11
(Mat 21:1-11; Luk 19:28-40; Yhn 12:12-19)
1 Yesu hte sape ni gaw, Yerusalem de ni wa magang ma yang, Bethpage hte Behtani mare ni a makau na Tsanlun bum de du ma ai.
2 Dai shaloi Yesu gaw, sape lahkawng hpe shawng de shangun dat nna matsun mu ai gaw, ?Nan a shawng de na kahtawng de sa wa masu: nan dai mare de du ai hte rau kadai mung garai n jawn yu ai lawze kasha langai mi dun nga ai hpe, nan mu na myit dai; dai hpe raw nhtawm nang de dun wa marit,? ngu mu ai.
3 Masha langai ngai, ?Nan hpa majaw shing rai galaw nga myit ta?? nga nna san myit yang, nan gaw, ?dai Madu ndai hpe lang ra ai da, lang ngut ai hte kalang ta bai sa sa ya na ra ai,? ngu nna tsun mu,? ngu mu ai.
4 Shing rai shan sa wa ma yang, lam e nta langai mi a chyinghka shinggan e lawze kasha dun nga ai hpe mu mu ai rai nna, dai hpe shan raw nga yang,
5 dai makau e tsap nga ai masha nkau mi gaw, ?Nan dai lawze kasha hpe raw nga ai gaw, nan hpa galaw nga ai rai myit ta?,? ngu nna shan hpe san mu ai.
6 Shan gaw, Yesu shan hpe tsun dat mu ai hte maren, tsun dan mu ai: dai rai nna shanhte gaw shan hpe dat dat mu ai.
7 Shan gaw dai lawze kasha hpe Yesu hpang de dun wa mu ai rai nna, de a ntsa e shanhte a hpun nba ni mara nhtawm, dai hta e Yesu lung jawn nga ai.
8 Masha law law wa, tinang a hpun nba ni hpe lam ntsa e hpyan nep ya nga yang, nkau mi gaw nam na hpun lakung lakying ni kran la nna dai lam e hkan nep ma ai.
9 Shawng e sa wa nga ai ni hte hpang e hkan nang ai masha ni gaw, ?Karai Kasang a hpung shingkang hpe shakawn kungdawn mu law! Madu a mying ningsang hte du sa ai wa gaw a nga u ga law!
10 Du magang ra ai anhte a wa Dawi a mungdan gaw a nga u ga law! Madu Karai Kasang a hpung shingkang hpe shakawn kungdawn mu law!,? nga nna jahtau garu ma ai.
11 Yesu gaw Yerusalem mare na Nawku Htingnu kata de shang nna, arai yawng mayawng hpe hkan yu kawan shagu yu wu ai. Rai ti mung jan du wa sai majaw, shi pru nna, sape shi lahkawng hte rau Behtani kahtawng de rai mat wa ai.
(Mat 21:18-19)
12 Hpang shani, Yesu hte sape ni Behtani kahtawng kaw na nhtang pru wa ma yang, Yesu kawsi hkrum nga ai.
13 Shaloi tsan tsan kaw nna, alap ni hte ka-up nga ai maihpang hpun langai mi hpe shi mu hkrup nna, dai hta e asi ni lama lu la na myit mada let sit sa wa ai. Rai ti mung shi dai de du wa yang, mai hpang si si na aten n re ai majaw, alap sha shi mu wu ai.
14 Yesu gaw, ?Prat dingsa e nang hta na asi hpe kadai mung n sha lu u ga,? ngu nna dai maihpang hpun hpe tsun kau wu ai.
Shi a sape ni mung dai hpe na ma ai.
(Mat 21:12-17; Luk 19:45-48; Yhn 2:13-22)
15 Ya shanhte Yerusalem de du ma yang, Yesu gaw Nawku Htingnu de shang nna, Nawku Htingnu kata e rai dut nga ai ni hte mari nga ai ni yawng hpe shaden shapraw kau mu ai. Gumhpraw byan sha ai ni a ku ni hte hkrudu dut ai ni a punghkum ni hpe kanawng kadawng galau kau ya mu ai.
16 Shi gaw Nawku Htingnu wang hpe lai di nna arung arai hpai shalai na ahkang kadai hpe mung n jaw wu ai.
17 Dai hpang shi gaw shanhte hpe, ?Karai Kasang gaw, ?Nye a nta hpe amyu baw shagu a matu akyu hpyi ai nta, ngu na mu ai,? nga nna tsun ai lam Chyum Laika ni hta ka da nga ai n rai ni? Rai ti mung nanhte gaw, dai hpe damya lungpu shatai kau manu ai,? ngu nna sharin shaga mu ai.Ref 11:17: Esa 56:7.*
18 Hkinjawng agyi ni hte tara sara ni, dai hpe na ma yang, shi hpe sat kau na lam tam ma ai. Shanhte gaw shi hpe hkrit da mu ai, hpa majaw nga yang, shawa masha ni yawng hte gaw, shi sharin shaga ai lam hpe mau mahka nga ma ai.
19 Shana de du wa yang, Yesu hte sape ni gaw dai mare shinggan de pru mat wa ma ai.
(Mat 21:20-22)
20 Hpang jahpawt jau jau e, Yesu hte sape ni dai lam hku hkawm sa wa ma yang, maihpang hpun hpe shanhte mu ma ai. Dai hpun gaw npawt kaw nna hpun ting hkraw nyip si mat nga ai.
21 Petru bai myit dum ai hte, Yesu hpe, ?Sara e, nang dagam kau ai maihpang hpun hkraw nyip si mat sai!,? ngu nna tsun wu ai.
22 Yesu htan let, ?Karai Kasang hpe kam sham nga mu.
23 Ngai nanhte hpe teng teng tsun made ai gaw, kadai rai ti mung, tinang a myit masin hta kam shut ai myit n rawng ai sha, tinang tsun ai hte maren byin na ra ai ngu nna kam ai wa gaw, ndai bum hpe, ndai shara kaw na baw mat nna panglai de htawt bang mat u, ngu yang, shi tsun ai hte maren shabyin ya na ra ai.Ref 11:23: Mat 17:20; 21:21; Luk 17:6.*
24 Dai re ai majaw ngai nanhte hpe tsun made ai gaw; nanhte akyu hpyi ai hte lama ma hpyi myit yang, nanhte lu la na ra ai ngu nna kam sham nga mu, shing rai jang nanhte hpyi ai hpa rai ti mung, lu la na marin dai.
25 Nanhte rawt tsap let akyu hpyi ai shaloi, masha langai ngai nanhte hpe shut ai mara lama ma nga yang, dai hpe raw dat kau ya na rai myit dai, shaloi she sumsing lamu e nga ai nanhte a Kawa gaw nanhte a mara ni hpe mung raw dat kau ya na ra ai.? Ref 11:25: Mat 6:14; Kol 3:13.*
26 (Rai ti mung nanhte masha ni a mara hpe n raw kau ya myit yang gaw, sumsing lamu e nga ai nanhte a Kawa mung nanhte a mara ni hpe raw dat kau ya na ra ai n rai.)t 11:25: Manuscripts nkau mi hta: Ndai Mrk 26 hpe jat bang la ma ai.* Ref 11:26: Mat 6:15.*
(Mat 21:23-27; Luk 20: 1-8)
27 Yesu hte sape ni gaw Yerusalem mare de kalang mi bai du wa ma ai. Ya Yesu Nawku Htingnu kata e htinglet hkawm nga yang, hkinjawng agyi ni, Tara sara ni hte agyi salang ni, shi hpang de sa du ma ai rai nna,
28 ?Nang gaw hpa ahkang hte ndai amu ni galaw n ta? Ndai ahkang nang hpe kadai jaw a ta?,? ngu nna san mu ai.
29 Yesu gaw, ?Ngai nanhte hpe ga san langai mi san yu made ga, nanhte ngai hpe mahtai jaw ai rai yang, hpa ahkang hte ndai hte hpe ngai galaw nga nngai, ngu ai lam ngai nanhte hpe tsun dan na made ai.
30 Yawhan gaw hkalup jaw na ahkaw ahkang kanang na lu a ta? Karai Kasang kaw na rai ni? Masha kaw na rai ni? Ngai hpe tsun dan yu marit,? ngu nna shanhte hpe tsun mu ai.
31 Shanhte shada da bawng ban dangrang hkat magang nna, ?Anhte kaning ngu tsun na rai ta? ?Karai Kasang kaw na re,? anhte ngu gaw yang, dai rai yang, ?Nanhte Yawhan hpe hpa rai n kam myit ta?? nga nna shi htan na ra ai.
32 Rai ti mung, ?Masha kaw na re,? ngu na mung, shanhte gaw shawa masha ni hpe hkrit agam nga ma ai; hpa majaw nga yang, Yawhan myihtoi rai nga ai hpe masha shagu kaja wa kam nga ma ai.
33 Dai rai nna, shanhte Yesu hpe htan let, ?Anhte n chye gaw ai,? ngu nna tsun mu ai,
Shaloi Yesu gaw, ?Ndai amu ni hpe hpa ahkang hte ngai galaw nngai gaw, ngai mung nanhte hpe n tsun dan na nngai,? ngu nna shanhte hpe tsun mu ai.