SHAKAWN KUNGDAWN 148
1 Dai Madu hpe shakawn mu!
Tsaw htum ai shara hta nga nga ai ni e,
sumsing lamu na dai Madu hpe shakawn mu!
2 Shi a lamu kasa ni yawng hte e, shi hpe shakawn mu:
Sumsing lamu hte seng ai shi a hpyen luksuk ni yawng hte e, shi hpe kungdawn mu.
3 Ajan hte shata, shi hpe shakawn mu,
htoi kabrim ai shagan ni e, shi hpe kungdawn mu.
4 Tsaw htum ai sumsing lamu ni hte
lamu a ntsa hta nga nga ai hka hpung ni e, shi hpe shakawn mu.
5 Dai Madu a mying nsang hpe yawng jawm shakawn nga mu ga!
Na a mungga majaw, nga yawng danghta hpan da hkrum nga ai;
6 na a hkang da ai mungga hte maren, shanhte a shara ni hta htani htana
agrin nga ma ai,
dai ni gaw hkang da ai mungga hpe n lai lu nga ma ai.
7-8 Panglai baren numraw ni, sung ai nammukdara yawng,
myi hprap hte sin, hkyen hte sumwi,
shi a mungga hpe madat mara ai nbung laru ni e,
mungkan ga kaw nna, dai Madu hpe shakawn nga mu.
9-10 Kawng ni hte bum ni, namsi hpun ni hte maling mala ni,
shani da ai yam nga ni hte matse labye dusat ni yawng,
gumrawt hkawm ai baw hte ntsa malen u ni e, shi hpe shakawn mu.
11-12 Hkawhkam ni hte amyu baw shagu,
hkawhkam shadang sha ni hte kaga mung du, salang ni yawng;
mahkawn ni hte shabrang ni,
gumgai dingla ni hte ma kaji ni e, shi hpe shakawn mu.
13 Dai Madu a mying nsang hpe shanhte yawng shakawn mu ga!
Shi a mying nsang gaw kaga ni yawng hta grau nga ai;
shi a hpung shingkang gaw ginding aga hte sumsing lamu a ntsa e, chyam nga ai.
14 Shi gaw shi a amyu baw ni hpe n-gun shaja ya nga ai majaw,
shi a amyu masha ni yawng shi hpe shakawn nga ma ai-
shi hpe grai tsaw ra ai Israela amyu masha ni mung shi hpe shakawn nga ma ai.
Dai Madu hpe shakawn mu!