SHAKAWN KUNGDAWN 72
1 O Karai Kasang e, na a ding man ai lam hte tara jeyang na matu, hkawhkam wa hpe
sharin ya u;
na a teng man ai lam shi hpe garan ya u,
2 shing rai yang, shi gaw na a amyu masha ni hpe teng man ai lam hte up hkang lu
na ra ai,
dip gamyet sha hkrum nga ai ni hpe ding man ai lam hte up hkang lu na ra ai.
3 Lamu ga gaw ngamu ngamai ai lam hpe kabu gara let hkam la lu mu ga;
ding man ai lam hpe hkan sa nga mu ga.
4 Hkawhkam wa gaw matsan mayan masha ni hpe rap ra ai hku tara jeyang lu u ga;
ra kadawn ai ni hpe mung karum ya lu u ga,
shanhte hpe dip gamyet sha ai ni hpe dang kau lu u ga.
5 Prat ban law law a matu du sa wa na, shu mashi shu masha ni,
jan, shata, htoi nga dingsa, na a amyu masha ni nang hpe nawku daw jau lu mu ga.
6 Prang ni a ntsa e, marang htu ai hte lamu ga ntsa e, marang shaya hkrat nga ai zawn,
hkawhkam wa mung dai zawn rai nga u ga.
7 Dai ding man ai lam gaw nye a asak prat tup hta galu kaba nga u ga;
shata gaw shi a nhtoi hpe jaw ya lu nga dingsa, ngamu ngamai ai lam agrin nga u ga.
8 Shi a mungdan gaw panglai kaw nna panglai du hkra,
Uhprat hka nu kaw nna mungkan ga a jut mi de du hkra, dam lada wa na ra ai.
Ref 72:8: Zeh 9:10.
9 Nam mali hkan na amyu baw ni gaw na a man e, dingnyawm wa na mara ai;
shi a gumlau hpyen ni gaw shi a man e dingnyawm wa na mara ai.
10 Spain mung hte zunlawng ni a hkawhkam ni gaw, shi hpe kumhpaw kumhpa ni,
sa sak jaw na mara ai;
Arabi hte Ehtiopi mung na hkawhkam ni mung, shi hpe hkungga kumhpa la sa ya
na mara ai.
11 Hkawhkam ni yawng hte gaw shi a man e, dingnyawm wa na mara ai;
amyu masha ni yawng hte mung shi hpe daw jau na mara ai.
12 Shi hpe shaga ai matsan mayan masha ni, ra kadawn nga ai ni hte
n sawn n sang di kau hkrum ai ni hpe shi mawai la nga ai.
13 Gawng kya ai ni hte matsan mayan ni a ntsa e, shi matsan dum nga ai;
ra kadawn nga ai ni a asak ni hpe hkye hkrang la nga ai.
14 Shanhte a asak ni gaw shi a man e, manu dan nga ai;
shi gaw shanhte hpe dip gamyet sha ai hte kaming kamawng du daw sai hkaw re
ai amu kaw na mawai la nga ai.
15 Hkawhkam wa a asak galu nga u ga!
Arabi mung na aja ni hpe hkam la lu u ga;
shi a matu akyu hpyi ya nga ai ni, aten shagu hpyi ya lu mu ga;
Karai Kasang a chyeju ni gaw shi a ntsa e, tut nawng anga nga u ga law!
16 Lamu ga ni hta nsi naisi ni ja kat nga u ga;
Lebanon mung na nsi naisi si ai zawn,
kawng ni yawng hta hkai nmai ni rai nga mu ga;
Prang yang na tsingdu ni zawn,
mare ni hta amyu masha ni hte hpring nga mu ga.
17 Hkawhkam wa a amying hpe galoi mung n malap kau lu mu ga;
shi a mying gumhkawng ai lam, jan zawn agrin nga u ga.
Hkawhkam wa hpe Karai Kasang shaman chyeju jaw ya ai zawn,
amyu baw ni yawng mung,
Karai Kasang shanhte hpe shaman ya na matu hpyi nga mu ga.
18 Madu Israela a Karai Kasang hpe shakawn mu!
Shi chyu sha ndai mauhpa magam bungli ni hpe galaw nga ai.
19 Shi a hpung shingkang hte seng ai mying nsang hpe htani htana shakawn mu!
Shi a hpung shingkang gaw mungkan ting hta pri rai nga u ga law.
20 Ndai gaw Yese a kasha Dawi akyu hpyi ai ga ni hta na hpang jahtum na akyu hpyi ga rai
nga ai.