7
1 Dai Madu a hpung shingkang shanu nga ai Sum hpe Mawshe sharawt da ngut ai shani hta, shi gaw Sum hte de a arai ni yawng hpe namman chya nhtawm ap nawng da wu ai.
2 Dai hpang amyu lakung lama ni a ningbaw ni ngu na Israela amyu bawsang ni hta na ningbaw ni, yuptung jahpan woi hta ai dai masha ni nan
3 dai Madu hpang de shanhte a hkungga ni la sa ma ai. Dai ni gaw leng kru hte dumsu utang shi lahkawng, ningbaw lahkawng hta leng langai ngai, ningbaw shagu a matu utang langai hpra rai na rai nga ai. Dai ni hpe shanhte sak jaw ngut ai hpang,
4 dai Madu gaw Mawshe hpe, ?Dai kumhpa ni Sum amu galaw ai hta
5 lang na matu hkap la da u; shing rai dai ni hpe Lewi masha ni hta shanhte galaw ang ai amu hku hkan nna karan ya u,? ngu nna tsun wu ai.
6 Dai rai nna Mawshe gaw dai leng ni hte utang ni, Lewi masha ni hpe jaw ma ai.
7 Shi gaw Gershon a kashu kasha ni hpe leng lahkawng hte utang mali jaw nna,
8 leng mali hte utang matsat hpe chyawm gaw Merari kashu kasha ni hpe jaw wu ai. Shanhte galaw na amu yawng Arun a shadang sha Ihtama matsun hpareng ai hku hkan galaw na rai ma ai.
9 Rai ti mung Kohat a kashu kasha ni mahtang chyoi pra ai arai ni hpe sadi sahka hte shanhte a lahpa hte hpai ma ai majaw Mawshe shanhte hpe leng hte utang ni n jaw ma ai.
10 Ningbaw ni mung tawn hkungri hpe ap nawng ai poi galaw na matu hkungga ni la sa ma ai. Tawn hkungri hta shanhte a kumhpa ni hpe sak jaw na matu shanhte jin jin rai nga ma ai shaloi,
11 Dai Madu gaw Mawshe hpe, ?Ningbaw ni kaw na marai langai mi gaw nhtoi shi lahkawng ya laman shani shagu tawn hkungri hpe ap nawng na matu tinang a kumhpa ni sak jaw na shanhte hpe tsun u,? ngu nna tsun wu ai.
12-83 Shanhte gaw lawu de na jahpan hte maren hkungga ni sak jaw ma ai.
Langai hte langai la sa ai hkungga ni mung bung nga ai; tawn da ai manu hte maren gumhpraw ban langai mi hta aung za manga shi, gumhpraw jarung langai mi hta aung za sumshi, shadung kumhpa a matu dai yan hta jahpring dat ai namman hte gumrin ai mani ai muk shadung; manam pyaw ai baw hte hpring nna aung za mali namnak rawng ai ja ban langai; wan nat hkungga a matu usu uram langai, sagu la langai hte ladu hkrum sai sagu la kasha langai mi; htingrai hkungga a matu bainam langai, mahku hkungga a matu usu lahkawng, sagu la manga, bainam la manga, ladu hkrum sai sagu la kasha manga rai nga ai.
84-88 Tawn hkungri hpe ap nawng da na matu Israela ningbaw shi lahkawng la sa na hkungga yawng a jahpan gaw lawu de na chyarang hte maren rai na rai nga ai:
-gumhpraw ban shi lahkawng hte gumhpraw jarung shi lahkawng, dai ni yawng rai yang pawng kru shi li nga ai.
-ja ban shi lahkawng, dai yawng aung za mali shi matsat li nna, manam pyaw ai baw hte hpring nga ai;
-wan nat hkungga a matu shadung hkungga ni hte hpawn usu shi lahkawng, sagu la shi lahkawng, laning mi ladu hkrum sai sagu la kasha shi lahkawng,
-htingrai hkungga a matu bainam la shi lahkawng;
-hkungga ni nawng na matu usu hkun mali, sagu la kru shi, bainam la kru shi, laning mi ladu hkrum sai sagu kasha kru shi rai nga ai.
89 Mawshe mung dai Madu hte ga shaga na matu Sum kata de shang wa yang, dai Ga Shaka Sumpu a magap ntsa na singkaw tu ai hkrung kanu lahkawng yan a lapran kaw nna dai Madu shi hpe ga shaga ai nsen na wu ai.