30
1 Mawshe gaw Israela amyu bawsang ni a ningbaw ni hpe hkan sa na ga matsun jaw ya wu ai.
2 Lasha langai ngai dai Madu hpe arai lama ma sak jaw na nga, ga shaka tawn da ai rai yang mung, shing n rai arai lama ma koi gam na nga dagam shaka da ai rai yang mung, shi a ga sadi hpe jahten lu na n rai; shi galaw na ngu tsun da sai hte maren lam shagu hpe shi galaw na rai wu ai. Ref 30:2: Trj 23:21-23; Mat 5:33.
3 Kawa a nta e naw nga ai mahkawn numsha gaw dai Madu hpe arai lama ma sak jaw na matu ga shaka da ai, shing n rai arai lama ma hpe koi gam na nga sadi tawn da ai rai yang,
4 dai ga shaka a lam shi a kawa na nna hkum shadang ai lam n nga ai rai yang gaw shi tawn da ai ga shaka shing n rai ga sadi hte maren lam shagu hpe galaw lu na rai wu ai.
5 Rai ti mung dai lam na nna ga shaka shatup na nga, shi a kawa hkum shadang ai rai yang chyawm gaw dai ga shaka hpe shi shatup na n rai; dai ga shaka shatup na matu shi a kawa ningdang kau shangun nga ai majaw dai Madu mung shi hpe mara dat ya na rai wu ai.
6 Dinghku garai n shang ai numsha gaw ga shaka hpe atsawm sha myit yu nna mung, ndum nmi re ai hku nna mung tawn da nhtawm arai lama ma hpe koi gam na nga, ga sadi jaw ngut ai hpang dinghku de ai rai yang, shi a madu wa dai ga shaka a lam hpe na nna hkum shadang ai lam n nga ai rai yang shi tawn da ai
7 ga shaka hte ga sadi hte maren lam shagu hpe galaw lu na rai wu ai.
8 Rai ti mung shi a madu wa dai lam hpe na nna ga shaka shatup na matu hkum shadang da ai rai yang, dai ga shaka hpe shatup ra na n rai. Dai Madu mung shi hpe mara dat ya na rai wu ai.
9 Gaida shing n rai dinghku hka sai num rai yang mung, shi tawn da ai ga shaka shagu hte lama ma hpe koi gam na nga tawn da ai ga sadi shagu hpe shatup lu na rai wu ai.
10 Dinghku num langai gaw ga shaka tawn da ai hte lama ma hpe koi gam na matu ga sadi shagrin da nna,
11 shi a madu wa dai lam hpe na nna n hkum shadang ai rai yang, shi tawn da ai ga shaka hte ga sadi hte maren lam shagu galaw lu na rai wu ai.
12 Rai ti mung dai lam hpe shi a madu wa na nna ga shaka shatup na matu hkum shadang ai rai yang, dai ga shaka hpe shi n hkan shatup ra nga ai. Shi a ga shaka hpe madu wa hkum pat kau wu ai majaw dai Madu mung shi hpe mara dat ya na rai wu ai.
13 Shi a madu wa chyawm gaw shi shagrin da sai ga shaka shing n rai ga sadi hpe shagrin yang shagrin, dawm yang dawm kau shangun lu ai ahkaw ahkang lu nga wu ai.
14 Rai ti mung ga shaka tawn da ai hpe shi na ti mung, lani hte lani hkum shingdang ai lam n nga ai rai yang, shi shagrin da sai ga shaka shing n rai ga sadi hte maren lam shagu hpe shi galaw na rai wu ai. Dai ga shaka a lam hpe shi na ai shani jang n hkum shingdang nu ai majaw dai ga shaka hpe shi shagrin da nu ai.
15 Rai ti mung dai ga shaka hpe hpang e shi dawm kau mayu ai rai yang, ga shaka shatup ai hta dingbai dingna jaw ai majaw de a mara shi hkam sha lu na rai wu ai.
16 Ndai ni gaw kawa a nta e naw nga ai num shayi sha hte dinghku de sai numsha langai mi a ga shaka tawn da ai lam hte seng nna dai Madu Mawshe hpe tsun matsun ai tara ni rai nga ai.