4
(Mat 13:1-9; Luk 8:4-8)
1 Bai Yesu gaw Galile Nawng makau e sharin shaga hpang wu ai. Shi kaw sa hpawng shinggrup nga ai shawa masha ni law la nga ma ai majaw, shi gaw nawng na li langai mi hta shang nna dai hta e dung nga ai. Shawa masha ni Yesu shaga ai nsen na lu na daram li hpe hkin-gau hte jahka tawn nna, shawa masha ni gaw nawng makau hkarang ntsa e nga nga ma ai.Ref 4:1: Mat 13:1; Luk 8:4.*
2 Shi gaw ga shadawn ni hpe lang nna lam law law hpe ning ngu nna sharin shaga mu ai:
3 ?Madat mu! Kalang mi na nli gat ai wa langai mi gaw, nli gat na nga nna pru sa wa ai.
4 Ga hta nli gat dat wu yang, nkau mi lam ntsa hta hkrat nna, u ni sa nna dai hpe hta sha kau ma ai.
5 Nkau mi ga sau n law ai lungrawk ga ntsa hta hkrat wa nna, ga sau n htat ai majaw nli tum ni alawan sha tu pru wa ai.
6 Dai hpang jan pru kahtet jang, krau mat wa nna ru sung sung n jung lu ai majaw, gade n na yang nyip si mat ma ai.
7 Nli tum nkau mi ju sumwum ni hta hkrat bang ai; ju hpun ni tu kaba wa nna dai hkai hpun ni hpe lim kau mu ai majaw hpa asi n si lu ai.
8 Rai ti mung, nli tum nkau mi gaw, ga kaja hta hkrat nna, tu pru wa nhtawm kaba wa ai hte nkau mi htam sumshi, kaga ni kru shi, bai kaga ni latsa rai nna asi si mayat wa ai.?
9 Bai shi gaw, ?Madat mu, na la na na tu ai wa gaw na la u ga,? ngu nna tsun hpungdim wu ai.
(Mat 13:10-17; Luk 8:9-10)
10 Yesu shi hkrai sha rai nga yang, shi a lam na lu ai masha nkau mi gaw sape shi lahkawng hte hte rau, Yesu kaw sa nna ga shadawn ni a lam san mu ai.
11 Yesu gaw, ?Nanhte gaw Karai Kasang a Mungdan hte seng ai, mauhpa sung htum ai makoi magap da ai lam ni hpe chye lu ai ahkang lu myit dai. Rai ti mung, shinggan de nga ai ni chyawm gaw hpa lam ni hpe mung, ga shadawn hku sha na la lu ma ai.Ref 4:11: 1Ko 5:12; Kol 4:5; 1Tm 3:7.*
12 Hpa majaw nga yang,
?Shanhte gaw yu layu e n mu na ma ai,
na lana e n chye na ma ai.
Lama wa shanhte gaw, tinang yu ai arai hpe mu nna,
na ai ga hpe chye na shajang ma ai rai yang gaw,
shanhte Karai Kasang hpang de kayin wa na ma ai rai nna,
Shi gaw shanhte a yubak mara dat kau ya na rai nga ai,? nga nna Chyum Laika ni hta tsun nga ai,? ngu nna shanhte hpe tsun mu ai.Ref 4:12: Esa 6:9-10; Mat 13:14; Luk 8:10; Yhn 12:40.*
(Mat 13:18-23; Luk 8:11-15)
13 Dai hpang Yesu gaw, ?Ndai ga shadawn hpe nanhte n chye na myit ni? Dai hku rai yang gara ga shadawn hpe nanhte chye na lu na rai ni?
14 Nli gat ai wa gaw Karai Kasang a mungga hpe gat nga ai
15 Masha nkau mi gaw lam hkan e hkrat taw ai nli tum ni hte bung nga ma ai, shanhte dai mungga hpe na la ai shaloi jang, Satan wa sa du nna shanhte hta gat da ai mungga hpe shaw la kau ya mu ai.
16 Bai masha nkau mi gaw, lung rawk ga ntsa e hkrat ai nli tum ni hte bung nga ai. Mungga hpe na la ai shaloi jang, dai hpe kabu gara hkap la ma ai.
17 Rai ti mung shanhte hta ru sung hkra n jung nga ai majaw, shanhte na na n grin ma ai. Dai mungga a majaw ru yak jam jau, shing n rai zingri zingrat ai lam hkrum hkra wa ai shaloi jang shanhte kataw mat ma ai.
18 Bai masha nkau mi gaw, ju sumwum ni hta hkrat bang ai nli tum ni hte bung nga ai. Shanhte gaw dai mungga hpe na la lu ma ai.
19 Rai ti mung dinghta asak hkrung lam a myit ru myit tsang ai lam, sutgan ra marin ai lam hte kaga ra sharawng ai lam ni dumbru shang wa nna dai mungga hpe lim kau ai majaw asi n si lu ai.
20 Rai ti mung kaga masha ni chyawm gaw ga kaja hta hkai dat ai nli tum ni hte bung nga ma ai. Dai mungga hpe na la ai hte hkap la nna asi si ma ai rai nna nkau mi dang sumshi, nkau mi dang kru shi, nkau mi latsa mayat wa ma ai,? ngu nna shanhte hpe tsun mu ai.
(Luk 8:16-18)
21 Bai matut nna Yesu gaw, ?Pyengdin hpe mung npu e, shing n rai yup ku npu e shadun da na matu la sa ga ma ni? Pyengdin shadun hta e she shadun ga ma ai n rai ni? Ref 4:21: Mat 5:15; Luk 8:16; 11:33.*
22 Hpa majaw nga yang, makoi magap da ai arai hpa rai ti mung shinggan de dan dawng wa na ra ai; magap tawn da ai arai hpa rai ti mung hpaw dat na ra ai.Ref 4:22: Mat 10:26; Luk 12:2.*
23 Dai rai yang madat mu, na la na, na tu ai wa kadai mung, na la mu ga,? ngu nna shanhte hpe tsun mu ai.
24 Dai hta kaga Yesu gaw, ?Nanhte na lu ai lam hpe atsawm sha madat mu! Nanhte masha kaga ni hpe jeyang ai shaloi lang ai tara ni hte maren, nanhte hpe jeyang ai shaloi Karai Kasang lang na ra ai, rai ti mung dai hta grau nna pyi laja ai rai na ra ai.Ref 4:24: Mat 7:2; Luk 6:38.*
25 Lama ma lu ai wa kadai hpe mung naw jat jaw na ra ai; hpa mung n lu ai wa hpe gaw shi lu ai arai kachyi mi hpe pyi, shi kaw na shaw la kau ya na ra ai,? ngu nna shanhte hpe tsun mu ai.Ref 4:25: Mat 13:12; 25:29.*
26 Bai Yesu gaw, ?Karai Kasang a Mungdan gaw nli gat ai wa mu hkrum ai mabyin masa hte bung nga ai. Masha langai mi gaw shi a yi hta nli gat ayai wu ai.
27 Shi gaw, nli gat da ngut nna, shana yup, shani rawt rai nga ai. Dai laman gade nna yang, nli tum ni gaw maku ku nna tu kaba wa ai. Rai ti mung dai gara hku byin wa ai hpe shi n chye wu ai.
28 Aga gaw shi hkrai shi hpun hpe, tu kaba wa nna asi si shangun nga ai: shawng nnan maku ku pru wa ai hpang htingkyang, dai hpang htingkyang hta mam nsi hkrai hpring tup wa shangun ai.
29 Mam myin jang, nmut ta du sai majaw, shi gaw dai hpe nhkyau hte dan la hpang wu ai, ngu nna tsun mu ai.
(Mat 13:31-32; 34; Luk 13:18-19)
30 ?Karai Kasang a Mungdan gaw hpa hte bung ai ngu nna anhte tsun na rai ta? Dai hpe shaleng dan na matu hpa ga shadawn lang na rai ta?Ref 4:30: Mat 13:33; Luk 13:18; Kas 2:41.*
31 Dai gaw ndai hte bung nga ai. Mungkan hta kaji htum ai nli tum rai nga ai chyinghkrang tum langai mi hpe masha langai mi e la nna ga hta gat dat wu ai.
32 Gade n na ai hpang, dai gaw tu kaba wa nna shat mai hpun amyu ni mahkra hta grau kaba wa ai. Dai gaw lakung lakying kaba ni gungdam pru wa nna, ntsa malen u ni sa nhtawm de a shingnip hta e shanhte a tsip ni hpe tsip da ma ai,? ngu nna tsun mu ai.
33 Yesu gaw shanhte matsing lu ai made ndai zawn re ai kaga ga shadawn ni law law hte masha ni hpe shi a mungga hkaw tsun dan mu ai.
34 Ga shadawn hte n rai yang gaw shi shanhte hpe hpa mung n tsun dan yu ai rai ti mung shi a sape ni hte rau shanhte hkrai rai nga ai ten hta, lam shagu shanhte hpe lachyum hpyan dan mu ai.
(Mat 8:23-27; Luk 8:22-25)
35 Dai shani a shana maga de du jang, Yesu gaw, shi a sape ni hpe, ?Anhte nawng wora hkran de rap sa wa saga,? ngu nna tsun mu ai.
36 Dai rai nna shanhte gaw, shawa masha ni hpe kau da nhtawm Yesu shang dung nga sai li de sape ni shang nna shi hpe shanhte woi rap sa wa ma ai. Li kaga ni mung lawm nga ma ai.
37 Dai shaloi akajawng sha, nbung laru kaba ru wa nna hka leng ni hta kaput bang wa ai a majaw dai li hta hka hpring wa magang nga ai.
38 Yesu chyawm gaw li mai de bunghkum langai mi hkum nna yup pyaw taw nga ai. Sape ni gaw Yesu hpe jasu nna, ?Sara e, anhte si wa hkyen nga ai hpe nang hpa n nawn nga n ni?,? ngu nna tsun mu ai.
39 Dai majaw shi rawt tsap nna nbung hpe, ?Atsin sim rai nga u!,? ngu nna hkang dat wu ai hte hkaleng ni hpe mung, ?Sim mat u!,? ngu wu ai. Dai nbung num mat wa nna dai yang e akatsi sha rai mat wa ai.
40 Shaloi Yesu gaw shi a sape ni hpe, ?Nanhte hpa majaw hkrit kajawng nga myit ta? Nanhte kam sham ai myit garai n rawng nga myit ni?,? ngu nna shanhte hpe tsun mu ai.
41 Shanhte mahtang hkrit kaba hte hkrit mat ma ai rai nna, ?Ndai wa gaw kadai wa re ai i? Dai nbung hte hkaleng ni pyi shi a ga madat nga ma hka!,? nga nna shada da tsun shajang ma ai.