan mi, shaloi anhte hkye hkrang
la ai hkrum na raga ai.