SHAKAWN KUNGDAWN 62
1 Karai Kasang ngai hpe hkye hkrang la na matu, ngai amu sha hte ala nga nngai;
Ngai gaw shi hpe chyu sha kam hpa manoi nga nngai.
2 Shi chyu sha ngai hpe hkye hkrang la ai hte makawp maga nga ai;
shi gaw nye a dahpran shara rai nga ai,
ngai gaw galoi mung sum hkrum na nngai n rai.
3 Nanhte yawng gaw daw agrawp mat ai nhpan daram sha n-gun rawng ai masha langai
mi hpe,
galoi aten du hkra, shi hpe gasat na ngu nga myit ni?
4 Shi hpe shagrau shatsaw da ai shara kaw nna chyu sha
nanhte shi hpe gang jahkrat kau mayu nga myit dai,
nanhte gaw masu magaw ga tsun na hpe ra sharawng nga myit dai.
Shaman ga ni hpe nanhte tsun nga myit ti mung,
nanhte shi hpe nanhte a myit masin kata kaw nna dagam dala ga tsun nga myit dai.
5 Ngai gaw Karai Kasang hta chyu sha, manoi gumgoi nga nngai;
ngai shi hpe myit mada nngai.
6 Shi chyu sha ngai hpe hkye hkrang la ai hte makawp maga nga ai;
shi gaw nye a dahpran shara rai nga ai,
ngai galoi mung sum hkrum na n rai.
7 Nye a hkye hkrang la ai lam hte arawng sadang gaw Karai Kasang hta rai nga ai;
shi gaw n-gun ja ai hte ngai hpe makawp maga ai wa rai nga ai,
nye a shingbyi shara mung rai nga ai.
8 Nye a amyu masha ni e, aten shagu Karai Kasang hpe kam hpa nga mu.
Shi gaw anhte a shingbyi shara rai nga ai,
nanhte a ru tsang lam yawng mayawng shi hpe tsun dan mu.
9 Shinggyim masha yawng hte gaw nsa sa lai nbung kasha zawn sha rai nga ma ai;
galu kaba ai wa hte kaji kadun ai wa mung, maren sha manu n dan nga ai.
Shanhte hpe joi hta shen yu ai shaloi, shanhte a namnak hpa mung n rawng nga
ma ai;
shanhte gaw nsa sa lai nbung hta pyi grau nna tsang nga ai.
10 Kabring kabrawng du daw sai hkaw re ai amu hpe nang hkum kam hpa nga et;
mya lu mya sha nna lu la ai arai hpa hpe rai tim, hkum myit mada nga et,
nang sut su wa ti mung,
dai ni hta myit hkum manoi nga et.
11 Madu hta daru magam n-gun rawng nga ai hpe mung,
shi a tsaw ra myit dinggrin rai nga ai hpe mung,
Karai Kasang tsun ai ga dai hpe law law lang, ngai na ni ai.
12 O Madu e, nang na masha shagu hte hpe
tinang galaw ai amu hte maren, shagrau kumhpa jaw ya nga u law.Ref 62:12: Yob 34:11; Yer 17:10; Mat 16:27; Rom 2:6; Shr 2:23.