18
1 Dai Madu gaw Arun hpe, ?Nye a hpung shingkang shanu nga ai Sum kata hta daw jau amu hte seng ai shut hpyit mara hpe nang hte na a shadang sha ni hte Lewi masha ni hkam sha lu na rai ma ai; rai ti mung hkinjawng aya hte seng ai daw jau amu hte seng ai shut hpyit mara hpe chyawm gaw nang hte na a shadang sha ni chyu sha hkam sha lu na rai myit dai.
2 Nang hte na a shadang sha ni Sum hta daw jau nga ai shaloi nang hpe amu galaw karum na matu Lewi amyu kaw na na a nhpu nnau ni hpe sit sa shangun u.
3 Shanhte gaw Sum hta galaw ra ai shanhte a amu ni hte nang hpe karum na shanhte a lit ni hpe galaw shatup na rai ma ai; rai ti mung Chyoi Pra ai Shara hta nga ai san seng ai arai hte tawn hkungri ni hpe shanhte sa hkra lu na ma ai n rai; shanhte dai hpe sa hkra hkrup ma ai rai yang, shanhte mung, nan wa ni mung si na rai myit dai.
4 Shanhte gaw nang hte rau amu galaw nna Sum hte seng ai daw jau amu yawng hte hpe galaw shatup na rai ma ai; rai ti mung ra rawng ai wa chyawm gaw nang hte rau amu galaw mai nga ai n rai.
5 Nang hte na a shadang sha ni chyu sha Chyoi Pra ai Shara hte tawn hkungri hte seng ai amu bungli ni galaw gun hpai lu na rai myit dai; shaloi Israela amyu masha ni hpe pawt sindawng ai lam bai pru wa lu na ra ai n rai.
6 Ngai gaw na a matu kumhpa shatai na, na a nhpu nnau Lewi masha ni hpe Israela amyu masha ni kaw na lata shaw la ai wa rai nga nngai. Shanhte gaw nye a matu ap nawng da hkrum nga masai rai nna Sum kata hta galaw na magam bungli ni hpe gun hpai lu na rai ma ai.
7 Rai ti mung, nang hte na a shadang sha ni chyu sha Chyoi Pra Htum ai Shara hte tawn hkungri hta jaw jau ra ai hkinjawng amu yawng galaw shatup na rai myit dai. Nanhte galaw na hkinjawng amu hpe kumhpa zawn ap ya ma sade ai majaw ndai amu ni gaw na a lit rai nga ai. Dai rai nna chyoi pra ai arai nga ai de sit sa ai ra rawng ai masha kadai mung sat kau ai hkrum na rai wu ai,? ngu nna tsun wu ai.
8 Dai Madu gaw Arun hpe, ?Nye a matu wan nat hkungga n re ai kaga laksan kumhpa ni yawng ngai nang hpe jaw ya nngai hpe dum u. Dai ni gaw nang hpe mung, na a amyu matu ni hpe mung htani htana kumhtaw tai na, ngai jaw nga nngai.
9 Tawn hkungri ntsa e n hkru ai chyoi pra htum ai hkungga ni ngu na shadung hkungga, htingrai hkungga hte htang jaw hkungga ni hpe nang madu la lu na rai ndai. Nye a matu ngu nna sak jaw ai dai chyoi pra ai hkungga nlang hte gaw nang hte na a shadang sha ni a matu rai nga ai.
10 Nanhte gaw dai ni hpe chyoi pra ai shara hta sha lu na rai myit dai; dai ni hpe lasha ni chyu sha mai sha nga ai; dai ni hpe chyoi pra nga ai ngu na rai nga ai.
11 ?Dai sha n-ga, Israela masha ni nye a matu sak jaw ai kaga laksan kumhpa ni mung na a matu rai na rai nga ai. Dai ni hpe nang hte na a shayi shadang sha ni a matu ngu nna prat dingsa ngai jaw ya nga nngai. Na a dinghku kata na san seng ai masha shagu hte mung dai ni hpe sha mai nga ai.
12 ?Israela amyu masha ni ngai hpe shaning shagu jaw jau ai shawng ngai ai nsi naisi a kaja htum ai tsanlun sau, sabyi ntsin hte nai mam ngai nang hpe jaw nga nngai.
13 Dai ni yawng gaw na a matu rai nga ai. Na a dinghku na san seng ai masha shagu gaw dai ni hpe sha mai nga ai.
14 ?Israela amyu masha ni nye a matu ngu nna ga shaka hte nawng jau ai arai shagu mung na a rai nga lit dai. Ref 18:14: Jaw 27:28.
15 Shinggyim masha rai ti mung, yam nga rai ti mung, nye a matu ngu nna Israela amyu masha ni sak jaw ai alat shagu mung na a rai nga lit dai. Rai ti mung ma alat shagu hpe nang mari shaw la lu na rai ndai. N san n seng ai yam nga alat shagu hpe mung nang mari shaw la lu na rai ndai.
16 Tawn da ai manu jahpu hte maren ma ni a asak shata mi rai jang, gumhpraw dengga manga hte mari shaw la lu na rai nga ai.
17 Rai ti mung, sagu, bainam alat ni hpe chyawm gaw mari shaw la lu na myit dai n rai; dai ni gaw ngai hte tsep kawp seng nga ai rai nna ngai hpe shagu hkungga hku nawng ya na rai myit dai. Dai ni a asai hpe tawn hkungri hta lapri bun nhtawm sau man hpe mung nye a matu manam pyaw ai sangau shatai na lusha hkungga hku nat nawng na rai myit dai.
18 Dai ni hta na ashan gaw nang hte seng nga ai, laksan hkungga rai nga ai sinda hte hkra magyi gaw na a rai nga lit dai.
19 ?Israela amyu masha ni ngai hpe sak jaw ai laksan kumhpa ni yawng gaw nang hte na a shayi shadang sha ni hpe prat dingsa ngai jaw ya nga nngai. Dai gaw nanhte mung, na a amyu matu ni hte mung ngai tawn da ai n hten n run mat ai ga shaka rai nga ai,? ngu nna tsun wu ai.
20 Dai Madu gaw Arun hpe, ?Nang gaw lamu ga sali loi mi mung hkam la lu na n rai; Israela lamu ga daw chyen pyi na a matu masat ya hkrum na n rai. Ngai Madu nan na a sali rai nga nngai,? ngu nna tsun wu ai.
21 Dai Madu gaw, ?Israela amyu masha ni ngai hpe sak jaw ai htam shi hta na htam mi shagu, Lewi masha ni hpe ngai jaw ni ai. Dai gaw nye a hpung shingkang shanu nga ai Sum hpe yu lajang ai shanhte a daw jau magam bungli a matu shabrai rai nga ai. Ref 18:21: Jaw 27:30-33; Trj 14:22-29.
22 Kaga Israela masha ni chyawm gaw Sum de loi mi mung sit sa lu na ma ai n rai. Ndai lam hta shanhte si ari hkrum sha na ma ai.
23 Ya kaw nna Lewi masha ni chyu sha Sum hpe yu lajang nhtawm dai hte seng ai magam lit ni hpe tup hkrak gun hpai na rai ma ai. Dai gaw nanhte amyu matu ni prat dingsa hkan sa galaw na tara rai nga ai.
24 Israela amyu masha ni ngai hpe sak jaw ai laksan kumhpa mahtang shanhte a matu htam shi hta na htam mi sut gan hku ngai jaw ya ni ai. Dai re ai majaw shanhte gaw Israela mung hta prat dingsa madu da lu na sali n hkam la lu na mu ai gaw ngai shanhte hpe tsun ni ai,? ngu nna tsun wu ai.
25-26 Dai Madu gaw Lewi masha ni hpe htawn tsun na matu Mawshe hpe, ?Nanhte a sali matu dai Madu nanhte hpe jaw ai htam shi hta na htam mi, Israela amyu masha ni kaw na nanhte lu la jang, dai hta na htam shi dai Madu a matu laksan kumhpa hku nanhte sak jaw lu na rai myit dai.
27 Dai laksan kumhpa mahtang sun hkauna galaw ai wa nai mam hte sabyi nnan galaw shapraw nna nawng ya ai hkungga hte maren nawng ya nga na rai myit dai.
28 Ndai hku nna, nanhte mung Israela amyu masha ni kaw na lu la ai htam shi hta na htam mi ngu ai dai Madu hte seng ai laksan kumhpa sak jaw na rai myit dai. Nanhte gaw dai Madu a matu ngu ai laksan kumhpa Arun hpe jaw lu na rai myit dai.
29 Nanhte lu la ai kaja htum ai kaw na jaw na rai myit dai.
30 Nanhte gaw kaja htum ai daw hpe sak jaw ngut ai shaloi, kaga ngam ai hpe mung sun hkauna galaw sha ai wa shi a hkungga nawng ya ai hpang ngam ai hpe kyem da wu ai zawn nanhte mung kyem da mai nga myit dai.
31 Dai gaw Sum kata e nanhte gun hpai ai amu a matu nanhte a shabrai rai nga ai majaw nanhte hte nanhte a dinghku masha ni dai ngam ai hpe shara shagu hkan rai tim, sha mai nga myit dai.
32 Dai hta na kaja htum ai hpe dai Madu a matu sak jaw nga dingsa nanhte dai hpe sha myit yang mara lu ai ni tai na myit dai n rai. Rai ti mung dai kaja htum ai daw hpe garai n nawng jau yang kumhpa lama ma hpe sha ai hte Israela amyu masha ni a chyoi pra ai kumhpa hpe awu asin di lu na myit dai n rai; dai zawn galaw ai rai yang, nanhte si ai hkrum na rai myit dai.?