SHAKAWN KUNGDAWN 139
1 Madu e, nang ngai hpe manaw yu nna
chye nga ndai.
2 Ngai galaw ai lam yawng mayawng hte hpe mung, nang chye nga ndai;
nye a myit mang ai lam yawng mayawng hpe mung, tsan tsan kaw nna,
nang chye nga ndai.
3 Ngai bungli galaw nga ai hte hkring nga ai hpe nang mu nga ndai;
ngai galaw ai lam yawng mayawng hpe mung nang chye nga ndai.
4 Ndai ga garai n shaga shapraw ai kaw nna pyi,
ngai hpa tsun wa na lam hpe nang chye ngut chyalu rai nga ndai.
5 Nang gaw ngai hpe jut shagu kaw nna
na a daru magam n-gun hte ngai hpe makawp maga nga ndai.
6 Nye a lam hpe chye ya ai na a machye machyang hpaji gaw nau sung la nga ai;
dai gaw, nye a machye machyang hte n dang dep lu nga ai.
7 Nang kaw nna lawt mat wa na matu, ngai gara de sa lu na rai nga a ta?
Na a man kaw nna, gara de, ngai hprawng lu na rai nga a ta?
8 Sumsing lamu de lung mat wa ai rai yang mung, dai shara hta, nang nga
nga na rin dai;
Katsan ga e, ngai lama taw nga ai rai yang mung, dai shara hta nang nga nga
na rin dai.
9 Sinpraw maga de, ngai pyen hkawm mat wa ai rai yang mung,
sinna maga tsan dik htum ai shara hta sa nga ai rai yang mung,
10 dai shara ni hta nang nga nga nna, ngai hpe woi wa na rin dai;
ngai hpe karum la na matu, dai shara hta nang nga nga na ndai.
11 Nsin gaw ngai hpe ka-up da nna,
nhtoi gaw nye a grup yin e shana tai u ga, nga nna ngai tsun nga yang;
12 nsin mung na a man e, nsin zawn n rai mat nna,
dai shana gaw shani zawn tai nga ai.
Nsin hte nhtoi gaw na a man e maren sha rai nga ai.
13 Nang gaw nye hkum a hkrihkraw lami laman shagu hpe hpan da nna;
nye nu a kan hta e, ngai hpe shachyaw da nit dai.
14 Nang gaw hkrit hkungga mai ai Madu rai nga ndai majaw,
ngai nang hpe shakawn kungdawn nga nngai.
Nang galaw ai lam yawng mayawng mung laklai ai mauhpa amu ni rai nga ai hpe
nye a myit masin mahkra hte chye nga nngai.
15 Nye a nrut nra ni hkrang pru wa nna,
langai hte langai shada da atsawm sha htuk shachyaw mat wa nhtawm,
nu a hkritung kan hta kaba wa let dai shara hta ngai naw rawng nga yang pyi,
nang ngai hpe chye nga nit dai.
16 Ngai garai n shangai wa ai aten kaw nna pyi, nang ngai hpe mu nit dai.
nye a matu masat da ya ai nhtoi ni langai mi hpe mung ngai garai n mu yang,
na a laika hta yawng ka matsing da nga nit dai.
17 Karai Kasang e, na a myit mang ai lam ni nye a matu kade wa yak la nga a hka;
Dai ni gaw kade wa law la nga a hka!
18 Dai hte hpe hti yu na nga yang, shanhte gaw zaibru hta n ga law htam nga ma ai.
Ngai yup hprang wa ai shaloi, nang hte rau ngai naw nga na nngai.
19 Karai Kasang e, n hkru n shawp ai ni hpe nang sat kau na, ngai kade wa ra
nga a hka!
Kasu kabrawng shabyin ai masha ni, ngai kaw nna pru mat wa na hpe,
ngai kade wa ra nga a hka!
20 Shanhte na a lam hpe n tara ai hku tsun nga ma ai;
na a mying nsang hpe n hkru n hkra ai ga ni hte shanhte tsun nga ma ai.
21 Madu e, nang hpe n ju n dawng ai ni hpe ngai mung kade wa n dawng
nga a hka!
Nang hpe gumlau ai ni hpe mung ngai kade wa matsat nga a hka!
22 Ngai shanhte hpe n dawng n yawt ai myit masin mahkra hte n dawng nga nngai;
shanhte hpe nye a gumlau hpyen ni zawn ngai sawn la nga nngai.
23 Karai Kasang e, ngai hpe manaw yu nna nye a myit hpe chye ya e;
ngai hpe chyam dinglik yu nna nye a myit sawn ai lam hpe mu chye nga ya e.
24 Nye a myit masin hta n hkru ai lam lama rawng nga ai rai yang, dai ni hpe sawk
yu u;
htani htana agrin nga ai lam de, ngai hpe woi wa e law.