PETRU A SHAGUN DAT AI LAIKA LANGAI
(1 PETER)
Ga Nhpaw
Petru a shagun dat ai Laika Langai gaw Asi kaji dingdung daw shara shagu hkan nga bra shingbyi ayai hkawm nga ai ?Karai Kasang a lata la ai amyu masha ni? ngu ai Hkristan ni hpang de hkringdat nna ka dat ai laika rai nga ai. Ndai laika a yaw shada ai lam madung gaw, shanhte a makam masham a majaw zingri zingrat hte nni nkri hkrum katut nga ai laika hkap hti na ni hpe n-gun jaw na matu rai nga ai.
Laika ka ai wa gaw Madu a si hkam ai lam, bai hkrung rawt wa ai lam, bai du sa na ga ndat hte seng ai myit mada shara jaw ya ai dai Kabu Gara Shiga ngu ai Madu Yesu Hkristu a lam shi a laika hkap hti ai ni hpe bai shadum na matu ndai laika ka dat nu ai. Ning rai shadum ai hte maren shanhte gaw shanhte hkrum sha nga ai nni nkri hpe chye na hkap la nna hkam jan shakut sharang nga na matu mung shanhte a makam masham gaw jet nga ai kun? n jet nga ai kun? jep san dinglik yu ai lam she rai nna Yesu Hkristu bai dan pru ai shani e shanhte gaw shagrau sha-a ai kumhpa hkam la na mara ai lam hpe myit mu myit hkut nga na matu mung n-gun jaw ai lam ka dat wu ai. Shi a ru yak hkrum ai ten hta n-gun jaw ai ga hte kapyawn nna laika ka ai wa gaw shi a laika hkap hti na ni hpe Hkristu hte seng ai masha ni zawn asak hkrung hkan sa na matu shadut dat wu ai.
1
1 Yesu Hkristu a kasa, ngai Petru gaw Pontu mung, Galati mung, Kapadokia, Asi hte Behtuni mung hkan e tsasam manam zawn nga shingbyi hkawm nga ai Karai Kasang a lata la ai amyu masha ni hpang de laika ka dat nngai.
2 Shi a Wenyi hta chyoi pra ai amyu masha shatai la nna, Yesu Hkristu a ga madat mara na hte shi a sai hte shachyoi shapra la na matu Kawa Karai Kasang a moi kaw nna shatawng shada da sai hte maren nanhte hpe lata la manit dai.
Chyeju hte ngwi pyaw ai gaw nanhte hta hpring tsup nga malit ga law.
3 Anhte gaw Madu Yesu Hkristu a Kawa Karai Kasang hpe shagrau sha-a nga ga; hpa majaw nga yang, shi a matsan dum ai myit kaba hte Yesu Hkristu hpe si mat ai kaw nna bai hkrung sharawt la ai a marang e shi anhte hpe asak sumdam ningnan bai jaw da mani ai rai nna anhte hta ahkrung nga ai myit mada shara jahpring shatsup ya mani ai.
4 Dai rai nna anhte gaw shi a amyu masha ni a matu Karai Kasang kyem mazing da ai n taw n tsang re ai shaman chyeju ni hpe madu la lu na matu myit mada nga ga ai. Shi gaw n run n hten ai awu asin n re ai n wai n mat ai sali wunli ni hpe sumsing lamu e nanhte a matu kyem mazing da nu ai.Ref 1:4: 1Pe 5:4; Kol 1:5.
5 Dai gaw kam sham ai marang e hpang jahtum ai aten hta dan pru u ga nga nna lajang shajin da sai hkye hkrang la ai chyeju hpe hkam la lu mu ga; Karai Kasang a n-gun atsam hte makawp maga da hkrum nga ai nanhte a matu rai nga ai.
6 Nanhte hkrum hkra nga ai agung alau amyu myu a majaw ya jahkring jahkra yawn hkyen hkrum ra mat ti mung, dai hkye hkrang la ai lam a marang e nanhte akabu gara nga mu.
7 Dai chyam dinglik hkrum ai lam gaw Karai Kasang hpe nanhte kam sham ai myit gaw jet nga ai kun? jen yu na matu rai nga ai. Jahten kau lu ai ja hpe pyi gaw wan hta ju shabyawng nna jen kau ra ai rai nna ja hta grau hpu reng ai nanhte a makam masham hpe mung ngang grin nga na matu jen kau hkrum lu na rai nga ai. Shing rai yang Yesu Hkristu bai dan pru ai nhtoi hta shakawn kungdawn ai, hpung shingkang hte arawng sadang hpe nanhte hkam la na marin dai.Ref 1:7: Yob 23:10; Shk 66:10; Zeh 13:9; Rom 2:7-10; Yak 1:3.
8 Nanhte gaw Yesu hpe n mu yu myit ti mung, shi hpe tsaw ra nga manit dai; shi hpe n mu yu myit ti mung, shi hpe kam sham nga manit dai. Dai rai nna nanhte gaw n-gup aga hte tsun n dang lu hkra re ai kabu gara ai lam kaba hte kabu gara nga lu manit dai.
9 Hpa majaw nga yang, Yesu Hkristu hta kam sham asak hkrung ai a yaw shada ai lam rai nga ai nanhte a asak wenyi ni a hkye hkrang la ai lam hpe hkam la lu nga manit dai.
10 Ndai hkye hkrang la ai lam hte seng nna myihtoi ni gaw akri akrai sawk tam jep yu nhtawm, Karai Kasang nanhte hpe jaw na rai nga ai dai chyeju kumhpa a lam shanhte myihtoi htoi htawn tsun ma ai.
11 Dai hkye hkrang la ai hte seng ai chyeju gaw gara aten aprat hta gara lai hku nna du sa na ra ai lam hpe tam shakut ma ai. Shanhte hta shanu nga ai Hkristu a Wenyi gaw dai aten hta Hkristu hkam na rai nga ai nni nkri lam hpe mung, shing rai hkam ngut ai hpang hkam la na rai nga ai hpung shingkang hpe mung tau hkrau nna madun dan da nga sai.
12 Shanhte shachyen nga ai hkaw tsun ai amu gaw shanhte a akyu ara a matu n rai; nanhte a matu rai nga ai lam Karai Kasang gaw ndai myihtoi ni hpe shadan dan manu ai. Nanhte hpang de dai Kabu Gara Shiga la sa wa ai ni gaw dai myihtoi ni tau hkrau nna hkaw tsun ai ni hpe sumsing lamu kaw nna shangun dat ai Chyoi Pra ai Wenyi a n-gun atsam hte nanhte hpe tsun madun dan ai majaw nanhte na lu manit dai. Ndai lam hpe lamu kasa ni pyi chye na mayu ma ai.
13 Dai re ai majaw, nanhte amu galaw shamu shamawt sa wa na matu nanhte a myit masin ni hpe shajin da mu. Yesu Hkristu dan pru ai shaloi e nanhte hpe jaw ya na ra ai chyeju hpe ung ang ai myit n rawng ai sha amaja nga let tsep kawp myit mada ala nga mu.
14 Karai Kasang a ga hpe madat mara nna nanhte n chye n chyang re ai ni naw rai nga ai ten hta nanhte a myit shadang ai hku hkawm sa lai wa sai zawn matut nna hkum hkan galaw manu.
15 Nanhte hpe shaga la ai Karai Kasang gaw chyoi pra nga ai hte maren, nanhte mung nanhte galaw ai lam shagu hta chyoi pra nga mu.
16 Dai Chyum Laika hta mung, ?Ngai chyoi pra nga nngai majaw, nanhte mung chyoi pra nga mu,? nga nna ka da nga ai.Ref 1:16: Jaw 11:44; 19:2; 20:7.
17 Dai hta kaga masha yawng hte hpe myi man n lata ai sha langai hte langai tinang galaw ai hte maren tara jeyang chye ai Karai Kasang kaw nanhte akyu hpyi myit yang, shi hpe, ?Wa e,? ngu nna hpyi myit dai, Dai rai nna ndai mungkan hta nanhte asak hkrung nga ai laman hta shi hpe hkrit hkungga nga mu.
18 Nanhte a kaji kawa ni kaw na hkan dagraw la ai manu n rawng ai asak hkrung lam a arawn asam hta na nanhte hpe hpa baw hte galai hkrang la sai lam nanhte chye nga myit dai. Dai gaw jahten sharun kau lu ai ja gumhpraw zawn re ai arai lama ma hte n rai,
19 Ana n kap ra n rawng ai sagu kasha hte bung ai hpu la ai Hkristu a asak hpe nawng ya kau ai hku nna, hkye hkrang la ai lam rai nga ai.
20 Ginding aga garai n lat kaw nna Karai Kasang gaw shi hpe lata san da nu ai rai nna ndai hpang jahtum ai nhtoi ni hta e nanhte a matu mara shadan dan dat sai.
21 Madu Yesu hpe si ai kaw na bai hkrung sharawt la nna hpung shingkang ap ya hkrum ai wa a marang e, nanhte Karai Kasang hpe kam sham nga manit dai; shing rai nanhte a makam masham hte myit mada ai lam gaw, Karai Kasang hta jung noi nga ai.
22 Ya nanhte gaw dai teng man ai lam hpe madat mara nga let nanhte a hkum ni hpe jasan jaseng kau nhtawm, nanhte a kam sham ai manaw manang ni hpe kaja wa tsaw ra nga myit dai. Dai rai nna nanhte shada da myit masin mahkra hte tsaw ra nga mu.
23 Hpa majaw nga yang, nanhte gaw dai ahkrung nga ai hte htani htana anga nga ai Karai Kasang a mungga marang e n si n mat chye ai kanu kawa ni a kasha ni zawn shangai wa manit dai.
24 Dai gaw Chyum Laika hta,
?Shinggyim masha amyu baw yawng gaw tsingdu zawn rai nga ai;
shanhte a hpung shingkang yawng mung nam na nampan pu hte bung nga ai.
Dai tsingdu gaw nyui mat wa nna nampan pu ni run hkrat mat ma ai.Ref 1:24: Shk 103:15; Esa 40:6; 51:12; Yak 1:10.
25 Rai ti mung Madu a mungga chyawm gaw prat mi hte prat mi anga nga ai, nga nna tsun da nga ai.
Dai mungga gaw nanhte hpe hkaw tsun dan sai Kabu Gara Shiga rai nga ai.