GA SHAGAWP LAIKA
(PROVERBS)
Ga Nhpaw
Ga Shagawp Laika gaw arawn alai hte nawku htung hte seng ai sharin shaga ga ni hpe, ga malai hte ga shagawp hkrang hku nna ka mahkawng shinggyin da ai laika rai nga ai. Ndai laika a malawng maga ngu na daw kaba ni hta shani shagu ta tut hkan sa galaw na magam bungli ni hte seng nga ai lam ni rawng nga ai. Ndai Ga Shagawp Laika hta, ?Nang gaw machye machyang hpaji lu la na matu, shawng npawt e, dai Madu hpe hkrit hkungga ai myit rawng ra nga ndai,? ngu ai ga yan hte shawng ka hpang da nga ai. Dai majaw, ndai laika gaw nawku htung hte seng ai htung lai a matu chyu sha n rai, chye chyang ai nyan hpaji hte mai kaja ai sat lawat hpe mung garan kachyan ya nga ai. Ndai laika hta rawng ai ga malai kadun law law ni gaw hpaji chye ai masha langai mi, byin nga masa hta hkan nna hkan sa na lam hte seng ai moi na Israela hpaji sara ni a myit kraw hpaji hpe shadan ya nga ai. Shara nkau mi hta, dinghku matut mahkai lam hte seng ai matsun maroi ga ni hte magam bungli ni hpe hparan jasat ya ai matsun maroi ga ni rawng nga ai. Bai nna shara nkau mi hta, shinggyim kanawn mazum htung lailen ni hte tinang a myit hpe hkang ra ai lam ni rawng nga ai. Ndai laika hta madung shaleng da ai ga kanu ngu na ni gaw, shagrit shanem ai, hkam sharang ai, matsan mayan masha ni hpe hkungga ai hte jinghku manang ni hta sadi dung ai lam ni rai nga ai.
1
1 Israela Hkawhkam, Dawi a kasha Shawlumon shagawp da ai laika rai nga ai.Ref 1:1: 1Hk 4:32.
2 Ndai Ga Shagawp ni gaw hpaji byeng-ya hte mai kaja ai hpaji jaw ga hpe chye matsing shangun ai hte, lachyum sung ai ga malai ni hpe chye na shangun nga ai.
3 Dai ni gaw nang hpe myit let ai hte kaning rai asak hkrung nga na lam, kaning rai ding man na lam, myit malang ai hte teng man rap ra na lam hpe sharin ya nga ai.
4 Dai ni gaw mahkrum madup n nga ai ni hpe ram ai masha tai shangun nna, la shabrang ni hpe machye machyang hpaji rawng wa na matu, sharin ya lu nga ai.
5 Ndai ga shagawp ni gaw hpaji rawng ai wa a machye machyang ni hpe pyi hpung jat ya lu nga ai hte sharin hkam la sai ni hpe lam madun matsun ya lu nga ai,
6 shing rai, shanhte gaw ga shagawp a makoi magap da ai lachyum ni hte hpaji rawng ai masha ni san ai manghkang ni hpe chye na lu ma ai.
7 Nang gaw machye machyang hpaji lu la na matu, shawng npawt e, dai Madu hpe hkrit hkungga ai myit rawng ra nga ndai. Angawk ai masha ni gaw hpaji byeng-ya a manu hpe n chye ma ai, dai hpe sharin la na matu ningdang kau ma ai.Ref 1:7: Yob 28:28; Shk 111:10; Gsh 9:10.
8 Sha e, na nnu yan nwa, nang hpe sharin shaga ai ga hta myit maju jung nna madat mara nga u.
9 Shanhte a sharin shaga ai ga ni gaw na a hpraw nsam hpe tsawm htap ai bunghkaw hte du hta gali ai kachyi zawn, na a arawn alai hpe grau kaja hkra tsawm htap shangun na ra ai.
10 Sha e, yubak kap ai ni nang hpe lau la nna,
11 shanhte gaw, ?Sa rit, masha langai mi hpe sat na, anhte gyam yu ga! Mara n kap ai masha ni hpe arawng mala la lu na matu hkap daw yu ga!
12 Shanhte hpe anhte mu ai shaloi, shanhte gaw hkrung nga nna hkam kaja nga na ma ai; rai ti mung, anhte shanhte hpe hkap daw ngut ai hpang shanhte si mat na mara ai!
13 Anhte gaw sut gan arung arai hkum sumhpa yawng hte hpe mu la nna, anhte a dum nta ni hpe kashun la lu ai sut gan ni hte jahpring da na ga ai!
14 Sa rit, anhte kaw hkan nang rit, anhte lagu da ai arai ni hpe anhte yawng jawm garan la ga,? nga nna lama tsun yang dai ga ni hpe hkum madat ya nga et.
15 Sha e, dai zawn re ai masha ni a hpang hkum hkan nang et; shanhte hpe koi yen kau u.
16 Shanhte gaw n hkru n shawp ai amu galaw na hpe shanhte n dawt nga ma ai; shanhte gaw masha sat na matu, tut nawng e, jin jin rai ma ai.
17 Nang hkwi la mayu ai u gaw maja let dung nga ai shaloi, sumgawn hpe kahpyan da ti mung, dai gaw kaman lila sha rai nga ai.
18 Rai ti mung, shanhte gaw tinang a matu mahkam hkam da ai masha ni zawn shanhte nan dai mahkam hta asak jasum kau na mara ai.
19 Damya galaw ai wa a asak gaw damya galaw ai amu hta galoi mung sum mat chye nga ai. Dai gaw kashun kashe du daw sai hkaw ai amu hte hkrung nga ai ni hta, hkrum hkra ai lam rai nga ai.
20 Madat mu! Hpaji byeng-ya gaw mare nmaw lam ni hte gat ginra ni hkan jahtau garu nna shabra nga ai,Ref 1:20: Gsh 8:1-3.
21 mare chyinghka ni hte masha hpawng de nga ai shara shagu hkan e mung ja ja jahtau tsun nga ai.
22 ?Angawk ai masha ni e! Nanhte gaw gade na hkra, angawk angak rai mayu nga myit ni? Nanhte gaw gade na hkra, machye machyang hpaji hpe mani asawng ai hta kabu sharawng nga na ngu nga myit ni? Nanhte gaw galoi mung n hprang sana manit dai kun?
23 Nang hpe ngai daru sharin ai shaloi, madat mara la u; nang hpe ngai mai kaja ai hpaji daw ga jaw nna, nye a machye machyang hpaji garan ya na we ai.
24 Ngai hpang de du sa na matu, nang hpe shaga ai hte saw lajin yu se ai rai tim, nang n madat ya ndai.
25 Nang gaw nye a hpaji jaw ai lam hpe hpa zawn n nawn kau nga ndai, nang hpe shading sharai ai lam hpe mung, nang n ra sharawng nga ndai.
26 Dai majaw nang ru tsang hkrum ai shaloi, ngai mani kau na we ai; nang hkrit kajawng hpa hpe hkrum kadup wa ai shaloi, nang hpe ngai asawng kau na we ai.
27 Hkrit kajawng ai ru tsang nbung gaw laru zawn, na a ntsa e, du wa ai shaloi, nang gaw nchyi nmu hte nni nkri hkrum sha nga ndai.
28 Shaloi e, nang gaw hpaji byeng-ya hpe shaga wa na rin dai; rai ti mung, ngai htan ya na nngai n rai. Nang gaw ngai hpe shara shagu hkan tam ti mung, ngai hpe mu tam na ndai n rai.
29 Nang gaw machye machyang hpaji loi mi hpe pyi, galoi mung akyu n jashawn yu nga ndai, dai Madu hpe hkrit hkungga na matu mung, tut nawng e, ningdang kau nga ndai.
30 Nang hpe ngai shading sharai yu ni ai shaloi, nye a hpaji jaw ai lam hpe nang galoi mung n ra sharawng ndai, hpa zawn n nawn ya nga ndai.
31 Dai re ai majaw, nang galaw ai hte maren, nang hkam la lu na ra ai rai nna, nang galaw ai amu gaw nang hpe nchyi nmu hkrum shangun na ra ai.
32 Mahkrum madup n nga ai masha ni gaw hpaji byeng-ya hpe ningdang kau mu ai majaw si mat nga ma ai; angawk ai masha ni mung, shanhte a ndum ndam re ai lam hta hten byak ai hkrum ma ai.
33 Rai ti mung, nye a ga hpe madat mara ai ni chyawm gaw shim lum ai lam lu la na ma ai. Shi gaw ngwi pyaw sim sa nna, hkrit tsang lam hpa mung hkrum hkra na wu ai n rai.?