SHAKAWN KUNGDAWN 65
1-3 Karai Kasang e, nang anhte a akyu hpyi ga ni hpe htan ya mi ai majaw,
Ziun ntsa e, anhte nang hpe shakawn ai lam gaw teng man nga ai;
nang hpe jaw tawn ai ga sadi ni hpe mung anhte shadik shatup nga ga ai.
Shanhte galaw shut kau ai yubak ni a majaw,
shara shagu de na amyu masha ni, nang kaw du sa wa na mara ai.
Anhte shut hpyit kau sai mara ni anhte hpe gamaw kau ti mung;
nang gaw dai lam ni hpe mara dat ya nga ndai.
4 Nang lata la hkrum sai ni hte, na a chyoi pra ai Htingnu kata hta nga
lu na matu,
nang woi sa wa hkrum ai ni gaw a lu nga ai.
Anhte gaw na a nta na kaja ai arai ni hte,
na a chyoi pra ai Nawku Htingnu na shaman chyeju ni hta myit dik nga na ga ai.
5 Nang anhte hpe awng padang jaw ya ai hku, anhte hpe htan ya nga ndai,
anhte hpe hkye hkrang la na matu, mauhpa magam amu ni hpe nang galaw nga ndai.
Mungkan ga ting hte panglai ni din ai shara shagu na
amyu masha ni gaw nang hpe kam hpa nga ma ai.
6 Na a n-gun atsam hte bum hpe shi a shara ni hta de da nna;
na a chyahtum chyalai daru magam n-gun hpe madun dan nga ai.
7 Nang gaw panglai hka ni a wu kadu ai nsen,
hka leng ni a kashaw kashai ai nsen ni hte,
amyu baw ni a rawt kabrawng ai hpe shazim kau nga ndai.
8 Na a magam amu ni gaw mungkan ga a jahtum shara maga mi kaw nna maga mi de du hkra,
kabu gara jahtau garu shangun nga ai.
Nang galaw dan sai galu kaba ai lamik kumla ni a majaw,
mungkan ga ting mau mahka nga ma ai.
9 Nang gaw lamu ga a matu marang jahtu ya ai hte
mungkan ga hpe yu lanu lahku nga ai lam madun dan nga ndai;
nang dai hpe sut su shangun ai hte ga sau ing shangun nga ndai.
Hka shi ni hpe hka hte nang jahpring da nna;
aga hta nai mam ni hte nang shatut ya nga ndai.
Nang gaw dai hku nna lajang da nit dai:
10 shawt htai da ai sun ni hta marang hpe nhpaw n-ya nang jahtu ya nna;
dai ni hpe hka hte madit ya nga ndai;
ga namhpun hpe marang shaya nna, shakya ya nga ai,
dai hta hkai nmai ni hpe nang tu kaba shangun nga ndai.
11 Nang gaw mai kaja ai lam hpe jaw ya ai majaw shu la lu ai nai mam ni kade wa
sut su nga a hka!
Nang hkawm du ai shara shagu hkan e, nhpaw n-ya law htam shangun nga ndai.
12 Udat shara ni hta yam nga wuhpung ni hte hpring nga ai;
kawng nhkrem ni hta kabu gara ai hte hpring nga ai.
13 Prang ni hta sagu ni hte hpring nga ai;
kadit ni hta hkaulan mam ni hte hpring nga ai.
Arai yawng mayawng hte gaw garu jahtau ai hte kabu gara mahkawn ma ai.