4
1 Hkristu gaw hkum shan hta nni nkri hkrum nu ai rai nna shi a hkam la ai myit mang ai baw hte nanhte mung tinang a hkum ni hpe n-gun shaja la mu; hpa majaw nga yang hkum shan nni nkri hkam sai wa gaw yubak mara hte shi n seng mat nu ai.
2 Dai re ai majaw ya kaw nna ndai mungkan hta nanhte asak hkrung na matu naw ngam nga ai asak aprat laman shinggyim hkum shan a ra marit ai myit n hkan ai sha, Karai Kasang a myit ra ai lam a hkang ai hku nanhte asak hkrung sa wa lu na rai myit dai.
3 Nanhte gaw lai wa sai aten hta ram ram wa na hkra maigan masha ni galaw mayu ai baw hkan galaw lai wa manit dai. Nanhte a asak hkrung lam hpe tara n hkan ai n htap n htuk ai amu, marin marit ai amu, chyaru nang ai, n se n sa galaw ai, nang ai baw malu masha sha ai, tsa lu poi ni galaw ai, hta jai lang manit dai. Dai ni hta grau matsat shabat hkyet rung hpa gaw, sumla ni hpe nawku ai lam rai nga ai.
4 Ya chyawm gaw shanhte hte maren zai ai hte kam mara re ai asak hkrung lam hta nanhte n shang lawm mat manit dai majaw, maigan masha ni mau mat nna nanhte hpe roi asawng ai ga tsun shaga wa ma ai.
5 Rai ti mung shanhte gaw hkrung nga ai ni hte si mat ai ni hpe tara daw dan na matu shajin tawn nga ai Karai Kasang a man de shanhte nan a jahpan dan lu na rai ma ai.
6 Ndai lam a majaw si mat sai ni hpe mung dai Kabu Gara Shiga hkaw dan sai rai nga ai. Shanhte gaw hkum shan hku asak hkrung nga ai ten hta masha shagu hpe tara daw dan ai zawn daw dan hkrum sai ni rai ma ai. Shanhte hpe hkaw tsun ai lam gaw Karai Kasang hkrung nga ai zawn shanhte a wenyi hta hkrung nga na matu rai nga ai.
7 Arai yawng mayawng a hpang jahtum ai aten gaw ni wa magang ra ai, Dai re ai majaw nanhte gaw akyu hpyi lu na matu tinang hkum hpe hkang da nna su hprang let majen maja nga mu.
8 Lam yawng mayawng hta grau nna nanhte shada tsaw ra ai hta makyit sumri ngang ngang rai nga mu; hpa majaw nga yang, tsaw ra ai myit gaw yubak mara law law hpe magap kau ya nga ai.Ref 4:8: 1Ko 13:7; Kol 3:14; Heb 13:1; Yak 5:20.
9 Aput apai n nga ai sha, nanhte shada da manam hkalum ai lam hta ra n rawng hkra galaw daw nga mu.
10 Nanhte gaw Karai Kasang kaw na laksan chyeju kumhpa ni hpe hkam la lu ai hte maren, Karai Kasang a chyeju kumhpa amyu myu hpe kaja ai lit hkam hpareng wa zawn shada da a mai kaja ai akyu a matu jai lang nga mu.
11 Marai langai ngai hkaw tsun a yang gaw, Karai Kasang a mungga hpe hkaw tsun u ga, marai langai ngai daw jau a yang gaw Karai Kasang jaw da ai n-gun lagaw hte maren galaw daw nga u ga; shing rai yang she galaw ai amu yawng mayawng a majaw Madu Yesu a marang e Karai Kasang a hpung shingkang hpe shakawn kungdawn ai lam tai na rai nga ai. Yesu Hkristu hta hpung shingkang hte daru magam n-gun atsam gaw htani htana prat dingsa e anga nga ai law. Amen.
12 Tsaw ra ai ni e, nanhte hta shawoi n byin yu ai baw zawn byin nga ai nanhte hkrum sha nga ai machyi la ai chyam dinglik ai lam hpe hkum mau nga myit.
13 Mau nga na malai, nanhte gaw Hkristu a nni nkri hpe Hkristu hte rau shang lawm hkam la nga myit dai majaw kabu gara nga mu. Shing rai yang she shi a hpung shingkang hte dan pru ai shaloi nanhte nachying kabu gara ai hte hpring tsup wa lu na marin dai.
14 Nanhte Hkristu a hpang hkan nang ai ni re ai majaw roi asawng ai hkrum myit yang nanhte a lu myit dai. Dai gaw hpung shingkang rawng ai wenyi ngu ai Karai Kasang a wenyi gaw nanhte hta e shanu nga ai lachyum rai nga ai.
15 Nanhte hta na langai ngai nni nkri hkrum yang, dai gaw masha sat ai wa shing n rai lagu ai wa, n hkru n kaja ai majaw daw dan hkrum ai wa, masha ni a amu hta hkan kajam chyau lau ai wa re ai majaw hkrum ai nni nkri n rai u ga.
16 Rai ti mung Hkristan rai nga ai majaw nni nkri hkrum a yang gaw, dai hpe hkum kaya nga mu; de a malai Hkristu a mying nsang hkam la lu ai majaw Karai Kasang hpe chyeju dum shakawn nga mu.
17 Tara jeyang hpang na aten du ra ai rai nna Karai Kasang a nta masha ni hpe shawng jeyang daw dan ai hkrum na mara ai. Lama rai nna anhte dai tara jeyang daw dan ai hpe shawng hkrum ga yang gaw Karai Kasang a kabu gara shiga hpe n kam n sham ai ni a jahtum ai gaw kaning rai na rai ai kun?
18 Chyum Laika hta,
?Kaja ai masha ni a matu hkye hkrang la hkrum na matu yak la a yang gaw,
tara n hkan ai yubak lu ai ni gaw hpa byin sana kun?,? nga nna tsun ai.
19 Dai rai nna shanhte a matu Karai Kasang a myit ra ai hku hte maren nni nkri hkrum ai ni gaw kaja ai amu bungli galaw nga let galoi mung sadi dung nga ai tinang a Hpan Da Madu hta awm dawm kam hpa nga mu ga.