2
(Mat 9:1-8; Luk 5:17-26)
1 Ya nhtoi tawng marang mi na wa ai hpang, Yesu gaw Kaperna-um mare de bai du wa ai. Shi nta e nga nga ai lam shiga masha ni na shajang ma ai.
2 Dai majaw masha ni law law shi kaw sa zuphpawng nga ma ai rai nna, shara n nga mat ai gaw nta chyinghka lam ndaw pyi n ngam hkra rai nga ai. Yesu gaw shanhte hpe mungga hkaw tsun dan nga ai.
3 Dai shaloi hkum katsing si ai wa langai mi hpe masha marai mali Yesu kaw hpai sa mu ai.
4 Masha wunawng sa hpawng chyat nga ai majaw shanhte gaw dai wa hpe shi kaw n jashawn lu mu ai. Dai majaw shanhte gaw nta numgaw ntsa de bai lung wa nna Yesu a ntsa ang ang na nta galup da ai wut pa ni hpe kayen gaw kau nna hku shawaw la nhtawm, dai wa hpe shi a yupra panep hte hpawn sumri hte shayu jahkrat dat mu ai.
5 Yesu gaw shanhte hta kam sham ai myit gade daram rawng nga ai hpe mu jang, ?Sha e, na yubak dat kau ya sai,? ngu nna katsing si ai wa hpe tsun wu ai.
6 Dai yang e tara sara nkau mi dung nga ma ai rai nna, ?Ndai wa gaw ndai zawn nga nna kaning rai tsun gwi ai kun? Dai gaw Karai Kasang hpe n kaw n law shatan n hkan galaw ai lam rai nga ai.
7 Karai Kasang chyu sha yubak mara ni hpe dat kau ya lu ai wa rai nga ai nga nna shanhte dai shanhte myit la nga ma ai.
8 Yesu gaw shanhte hpa baw myit nga ai lam hpe kalang ta chye ya ai majaw shi gaw, ?Nanhte hpa rai dai zawn re ai lam ni myit aru yu nga myit ta?
9 Ndai hkum katsing si ai wa hpe, ?Na yubak dat kau ya sade ai,? shing n rai, ?Rawt u, na yupra panep hta hpai nna hkawm wa su, ngu nna tsun na gara mahtang grau loi nga a ta??
10 Masha Kasha gaw ga ntsa e, yubak dat kau ya ai ahkang aya lu ai wa re ai lam ya ngai nanhte hpe madun dan made ga,? ngu nhtawm dai hkum katsing si ai wa hpe,
11 ?Ngai nang hpe tsun de ga, rawt u, na a yupra rai hta hpai nna nta de wa nu!,? ngu nna tsun wu ai.
12 Shanhte yawng la yu nga ma yang, dai masha wa rawt nna, shi a yup ra rai hta hpai let tin tin pru mat wa ai. Shanhte yawng mau mahka mat ma ai hte, Karai Kasang hpe shakawn kungdawn let, ?Anhte galoi mung ndai zawn re ai n mu yu ga ai,? nga nna tsun ma ai.
(Mat 9:9-13; Luk 5:27-32)
13 Yesu gaw Galile nawng makau de bai pru sa mat wa ai. Shawa masha ni shi hpang de du sa ma ai rai nna shi shanhte hpe sharin shaga hpang mu ai.
14 Yesu matut nna hkawm sa mat wa yang, Alhpe a kasha kang hta ai Lewi ngu ai wa hpe shi a kang hta ai sum e dung nga ai hpe mu hkrup wu ai. Yesu gaw, ?Ngai kaw hkan nang rit,? ngu nna shi hpe tsun wu yang, Lewi mung rawt nna Madu a hpang hkan nang nga ai.
15 Dai hpang gade nna yang, Yesu gaw shi a sape ni hte rau Lewi a nta e shat sha nga ai. Kang hta ai ni law law hte yawng e jawm kabai kau hkrum ai masha ni d 2:15: masha ni: Masha e kabai kau hkrum ai ni (Outcasts): Yuda masha ni gaw Yuda nawku htung a tara ni hpe n hkan n sa ai, jep da ai lusha ni hpe sha ai tara maigan ni hte kanawn mazum ai masha ni hpe yubak lu ai masha ni ngu nna matsat ai hte shanhte a hpawng hta n shalawm la ai kabai kau ma ai.* mung shi kaw hkan nang nga ma ai rai nna, law law wa Yesu hte rau shat sha ai ku hta dung lawm nga ma ai.
16 Hparishe ni hte Tara sara nkau mi gaw, Yesu shing rai kang hta ai ni hte kabai kau hkrum ai masha ni a hpawng hta shat rau jawm sha nga ai hpe mu ma ai shaloi, shi a sape ni hpe, ?Hpa majaw shi dai zawn re ai masha ni hte rau lu sha nga ai kun?,? nga nna san ma ai.
17 Yesu dai hpe na wu yang, ?Hkam kaja ai ni tsi sara n ra ma ai, machyi ai ni sha ra ma ai. Ding hpring nna hkungga ging dum ai ni hpe shaga na matu n rai, yubak lu ai ngu nna kabai kau hkrum ai ni hpe shaga na matu she ngai sa du nngai,? ngu nna shanhte hpe tsun mu ai.
(Mat 9:14-17; Luk 5:33-39)
18 Kalang mi na ten hta Hkalup Sara Yawhan hte Hparishe ni a sape ni lu sha gam nga ma ai. Masha nkau mi Yesu kaw sa nna, ?Hkalup Sara Yawhan hte Hparishe ni a sape ni gaw lusha gam ma ai; rai ti mung na a sape ni mahtang hpa rai lusha n gam nga ma ta?,? ngu nna san mu ai.
19 Yesu gaw, ?Hkungran ai la nnan wa a manaw manang ni gaw la nnan wa hte rau nga nga ai ten hta lusha gam lu na rai ma ni? Kaja wa n rai law! la nnan wa shanhte hte rau naw nga nga ai laman e, shanhte lusha gam na ma ai n rai.
20 Rai ti mung la nnan wa hpe shanhte kaw na jahka la kau ya ai nhtoi du na ra ai; dai nhtoi hta e shanhte lu sha gam na mara ai.
21 ?Kadai mung sumpan chyen nnan hte palawng dingsa hpe n kapa ga ma ai, hpa majaw nga yang, dai sumpan chyen nnan htun wa nna dai dingsa hpe gang je kau na ra ai rai nna, de a je mat ai hkang gaw grau kaba wa ai.
22 Sabyi nnan hpe mung, shanhpyi sabyi ndum dingsa ni hta n bang ga ma ai, hpa majaw nga yang, sabyi gaw sabyi ndum ni hpe kapaw je kau nna sabyi hte ndum ni hten sum mat na rai nga ai. Shing di na malai, sabyi nnan hpe sabyi ndum nnan ni hta ru bang lu na rai nga ai.?
(Mat 12:1-8; Luk 6:1-5)
23 Dai hpang Bansa Nhtoi hta e, Yesu gaw shi a sape ni hte rau hkaulan mam yi ni hpe lai di sa wa nga ma yang sape ni gaw hkaulan mam nsi ni hpe di la ma ai. Ref 2:23: Trj 23:25.*
24 Dai rai nna Hparishe ni gaw, ?Yu u, Bansa Nhtoi hta e n galaw mai ai amu hpe shanhte hpa rai galaw nga ma ta?,? ngu nna Yesu hpe tsun mu ai.
25 Shaloi Yesu gaw, ?Dawi hte shi a manang ni lusha kadawn nna, kawsi hkrum nga ai shaloi hpa baw galaw ma ai lam kalang mi muk n hti yu myit ni?
26 Hkinjawng agyi Abiahta a lakhtak e, Dawi gaw Karai Kasang a nta e 2:26: Karai Kasang a nta: Yerusalem Nawku Htingnu hpe ngu ai n re. Dai ten hta garai n gap da ma ai. Karai Kasang a matu gap da ai sumpan sum hpe ngu ai re.* de shang nna anhte a tara hte maren hkinjawng ni sha n rai yang gaw, kadai mung n mai sha ai madun da ai muk f 2:26: madun da ai muk: Dai hpe ?Bread of the Presence? shing n rai ?Show? ?Bread? madun da ai muk ngu nna shamying ma ai. Bat shagu matsi n rawng ai muk tawng 12 kabaw nna sumpan sum kata chyoi pra ai gawk na saboi ntsa e yan mi tawng kru kru di nna Karai Kasang kaw hkungga nawng ai hku tawn da ma ai. Dai muk dingsa hpe hkinjawng ni chyu sha mai sha ai.* hpe sha nna shi a manang ni hpe mung dai muk jaw sha yu sai n rai ni?,? ngu nna tsun mu ai. Ref 2:26: Pru 29:32-33; Jaw 24:5-9; 1Sa 21:1; 2Sa 15:35.*
27 Dai hpang Yesu gaw, ?Laban Nhtoi gaw masha a mai kaja lam a matu galaw da ai rai nna masha gaw Laban Nhtoi a matu hpan da sai n rai.
28 Dai rai nna Masha Kasha gaw Bansa Nhtoi a Madu mung rai nga ai,? ngu nna shanhte hpe tsun mu ai. Ref 2:28: Mat 12:8.*