1 Hpu nau ni e, jahtum hku tsun ga nga yang, dai Madu hta langai sha tai lu ai lam hpe kabu gara nga mu. Shawng de nanhte hpang de ngai ka dat yu sai lam ni hpe bai kahtap ka na matu ngai hta lit n li nga ai sha n-ga nanhte hpe shim lam lu la shangun nga ai. 2 N hkru n shawp ai bungli galaw ai ni hpe sadi let makran nga mu; gwi ni hpe makran nga mu.Tinang a hkum hpe gadoi di ai masha ni hpe makran nga mu. 3 Matu gadoi hkam ai lam majing hpe hkam la ai ni gaw shanhte n rai, anhte she rai nga ga ai. Hpa majaw nga yang, anhte gaw Karai Kasang hpe shi a Wenyi hte nawku daw jau nna Hkristu Yesu hta langai sha tai lu ai asak hkrung lam hta kabu gumrawng ai ni rai ga ai. Anhte gaw shinggan maka kumla shadik poi ni hta n kam hpa ga ai. 4 Ngai chyawm gaw matu gadoi hkam ai zawn re ai shinggan maka kumla ni hpe sha kam ra ai nga yang, kamhpa na lam ngai lu nngai. Shinggan maka kumla ni hpe kam hpa na lam lu nngai nga nna masha langai ngai myit a yang gaw, ngai grau nna lu da we ai. 5 Ngai gaw asak matsat ya nhtoi hta matu gadoi hkam nngai; Israela amyu Benyamin a aru arat hte Hebre masha hta na Hebre sai jet rai nga nngai. Yuda ni a jep ai Tara hpe hkan sa shatup ai hku she yu ga nga yang ngai Hparishe rai nga nngai.Ref 3:5: Nin 17:12; Kas 26:4-5; Rom 11:1; 2Ko 11:22. 6 Myit lawm shakut sharang ai lam hpe tsun ga nga yang ngai gaw hpung hpe zingri zingrat ai wa rai nngai. Masha langai mi gaw jep ai Tara hpe hkan sa shadik nna ding hpring ai hpe lu la lu ai nga yang ngai hta mara n kap ai.Ref 3:6: Kas 8:3; 9:1; 22:3; Rom 10:5; Gal 1:13. 7 Rai ti mung nye a matu amyat re ai nga nna tsun lu ai arai ni yawng gaw, ya e Hkristu a jaw e sum mat ai lam re ngu nna ngai nawn nngai. 8 Dai hta n-ga, nye a Madu Yesu Hkristu hpe chye chyang lu ai lam gaw, lam shagu hta grau nna chyahtum chyalai hpu reng nga ai amyat re ai majaw, dai hpe lu la na matu arai yawng mayawng hpe tsep kawp asum hku ngai sawn la nngai. Ngai gaw shi a matu arai yawng mayawng hpe kabai kau ni ai. Hkristu ngu ai amyat hpe lu la na matu hte Hkristu hte langai sha tai lu na matu nga manga hpe shanut shanaw zawn ngai nawn kau ni ai. 9 Ngai gaw jep ai Tara hpe madat mara hkan sa shadik ai hku nna nye a ding hpring ai hpe n lu la lu nngai. Ya gaw Hkristu hpe kam sham ai a marang e jaw ya ai ding hpring ai hpe ngai lu la nngai. Dai gaw makam masham a marang e Karai Kasang e matsan dum nna jaw ya ai chyeju kumhpa rai nga ai. 10 Ngai gaw Hkristu hpe chye chyang na lam, shi a bai hkrung rawt wa ai n-gun atsam hpe mu hkrum hkam sha lu na lam, shi hte rau nni nkri hkam nna shi si hkam ai zawn si hkam na hpe sha ngai ra marit nga nngai. 11 Shaloi she ngai gaw si ai ni a bai hkrung rawt na lam hta lawm lu na nngai ngu nna ngai myit mada nga nngai.

12 Ngai gaw ya pyi dai kumhpa hpe lu la ni ai ngu nna mung, ya e hkum tsup rai nga ni ai ngu nna mung n tsun mayu nngai; rai ti mung dai kumhpa hpe ngai hpe jaw na matu Hkristu Yesu gaw ngai hpe jum magra la kau ni ai hte maren, dai kumhpa hpe ngai nan jum magra la lu hkra shakut shaja dingyang rai nga nngai. 13 Hpu nau ni e, ngai gaw dai kumhpa hpe lu la ni ai ngu nna kaja wa ngai n myit nngai; rai ti mung ngai galaw ai lam langai mi gaw nye a hpang maga na arai hte hpe malap kau nna shawng e nga ai arai ni de du dep lu u ga, atsam htum hkra shakut nngai. 14 Dai rai nna ngai gaw dai kumhpa hpe lu la na matu bandung du hkra shachyut nngai. Dai kumhpa gaw lahta tang e asak hkrung lu u ga, Hkristu Yesu a marang e Karai Kasang a shaga la ai lam rai nga ai.

15 Wenyi lam hta myit su kunghpan nga sai anhte ni yawng gaw, ndai myit masa hte maren myit nga ra ga ai. Rai ti mung nanhte nkau mi hta nhtan shai ai myit masa lama nga ai rai yang mung, Karai Kasang gaw dai hpe pyi hpyan dan na marin dai. 16 Gara hku mi rai ti mung, anhte gaw dai ni du hkra hkan sa lai wa sai lai masa ni hte maren shawng de shanang nna hkawm sa wa ga.

17 Hpu nau ni e nanhte yawng hte gaw ngai kaw na kasi yu la nga mu; anhte madun dan sai kasi ningli kaja hkan sa ai ni hpe yu matsing nga mu.Ref 3:17: 1Ko 4:16; 1Ht 1:6; 1Pe 5:3. 18 Ndai lam shawng de ngai nanhte hpe law law lang tsun dan yu ni ai. Ya mung myi prwi hte kahtap nna tsun dan nga nngai. Wudang ntsa e Hkristu a si hkam ai lam hpe hpyen tai nna asak hkrung ai masha law law nga nga ma ai. 19 Dai ni gaw ngarai hta shanhte a lam htum na mara ai; hpa majaw nga yang dai ni a karai gaw shanhte a akan ngu ai hkum shan a marin marit ai lam tai nga ai. Shanhte gaw kaya kahpa lam hta gumrawng shara shatai ma ai hte ndai dinghta ga na arai hpe hkrai sha myit tsang nga ma ai. 20 Anhte chyawm gaw sumsing lamu mung chying sha ni rai nga ga ai rai nna sumsing lamu kaw nna anhte a Hkye Hkrang la ai Madu Hkristu Yesu du sa wa na hpe ala nga ga ai. 21 Shi gaw arai yawng mayawng hte hpe shi a npu e tawn da lu ai hpung shingkang daru magam atsam hte anhte a si chye ai hkum hkrang ni hpe galai kau nna shi a hpung shingkang rawng ai hkum hkrang hte bung hkra galai shachyaw ya na ra ai.