1 Sha e, nye a hpaji byeng-ya hte myit kraw hpaji hpe madat mara myit maju jung nga u. 2 Shaloi, nang gaw gara hku jaw hkrak ai asak hkrung na lam hpe chye wa na ra ai hte na a n-gup aga gaw na a machye machyang hpaji hpe shapraw dan na ra ai. 3 Kaga masha jan a nten gaw lagat ntsin zawn dwi nga nna, shi a pup manam ai gaw tsanlun sau zawn manen nga ai. 4 Rai ti mung bungli yawng ngut boi ai shaloi, myit a nchyi nmu re ai lam hte ahkup ahka nga ai hpe sha, nang hpe jahkrum kau da ya nga ai. 5 Shi gaw nang hpe si hkrung si htan a mungkan de woi yu wa nna, shi hkawm sa ai lam gaw katsan ga a hkrun lam rai nga ai. 6 Shi gaw asak hkrun lam hta n tsap lu nga ai; rai ti mung, ndi nda rai wam hkawm nga ai hte hpa byin hkrum hkra nga ai lam hpe mung shi n dum n chye nga ai.

7 Sha ni e, nye a ga hpe, ya jang madat la mu; ngai tsun ai ga ni hpe galoi mung hkum malap kau nga myit. 8 Dai zawn re ai num hpe tsan tsan koi yen kau mu; shi a nta chyinghka makau e pyi, hkum sa kahtep myit! 9 Shing re ai lam hpe nang galaw hkrup ai rai yang, nang kalang mi hkam la yu sai arawng sadang hpe kaga masha ni lu la na mara ai hte mazut ai masha ni a lata hta, aprat naw kaji yang, nang asak htum mat na rin dai. 10 Rai sa, tsasam masha ni na a sut gan yawng hte hpe la kau ya nhtawm, nang mazing tawn ai arai ni hpe mung, kaga masha wa sa madu la kau ya na ra ai. 11 Nang gaw na a si wa ten na yup ku ntsa hta e, galeng madai nga na ra ai hte; na a hkum shan ni lasi lamun rai mat na ra ai. 12 Shing rai, nang gaw, ?Hpa majaw ngai gaw galoi mung n chye sharin la nga n hka? Marai langai ngai, shading sharai ai hpe ngai hpa majaw galoi mung lale kau nga nngai kun? 13 Nye a sara ni sharin shaga ai ga ni hpe ngai n madat mara kau nga a hka! Shanhte sharin shaga ai ga ni hpe ngai myit maju n jung kau ni ai. 14 Ngai gaw akajawng sha, shawa hpawng e, kaya kahpa hkrum mat ni ai,? nga nna tsun na ra ai.

15 Na a madu jan hta sadi dung nga u; shi hpe chyu sha, na a tsaw ra myit jaw ya nga u. 16 Kaga num ni kaw nna lu la ai ma ni gaw nang hpe mai kaja ai amu hte galaw daw na mara ai n rai. 17 Tsasam kasha ni n rai, na a kasha ni galu kaba wa nna, nang hpe karum shingtau nga ra ma ai. 18 Dai majaw, na a madu jan hte pyaw pyaw rai nga u; nang hkungran da sai numsha hta kabu sharawng nga u. 19 Shi gaw shannga yi zawn tsawm htap nga nna ningja hte hpring nga ai; shi a sari sadang gaw nang hpe kabu pyaw shangun nga u ga, shi gaw shi a tsaw ra myit hte nang hpe makyit gawan da u ga. 20 Sha e, hpa majaw masha jan a tsawm htap ai hpe nang grau yu ra sharawng nga na rai ta? Hpa majaw kaga numsha hpe na a tsaw ra myit jaw ya ang nga a ni? 21 Dai Madu gaw nang galaw ai amu yawng mayawng hte hpe mu mada nga ai; nang du hkawm ai shara shagu hkan, shi sin yu nga ai. 22 Tara n lang ai masha wa a yubak ni gaw mahkam rai nga nna, shi gaw shi a yubak sumgawn hta rim la ai hkrum nga ai. 23 Shi gaw shi a myit hkang lu ai lam n nga ai majaw, si nga ai; shi a sawng ai angawk angak lam gaw shi hpe lup sung hku de, sa bang dat na ra ai.