SHAKAWN KUNGDAWN 102
1 O Madu e, nye a akyu hpyi ga hpe madat ya e;
karum la na matu, nye a hpyi jahtau ai nsen hpe na ya e!
2 Ngai nni nkri hkrum nga ai shaloi ngai kaw nna hkum kayin mat wa et!
Ngai shaga ai shaloi, nye a ga hpe madat ya nna, tin tin htan ya e!
3 Nye a asak gaw wan hkut zawn hkoi mat wa nna;
nye a hkum hkrang mung wan zawn hkru nga ai.
4 Ngai gaw tsingdu jahkraw zawn kabye dip da ai hkrum nna;
lusha sha mayu ai myit pyi n rawng mat nga li ai.
5 Ngai ja ja madai sharung nga nngai,
hpyi hte nrut nra ni hta jan nna ngai hpa mung n rai nga nngai.
6 Ngai gaw nam mali e nga ai zai ai u ni hte
kabai kau da sai dum nta hkan nga ai u hku ni zawn rai nga nngai.
7 Ngai n lu yup nga nngai majaw
nta numgaw e dung nga ai u shingtai zawn, ngai rai nga nngai.
8 Nye a gumlau hpyen ni ngai hpe shani tup asawng nga ma ai;
ngai hpe asawng asang re ai ni nye a mying hpe gang nna dagam dala ga tsun
nga ma ai.
9-10 Na a pawt sindawng ai hte masin kahtet ai a majaw,
wan dap ni gaw nye a malu masha rai nga ai;
nye a luhpa ni mung nye a myi prwi ni hte kayau nga li ai.
Nang ngai hpe magra sharawt la nna, tsan tsan de kabai kau nga nit dai.
11 Nye a asak gaw jan shang wa yang na shingnip zawn rai nga nna;
hkraw ai tsingdu hte bung nga nngai.
12 Rai ti mung, Madu e, nang gaw htani htana agrin nga ai hkawhkam wa
rai nga ndai;
ban prat masha ni mahkra nang hpe adum nga na mara ai.
13 Nang rawt wa nna, Ziun mare hpe matsan dum na rin dai;
dai mare hpe matsan dum na aten du wa nga sai,
dai aten gaw ya e nan rai nga ai.
14 Ziun mare gaw jahten sharun kau hkrum nga tim pyi,
na a shangun ma ni shi hpe tsaw ra nga ma ai;
dai mare hten byak mat ti pyi,
shanhte dai hpe matsan dum ai myit nga nga ma ai.
15 Amyu baw ni Madu hpe hkrit hkungga wa na mara ai,
mungkan ga na hkawhkam ni yawng hte gaw shi a daru magam n-gun hpe hkrit kamyin
wa na mara ai.
16 Madu gaw Ziun mare hpe bai gaw gap da ai shaloi,
shi a galu kaba ai lam hpe madun dan na ra ai.
17 Shi gaw kabai kau da hkrum ai shi a amyu masha ni a nsen ni hpe na wa na ra ai;
shanhte a akyu hpyi ga ni hpe madat ya na ra ai.
18 Hpang ban prat na masha ni a matu, Madu galaw da sai amu ni hpe ka matsing da nga mu;
shing rai, ya garai n shangai pra sa wa na ni mung, shi hpe shakawn kungdawn wa
na mara ai.
19 Dai Madu gaw shi a chyoi pra ai hte tsaw htum ai shara kaw nna gum yu
nga ai;
shi gaw sumsing lamu kaw nna ga de gum yu nga ai.
20 Shi gaw bawng dung ai ni a madai ai nsen hpe na ya nna;
si na matu, daw dan hkrum nga ai ni hpe shalawt dat nga ai.
21-22 Dai majaw, masha amyu baw ni hte mungdan ni rau sa hkrum zup nna,
Madu hpe nawku daw jau ai shaloi,
shi a amying nsang hpe Ziun Bum hta htawn tsun dan na mara ai;
amyu masha ni mung, Yerusalem mare hta shi hpe shakawn kungdawn na mara ai.
23 Ngai naw kaji nga ai aten kaw nna
shi gaw nye a asak hpe kadun kau ya ni ai.
24 O Karai Kasang e, ngai garai n dingla yang,
nye a asak hpe hkum dawm kau ya e.
Madu e, nang gaw htani htana anga nga ndai.
25 Nang gaw, moi moi e, ginding aga hpe hpan da nit dai,
na a lata ni hte sumsing lamu ni hpe nang nan galaw da nga nit dai.
26 Dai ni hten run mat wa tim, nang agrin nga na ndai;
dai ni yawng gaw hpun nba ni zawn, dingsa mat wa na ra ai,
hpun palawng ni zawn nang dai ni hpe galai kau ai hte dai ni mung wai mat
na mara ai.Ref 102:26: Heb 1:10-12.
27 Rai ti mung, nang chyawm gaw dinggrin anga nga ndai,
na a asak gaw galoi mung htum mat chye ai n rai.
28 Anhte a kashu kasha ni shim lum ai hte
shanu nga lu na mara ai;
shanhte a aru arat ni gaw na a makawp maga ai npu hta shim nga lu na mara ai.