SHAKAWN KUNGDAWN 78
1 Nye a amyu masha ni e, nye a sharin shaga ai ga hpe madat la mu,
ngai tsun ai ga hpe mung madat la mu.
2 Anhte a kaji kawa ni anhte hpe tsun dan sai majaw,
anhte chye da sai magam amu ni hte;Ref 78:2: Mat 13:35.
3 lai sai prat kaw nna magap da ai mauhpa lam ni hpe
hpaji ga ni hte nanhte hpe ngai tsun shaleng dan na nngai.
4 Dai lam ni hpe anhte a kashu kasha ni a man e, makoi da na ga ai n rai;
Madu a daru magam n-gun a lam, shi a galu kaba ai magam amu ni hte
shi galaw dan sai mauhpa lam ni hpe
hpang ban prat masha ni hpe anhte htawn tsun dan na ga ai.
5 Nang gaw Israela amyu masha ni hpe jep ai tara ni hte;
Yaku a aru arat ni hpe hkang da ai tara ni hte jaw da ya nit dai.
Madu gaw shi a hkang da ai tara ni hpe shanhte a kashu kasha ni hpe
sharin ya na matu;
anhte a kaji kawa ni hpe tsun matsun da nu ai.
6 Shing rai, hpang ban prat na masha ni gaw
shanhte a kashu kasha ni hpe matut nna kayin tsun dan lu mu ga.
7 Ndai lam hku nna, shanhte mung Karai Kasang hpe kam hpa na mara ai;
shi galaw dan sai amu ni hpe shanhte malap kau na mara ai n rai,
dai sha n ga, shi a hkang da ai tara ni hpe tut nawng madat mara na mara ai.
8 Shanhte gaw gumlau ai ni hte n madat n mara ai ni,
Karai Kasang hpe kam hpa ai lam hta galoi mung n ngang ai ni hte
shi hta sadi sahka myit n dung ai
shanhte a kaji kawa ni zawn rai nga na ma ai n rai.
9 Ndan pala ni hpe chye lang nna gasat chye ai
Ehprim a kashu kasha ni gaw majan shani e, hprawng mat ma ai.
10 Shanhte gaw Karai Kasang hte ga shaka tawn da ai hpe n mazing da nga ma ai;
shi a hkang da ai tara ni hpe hkan sa na matu, ningdang kau nga ma ai.
11 Shanhte gaw shi galaw dan sai magam amu ni hte
shanhte mu yu sai mauhpa lamik kumla ni hpe malap kau manu ai.
12 Egutu mung hta nga ai Zoan prang yang hta e,
shanhte a kaji kawa ni yu nga yang, Karai Kasang gaw mauhpa lamik kumla
ni hpe madun dan nu ai.Ref 78:12: Pru 7:8-12:32.
13 Shi gaw panglai hka hpe lahkawng brang garan kau nna,
hka hpe lahkawng maga de shakum zawn shatsap da ai hte shanhte hpe dai lam
hku, woi lai mat wa nu ai.Ref 78:13: Pru 14:21-22.
14 Shi gaw shanhte hpe shani e sumwi hte
shana tup wan a nhtoi hte woi wa mu ai. Ref 78:14: Pru 13:21-22.
15 Nam mali na lunghkrung ni hpe shi kayat hpaw nna;
shanhte hpe sung ai shara ni kaw na hka jaw lu mu ai.
16 Shi gaw lunghkrung hta na hka hpe shapraw ya nhtawm;
hka nu zawn lwi shangun nga ai. Ref 78:16: Pru 17:1-7; Bhk 20:2-13.
17 Rai ti mung, shanhte gaw Karai Kasang hpe gumlang ai yubak matut galaw nga ma ai;
nam mali e mung, Tsaw Htum ai Wa hpe shanhte gumlau kau mu ai.
18 Shanhte gaw shanhte sha mayu ai lusha hpe hpyi ai hku nna,
Karai Kasang hpe dingsa sa chyam yu nga ma ai.Ref 78:18: Pru 16:2-15; Bhk 11:4-23,32-35.
19 ?Nam mali kata e, Karai Kasang gaw anhte hpe lusha jaw ya lu na kun?
20 Lunghkrung hpe shi gayat ai hte
hka hpungtun hte lwi pru wa shangun ai gaw teng nga sai;
rai ti mung, shi anhte hpe muk lusha hte shi a amyu masha ni hpe shan jaw ya lu
na kun?,?
nga nna Karai Kasang hpe gumlang ai hte shanhte tsun ma ai.
21 Shing rai, shanhte tsun shaga ai ga hpe shi na wu ai shaloi, Madu gaw
masin pawt nga wu ai;
shi a amyu masha ni hpe wan hte shi gasat nna,
shi a masin kahtet ai gaw shanhte a ntsa e grau grau nna law jat wa nu ai.
22 Hpa majaw nga yang, shanhte shi hpe n kam nga ma ai hte
shi hkye hkrang la lu nga ai lam hpe shanhte n kam nga ma ai majaw rai nga ai.
23 Rai ti mung, shi gaw ntsa na lamu hpe tsun wu ai hte;
sumsing lamu na chyinghka ni hpe hpaw na matu hkang dat wu ai;
24 shi gaw shanhte sha na matu, Manna hpe jahtu ya nhtawm;
sumsing lamu na nsi naisi shanhte hpe jaw mu ai.Ref 78:24: Yhn 6:31.
25 Shing rai, shanhte gaw lamu kasa ni a lusha sha lu ma ai;
shanhte marit ai lam yawng mayawng Karai Kasang shanhte hpe jaw ya mu ai.
26 Sinpraw nbung hpe mung shi bung shangun nna,
shi a daru magam n-gun hte dingda nbung hpe kabrawng shangun nhtawm;
27 hkin-gau ntsa e, nga ai zaibru zawn law nga ai u ni hpe mung,
shi a amyu masha ni a matu, shi jahkrat jaw ya nga sai.
28 Shanhte a dap ka-ang, shanhte a nga shara
sum ni a makau grup yin hta dai ni hpe jahkrat ya wu ai.
29 Shing rai, amyu masha ni sha lu ma ai hte myit dik nga ma ai;
shanhte ra marit nga ai lam, Karai Kasang shanhte hpe jaw ya nga sai.
30 Rai ti mung, shanhte dai daram sha lu nga ninglen,
myit dik ai lam n lu la nga ma ai.
31 Dai majaw, Karai Kasang shanhte hpe masin pawt wa nna;
shanhte a n-gun ja htum ai ni hte
Israela ni a share shagan shabrang ni hpe shi sat kau ya wu ai.
32 Ndai lam ni yawng hpe shanhte hkrum kadup nga ma ti mung;
amyu masha ni gaw yubak naw galaw shanang nga ma ai,
shi a mauhpa lamik kumla hte madun dan ti mung, shanhte shi hpe n kam hpa nga
ma ai.
33 Dai re ai majaw, shanhte a shani nhtoi ni hpe nsa zawn;
shanhte a asak ni hpe kajawng kaja re ai tsin-yam tsindam ni hte jahtum kau ya
wu ai.
34 Shanhte kaw na n kau mi hpe shi sat kau ai aten shagu hta,
ngam ai ni gaw shi hpang de kayin wa ma ai;
shanhte myit malai wa nna,Madu kaw akroi anoi akyu hpyi nga ma ai.
35 Karai Kasang gaw shanhte hpe makawp maga nga ai wa rai nga ai hte;
shanhte hpe karum la na matu, Chyahtum Chyalai n-gun rawng ai Madu du
sa nga ai lam hpe, shanhte dum nga masai.
36 Rai ti mung, shanhte a tsun shaga ai ga ni masu magaw ga ni hkrai rai nga ma ai hte
shanhte tsun shaga ai lam ni myit malang ai hku hpa mung n rai nga ai.
37 Shanhte gaw shi hta sadi dung nga ai ni n rai nga ma ai;
shi hte ga shaka tawn da ai lam hta mung kangka ai ni n rai ma ai.
Ref 78:37: Kas 8:21.
38 Rai ti mung, Karai Kasang gaw shi a amyu masha ni hpe matsan dum nga ai;
shi shanhte hpe n shamyit kau ai sha, shanhte a yubak hpe raw dat kau ya nu ai.
Shi gaw shi a masin kahtet ai lam hpe law law lang shakawp da nna;
shi a pawt sindawng ai hpe hkum shadang da nga ai.
39 Shanhte gaw si chye ai hkrung kanu ni sha rai nga ai;
nbung bung lai mat wa nna me rai, mat mat ai nbung zawn rai nga ma ai hpe
shi dum ya wu ai.
40 Shanhte nam mali hkan e, shi hpe kade lang wa gumlau kau nga ma ai;
kade lang wa shi hpe myit shayawn kau nga ma hka!
41 Shanhte gaw Karai Kasang hpe lang hte lang chyam yu nna
Israela a chyoi pra ai Karai Kasang hpe, myit machyi shangun wu ai.
42 Madu a galu kaba ai daru magam n-gun hte
shanhte a gumlau hpyen ni a lata kaw nna shanhte hpe hkye hkrang la sai nhtoi
hpe mung;
43 Egutu mung, Zoan pa layang e, shi a laklai ai amu ni hte
mauhpa lamik kumla ni hpe madun dan nga sai lam hpe shanhte malap kau manu ai.
44 Shi gaw Egutu masha ni hka n lu lu mat hkra,
hka nu, hka shi kaw na hka ni hpe sai shatai kau ya nu ai.Ref 78:44: Pru 7:17-21.
45 Shi shanhte hpe nni nkri jaw ya lu ai jinghkam ni hpe mung,
shanhte a lamu ga hpe jahten kau ya na matu, shu ni hpe mung, shangun dat
wu ai.Ref 78:45: Pru 8:1-6.
46 Shanhte a nsi naisi ni hpe sha kau ya na matu mung,
shanhte a lagum hpun ni hpe hkyen hte mung, dinggam-yaw ni hpe mung shi shangun
dat ya nu ai.Ref 78:46: Pru 10:12-15.
47 Shanhte a sabyi sun ni hpe sin marang hte mung,
shanhte a lagum hpun ni hpe hkyen hte mung, shi sat kau ya wu ai.Ref 78:47:
Pru 9:22-25.
48 Shanhte a yam nga ni hpe sin tawng ni hte mung,
shanhte a dusat u hpung ni hpe mu myi hprap hte mung, sat kau ya wu ai.
49 Shi gaw shi a pawt sindawng ai hpe ru dat nna;
Si Du a kasa ni du sa wa ai zawn, tsin-yam tsindam,
nchyi nmu re ai ru tsang kaba, shanhte hpe shabyin dat ya wu ai.
50 Shi gaw shi a masin kahtet ai lam hpe n jahkring da ai hte;
shanhte a asak ni hpe n lahpawt dum ai sha, ana zinli hte shanhte hpe sat kau
wu ai.
51 Egutu mung ting na dinghku yawng a
shadang sha alat ni hpe shi sat kau ya wu ai.Ref 78:51: Pru 12:29.
52 Dai hpang, shi gaw shi a amyu masha ni hpe sagu rem ai wa zawn, woi wa nna;
shanhte hpe nam mali hku woi lakawn wa mu ai.Ref 78:52: Pru 13:17-22.
53 Shi shanhte hpe shim lum ai hku woi wa mu ai majaw shanhte n hkrit nga
ma ai.
Rai ti mung, panglai hka gaw shanhte a gumlau hpyen ni hpe ka-up kau mu ai.
Ref 78:53: Pru 14:26-28.
54 Shi shanhte hpe shi a chyoi pra ai lamu ga de mung;
shi hkum nan dang manga tawn da sai bum ni de mung woi wa nga nu ai.Ref 78:54: Pru 15:17.
55 Shi a amyu masha ni shawng de rawt sa wa ai shaloi,
shawng e de nga sai amyu masha ni hpe shi gawt shapraw kau ya nhtawm;
Israela amyu baw ni hpe shanhte a lamu ga garan ya ai hte,
shi a amyu masha ni hpe shanhte a dum nta ni jaw ya wu ai.Ref 78:55: Ysh 11:16-22.
56 Rai ti mung, shanhte gaw Chyahtum Chyalai n-gun rawng ai Karai Kasang hpe
gumlau nga ma ai hte shi hpe chyam yu nhtawm,
shi a hkang da ai tara ni hpe n madat mara nga ma ai.Ref 78:56: Trg 2:11-15.
57 Shanhte a kaji kawa ni zawn, sadi n dung ai sha gumlau ai ni rai nga ma ai;
magaw ai ndan pala zawn, n mai kam ai ni rai ma ai.
58 Shanhte gaw maigan hpara ni a nawku ai shara ni hte
shanhte a hpara sumla ni hte shi hpe sindawng kahtet shangun nga masai.
59 Dai lam ni hpe shi mu wu ai shaloi, Karai Kasang masin pawt nu ai;
shing re ai lam ni a majaw, shi a amyu masha ni hpe tsep kawp kabai kau da nu ai.
60 Shi gaw anhte a ka-ang hta nga lai wa sai
Shilo mare na sum nta hpe kau da nu ai. Ref 78:60: Ysh 18:1; Yer 7:12-14.
61 Shi a daru magam n-gun hte hpung shingkang a kumla rai nga ai Sakse Sumpu hpe
gumlau hpyen ni rim la kau na ahkang shi jaw kau ya wu ai.Ref 78:61: 1Sa 4:4-22.
62 Shi a amyu masha ni hpe shi masin pawt nna;
shanhte a gumlau hpyen ni a lata hta sat kau ai hkrum mu ga, shi ap kau ya wu ai.
63 Shabrang ni majan hta sat kau ai hkrum nga ma ai;
mahkawn ni mung shanhte hpe hkungran la na masha langai mi mung n nga nga ai.
64 Hkinjawng ni mung kashun kashe du daw sai hkaw re ai amu hta si mat nga ma ai;
shanhte a gaida jan ni hpe hkrap ngu hkrap ngoi na ahkang n jaw wu ai.
65 Jahtum e, Madu gaw yup nga ai kaw na yup hprang wa ai wa zawn;
sabyi ntsin a majaw myit katu kahtet wa nna n-gun ja ai share shagan wa zawn
hprang wa nga sai.
66 Shi a gumlau hpyen ni hpe kanut wa shangun nna;
prat dingsa kaya kahpa jahkrum da nga wu ai.
67 Rai ti mung, Yosep a matu mara ni hpe shi kabai kau nna;
Ehprim a amyu baw ni hpe shi n lata la nga ai.
68 De a malai, Yuda a amyu baw masha ni hte,
shi grau tsaw ra ai Ziun Bum hpe lata la nu ai.
69 Dai shara hta e, sumsing lamu na shi a nta hte bung ai
shi a Nawku Htingnu hpe gaw gap da wu ai;
htani htana prat ting ngang kang nga ai lamu ga zawn,
dai hpe ngang ngang kang kang shi gaw da nga wu ai.
70 Shi gaw shi a shangun ma Dawi hpe lata la nu ai,
sagu hpung ni hpe bau rem nga ai udat shara ni kaw na shi hpe lata la nhtawm;
71 Israela amyu masha ni a hkawhkam,
Karai Kasang a amyu masha ni a sagu rem wa tai nga na matu,
shi hpe san da nu ai.Ref 78:71: 1Sa 16:11-12; 2Sa 7:8, 1Hl 17:7.
72 Dawi gaw shanhte hpe tinggyeng myit n rawng ai sha lanu lahku bau maka ai hte;
kung kyang ai hpaji hte shanhte hpe woi lakawn wa nga sai.